ދިވެހި ލޮބުވެތި ރައްޔިތުންގެ ފަރާތުން އިޚްލާސްތެރިކަންނޫން އެހެން އެއްވެސްއެއްޗެއް ބޭނުންފުޅުނުވާ ކަމަށް ރައީސް ޔާމީން މިރޭ ވިދާޅުވެއްޖެއެވެ.
ޕީޕީއެމްގެ ރުމާލު 2 ޖަގަހައިގައި މިރޭ ބޭއްވި ޖަލްސާއެއްގައި ވާހަކަފުޅު ދައްކަވަމުން އެމަނިކުފާނު ވިދާޅުވީ ރައްޔިތުންނަށް އިތުރުފުޅު ހެއްދެވުމަކީ އެމަނިކުފާނު ކުރައްވާނެ ކަމެއްނޫން ކަމަށެވެ. އަދި މަކަރުހެއްދެވުމާއި އޮޅުވާލުމަކީވެސް އެމަނިކުފާނު ކުރައްވާނެ ކަމެއް ނޫންކަމަށްވެސް ވިދާޅުވިއެވެ.
އެމަނިކުފާނު ސިޔާސީ ދާއިރާއަށް ނުކުންނެވީ ރައްޔިތުންނަށް ގެއްލުންދެއްވައި ރާއްޖޭގައިހުރި ވަސީލަތްތައް ނަހަމަ ގޮތުގައި ބޭނުންފުޅު ކުރެއްވުމަށްނޫން ކަމަށްވެސް ވިދާޅުވިއެވެ. އޭގެ ބަދަލުގައި ސިޔާސީ ދާއިރާގެ ތެރެއިން ރައްޔިތުން ގާތަށް ވަޑައިގެންނެވީ އިޚްލާސްތެރި ހިތަކާއެކު ކަމަށްވެސް ވިދާޅުވިއެވެ. އެމަނިކުފާނު މިހާރުވެސް ރައްޔިތުންނާއެކު އެމަނިކުފާނު ހުންނެވީ އެގޮތުގައި ކަމަށްވެސް ވިދާޅުވިއެވެ.
ރައީސް ވިދާޅުވީ އެމީހަކަށް ލިބެން ނޭދޭ ހިތްދަތިކަމަކާއި، ބަދުނަސީބެއް އެހެން މީހަކަށް އެދޭކަށް ނުވާނެ ކަމަށެވެ.
ރައީސް ވިދާޅުވީ ރިޔާސީ އިންތިޚާބު މިހާރުވަނީ ވަރަށްބޮޑަށް ކައިރިވެފައި ކަމަށެވެ. އިންތިޚާބު ބޭއްވުމާއި މިދޭތެރޭ މިއޮތް މުއްދަތުގައި ގައުމު ނުރައްކަލުގެތެރެއަށް ވައްޓާނުލުމަށް ރައީސް އިލްތިމާސް ކުރެއްވިއެވެ. އެފަދަ ހާލަތެއް މެދުވެރިވާ ކޮންމެ ފަހަރެއްގައި އޭގެ ނާޖާއިޒު ފައިދާ ނަގާނެ ބަޔަކުވެސް އެބަތިބި ކަމަށްވެސް އެމަނިކުފާނު ވިދާޅުވިއެވެ.
"އަޅުގަނޑު ބޭނުންވަނީ އިޚުލާސްތެރި ހިތެއް. އަޅުގަނޑު ވަރުބަލިވެއްޖެ. ހަމަ ހަގީގަތުގައިވެސް ވަރުބަލިވެއްޖެ،" އެމަނިކުފާނު ވިދާޅުވިއެވެ.
ރާއްޖެއަށް މިހާރުދިމާވެގެން އުޅޭކަމަކީ މިހާރުއޮތް ނިޒާމް އެއްފުށުން އަނެއްފުށަށް ޖަހާލުމަށް ކޮށްގެން އުޅޭކަމެއް ކަމަށް ރައީސް ވިދާޅުވިއެވެ. އެހެނަމަވެސް މިއީ ބަޣާވާތެކޭ ދަންނަވަން އަދި އެނގިވަޑައިނުގަންނަވާ ކަމަށްވެސް ވިދާޅުވިއެވެ.
