ރާއްޖޭގެ އުއްތަމަ ފަނޑިޔާރު އަބްދުﷲ ސައީދާއި، ސްޕްރީމްކޯޓުގެ ފަނޑިޔާރު އަލީ ހަމީދު މަގާމުގައި ތިއްބަވަނިކޮށް ހައްޔަރުކޮށްގެން ގެންދިޔަގޮތް ގަބޫލު ކުރަން ދަތިކަމަށް މަކުނުދޫ ދާއިރާގެ މަޖިލިސް މެންބަރު އަނާރާ ނައީމް ވިދާޅުވެއްޖެއެވެ.
"އުއްތަމަފަނޑިޔާރާއި ފަނޑިޔާރު އަލީ ހަމީދު އަދިވެސް އެތިއްބެވީ މަގާމުގައި. އެގޮތަށް މަގާމުގައި ތިއްބަވަނިކޮށް ވަރަށް ބޭއިންސާފުން، އަޅުގަނޑުމެންނަށް ގާބޫލުކުރަންވެސް ދަތިގޮތަކަށް އެބޭފުޅުން ހައްޔަރުކޮށްގެން އެބޭފުޅުންގެ ޝަރީއަތް ކުރަން އެގެންދިޔައީ،" ވީޓީވީގައި ވާހަކަ ދައްކަވަމުން އަނާރާ މިއަދު ވިދާޅުވިއެވެ.
އޭނާ ވިދާޅުވީ މިކަހަލަ ކަންތައްތަކަކީ ވަރަށް ވިސްނުންތެރި ކަމާއެކު ކުރަން ޖެހޭކަންކަން ކަމަށެވެ. ގާޒީންނަށް ބިރުދެއްކުންވެސް މިކަމުން މާނައެބަކުރެވޭ ކަމަށް އޭނާ ވިދާޅުވިއެވެ. "ގާޒީންނަކީ ވަރަށް އިޚްތިޔާރުން، އިންސާފަށް މަސައްކަތް ކުރައްވަންޖެހޭ ބޭފުޅުން. އިންސާފުން މައްސަލަތައް ނިންމޭނީ ހަމަޖެހޭ މާހައުލެއް އެބޭފުޅުންނަށް ގާއިމްކޮށްދީގެން. އެހެންވީމާ އަޅުގަނޑު ގަބޫލުކުރާގޮތުގައި ހުރިހާ އެންމެންވެސް މިކަމަށް ވަކާލާތު ކުރަންޖެހޭ. އެއީ އެގައުމެއްގައި އަދުލު އިންސާފު ނެތިއްޖެއްޔާ އެގައުމެއްގައި ހަމަޖެހުމެއް ގާއިމެއްނުވާނެތީ،" އަނާރާ ވިދާޅުވިއެވެ.
ރާއްޖެފަދަ މުސްލިމް ގައުމެއްގައި ތިއްބަވާ ފަނޑިޔާރުންނަށް އަދުލު އިންސާފު ގާއިމްކޮށްދިނުމުގެ މާހައުލެއް ގާއިމްކޮށްދިނުން ވަރަށް މުހިންމު ކަމަށާއި، މިނިވަން މުއައްސަސާތަކަށްވެސް އެ މުއައްސަސާތަކަށް މަސައްކަތް ކުރެވޭގޮތް ތަނަވަސް ކޮށްދެއްވައި އެމުއައްސަސާއެއްގެ ދައުރު އަދާކުރެއްވުމުގެ ފުރުސަތު ދޭންޖެހޭ ކަމަށް އޭނާ ވިދާޅުވިއެވެ.
"ރައްޔިތުންގެ މަޖިލީހުގައިވެސް މިލިޓަރީން ހިސާރުކޮށްފައިވާ ހިސާރުކުރުން ދޫކޮށްލައި މެންބަރުންނަސް މަޖިލީހުގައި މަސައްކަތް ކުރެވޭނެ ފުރުސަތު ހޯދައިދިނުން މުހިންމު. އެހެންނޫނިއްޔާ އަޅުގަނޑުމެން ތަމްސީލްކުރާ ރައްޔިތުން އެބައަހާ މެންބަރުން ކީއްތޯ ކުރަނީ. އެހެންވީމާ އަޅުގަނޑުމެންނަށް އެ މާހައުލު ތަނަވަސްކޮށްދީގެން އެ މަޖިލީހަށް ވަދެވޭނެގޮތް ހަދައިދީގެން އަޅުގަނޑުމެންނަށް ކުރަންޖެހޭ މަސައްކަތްތައް ކުރެވޭނީ،" އޭނާ ވިދާޅުވިއެވެ.
އަނާރާ ވިދާޅުވީ އެއްވެސް މަގާމަކީ އެމީހަކު ރަސްކަންކުރަން ދީފައި އޮންނަ މަގާމެއް ނޫންކަމަށެވެ. ކޮންމެ މަގާމަކީވެސް ޒިންމާތަކަކާއި މަސްއޫލިއްޔަތުތަކާ އެއްކޮށް ހަވާލުކޮށްފައިވާ މަގާމްތަކެއް ކަމަށްވެސް ވިދާޅުވިއެވެ.
މަޖިސް މެންބަރުންނޫން ކަމަށް އިލެކްޝަންސް ކޮމިޝަނުން ނިންމަވައިފައިވާ 12 މެންބަރުންނާ ބެހޭގޮތުންވެސް އަނާރާ ކޮންމެވެސް ވަރަކަށް ވާހަކަ ދެއްކެވިއެވެ. "އެ މެންބަރުންނަށް ވަރަށްބޮޑެތި އަނިޔާތަކެއް ލިބިއްޖެ. ޖަލަށް ގެންގޮސްފި. ޖަލުގައި އެތައް ދުވަހަކު ހޭދަކޮށް މެންބަރުން މަޖިލީހަށް ނުވައްދާ ވަރަށް ހާލުގައި ހަގީގަތުގައި އުޅެފައި މިހާތަނަށްއައީ. ސްޕްރީމް ކޯޓުން އެކެއް ފެބްރުއަރީގައި މިހާރުވަނީ އެމެންބަރުންގެ ގޮނޑި ނުގެއްލޭ ކަމަށް އަންގަވައިފައި. އެހެންނަމަވެސް އަޅުގަނޑުމެން ކިހިނެއްތޯ ޔަގީން ކުރާނީ އަނެއްކާވެސް އެ އަމުރަށް ބަދަލު ނުގެންނާނެކަން،" އަނާރާ ވިދާޅުވިއެވެ. އަބަދުވެސް ފެންނަނީ ހުރިހާ ބާރެއް ސަރުކާރުގައި އޮންނަންޖެހޭ ތަން ކަމަށްވެސް އޭނާ ވިދާޅުވިއެވެ.
އަނާރާ ވިދާޅުވީ މަޖިލީހުގައި ސަލާމަތީ ކަންކަން ބަލަހައްޓާ މީހުންވެސް
ޣައިރު ގާނޫނީ އަމުރަށް ތަބާވުން ހުއްޓާލަންޖެހޭ ކަމަށެވެ. އެކަން ސިފައިންނާއި ފުލުހުންނަށް ރަނގަޅަށް އެނގެންޖެހޭނެ ކަމަށްވެސް އޭނާ ވިދާޅުވިއެވެ.
