ސިޔާސީ ގޮތުން ނަފްރަތާއި ހަރުކަށިކަމާއި ހަމަނުޖެހުމުގެ ނިޒާމެއް ދިވެހި ރައްޔިތުން ބޭނުންނުވާ ކަމަށް ކުރީގެ ރައީސް ޑރ މުޙަންމަދު ވަޙީދު ޙަސަން މަނިކު ވިދާޅުވެއްޖެއެވެ.
ދިވެހި ތާރީޚުގައި ތަފާތު ގޮތަކަށް ބަދަލުވެގެންދިޔަ އެމްޑީޕީގެ ވެރިކަން ބަދަލުވި ދުވަސް ކަމަށްވާ ފެބްރުއަރީ 7 އާ ދިމާކޮށް ޑރ ވަޙީދު ރަސްމީ ފޭސްބުކްގައި ލިޔުއްވި ބަސްކޮޅެއްގައި ވިދާޅުވެފައި ވަނީ މާޒީން އިބްރަތް ޙާސިލް ނުކޮށްފިނަމަ ތާރީޚު އަލުން އިއާދަވުމުގެ ފުރުޞަތު އެބައޮތް ކަމަށެވެ.
މިއީ ރާއްޖޭގައި މިހާރު އުފެދިގެން އުޅޭ ސިޔާސީ ހަމަނުޖެހުން ގަނޑުގެ ތެރޭގައި ޑރ ވަޙީދު ރަސްމީކޮށް އެއްޗެއް ވިދާޅުވި ފުރަތަމަ ފަހަރެވެ. ނަމަވެސް 7 ފެބްރުއަރީއާ ހަމައަށް ރައީސް ކަމުގައި ހުންނެވި ކުރީގެ ރައީސް މުޙަންމަދު ނަޝީދު ކުރެއްވި ޓްވީޓެއް ރިޓްވީޓް ކުރެއްވުމާއި އެމްޑީޕީގެ ޚަބަރުތައް ގެނެސްދޭ ފޭސްބުކް އެކައުންޓެއްގައިވާ ލިޔުމެއް ޑރ ވަޙީދު ވަނީ ފޭސްބުކްގައި ޝެއާރ ކުރައްވާފައެވެ.
ޑރ ވަޙީދު ރިޓްވީޓް ކުރެއްވީ ސުޕްރީމް ކޯޓުގެ އަމުރާއި ގުޅިގެން ރައީސް އަބްދުﷲ ޔާމީން ވެރިކަމުން އިސްތިއުފާ ދެއްވުމަށް ގޮވާލައި ނަޝީދު ކުރެއްވި ޓްވީޓެކެވެ. މީގެއިތުރުން އެމްޑީޕީގެ ޚަބަރުތައް ގެނެސްދޯ ސޯޝަލް މީޑިޔާގެ ޕޭޖެއް ގައި ލިޔެފައިވާ ލިޔުންކޮޅެއްވެސް ޑރ ވަޙީދު ވަނީ އޭނާގެ ރަސްމީ ފޭސްބުކް އެކައުންޓުގައި ޝެއާރ ކުރައްވާފައެވެ. އެ ލިޔުންކޮޅަކީ މީގެ ހަ އަހަރު ކުރިން 7 ފެބްރުއަރީގައި އުފެދުނު ހަމަނުޖެހުން ގަނޑުގެ ތެރޭގައި ކުއްލި ނުރައްކަލުގެ ޙާލަތު އިއުލާން ނުކޮށް އިސްތިއުފާ ދެއްވީ ގޮށްމުށުގެ ބާރުން ވެރިކަން ނުކުރައްވަން ވެގެން ކަމަށް ނަޝީދު ވިދާޅުވެފައިވާ ވާހަކައެވެ.
