ބްލޫރިބަން އާއި ދޮންބެއްޔާއަކީ ، 1990 ގެ އަހަރުތަކުގައި އެކުގައި އުޅުނު ދެ އެކުވެރިންނެވެ. ދޮންބެއްޔާ އޭރުވެސް އަދި މިހާރުވެސް ދިރިއުޅެމުން ގެންދަނީ ފަޅުރަށެއްގައެވެ. ދޮންބެއްޔާއަކީ ، ދުނިޔޭގެ އާޖުފާޖު ދަންނަ އަދި ފަޅުރަށެއްގައި ހުއްޓަސް ދުނިޔެއާއި ރާއްޖޭގެ މަޢުލޫމާތު ބަރާބަރަށް ހޯދަމުން ގެންދާ މީހެކެވެ. މަޢުލޫމާތު މުއްސަންޖެވެ. ފަޅުރަށެއްގެ ޤުދުރަތީ ރީތި މާޙައުލުގައި އެލިބޭ ހިތްހަމަ ޖެހުމާއެކު ، ދޮންބެއްޔާގެ ކަމަކަށް އޮންނަނީ ދުނިޔެ ހިނގާގޮތް އުނގެނި ދަސްކުރުމެވެ.
1990 ގެ އަހަރުތަކުގެ ތެރޭގައިވެސް ، ދޮންބެއްޔާވަނީ އޭނާ ހުންނަ ފަޅުރަށުން ފެންނަ ދޫނިސޫފާސޫފީގެ ދިރިއުޅުން ދިރާސާ ކޮށްފައެވެ. ދޮންބެއްޔާ އެންމެ ޝަޢުޤުވެރިކަމާއެކު ، އެދުވަސްވަރު ކޮށްފައިވާ ދިރާސާއަކީ ، ހޯގުޅާގެ ދިރިއުޅުމެވެ. ދުނިޔެއަށް އައިސްފައިވާ ބޮޑެތި ބަދަލުތަކާއެކުވެސް ، ހޯގުޅާގެ ޢާންމު ދިރިއުޅުމަށް އެއްވެސް ބަދަލެއް ނާދެއެވެ. އަދިވެސް ހަމަ އެ ހޯގުޅާއެވެ.
ހޯގުޅާގެ ފަހުގެ ދިރާސާތަކުން ދޮންބެއްޔާއަށް އިތުރު ކަންތައްތަކެއް ފެނުނެވެ. އެއީ ހޯގުޅާގެ ތިން ބާވަތެއް ރާއްޖޭގައި އުޅޭކަމެވެ. އެއީ ބޮޑު ހޯގުޅާ އާއި ހޯގުޅާ އަދި ދިވެހި ހޯގުޅާއެވެ. ހޯގުޅާގެ އާދަކާދަ އާއި ދިރިއުޅުމުގެ ވަށްޓަފާޅިއަކަށް މާބޮޑު ބަދަލެއް ނާދެއެވެ. ދޮންބެއްޔާއަށް ފާހަގަ ކުރެވުނު އަނެއް ކަމަކީ ، ހޯގުޅާގެ ޢަދަދު ގިނަވެފައި ކާލެއްވެސް ގިނައީއެވެ. އަތުޖެހުނު ގޮތަކަށެވެ.
ދުވާލު ހަތަރު ދަމު ކަނޑުމަތީ އުޅެފައި އެއްގަމަށް ނިދަން އަރައި ނިދަނީ ، ހޮރުގައި އޮންނަ ބޮޑުކަކުނި ބޭރަށް ނެރެލައި އެހޮހަޅަ މިލްކު ކޮށްގެންނެވެ. ކެއުމުގެ ވާހަކަ ދައްކާނެ ކަމެއް ނެތެވެ. ކުރިންވެސް އުޅޭ ގޮތަށެވެ. އައިނަށް އަރާ މާދޫންޏާއި ކުރަނތްގާ އަދި މާހޯރަފަދަ ދޫނި ، މަހެއް ކާލާއިރަށް އެދޫނިތައް ފަހައިގަނެއެވެ. އެ ދޫނިތައް ފަހާފަހާ ވަރުބަލިވެގެން ހޮޑު ލެވެންދެން ފަހައެވެ. އަދި ހޮޑު ދުއްވާލާއިރަށް ، ކަނޑާ ހިސާބަށް ތިރިޔަށް ނުދަނިސް ، އެހޮޑުތައް ނުވަތަ މަސްތައް ހޯގުޅާ ކައިލައެވެ. ހޯގުޅާ ކައި އުޅެނީ އަމިއްލަ މަސައްކަތުން ހޯދާ އެއްޗަކުންނެއް ނޫނެވެ. އެހެން ދޫނިތައް މަސް ކެއުމުން އެ ދޫނިތައް ފަހައިގަތް ގަތީނުންގޮސް ، ހޮޑުދުއްވާލީމަ ، ހޮޑަށްލާ މަސްތަކެވެ.
ހޯގުޅާގެ ދިރިއުޅުމާ އެއްގޮތަށް ދިރިއުޅޭ އިންސާނުން ، އޭރުވެސް އަދި މިހާރުވެސް ދޮންބެއްޔާއަށް ފެނެއެވެ. މިހާރު އަދި އެކަން މާ ބޮޑެވެ. ޓެކްނޮލޮޖީ ބޭނުންކޮށްގެންނާއި ވަށްކަން ކޮށްގެން ހޯގުޅާ ކާގޮތަށް ކައިއުޅޭ މީހުންނެވެ. ކުއްލި މުއްސަނދިކަން ފެންނަ އެތައް ބަޔެކެވެ. ނުޙައްޤު މުއްސަނދިކަމުން ދުނިޔެ ހޯދައި ، " އެތުދަތުން ފުޅަށް އަޅައިގެން މަޑުތަންމަތީ ނިދާ " ވެސް އެތައް ބަޔެކެވެ. މާތްކަލާކޯއެވެ ! ދުނިޔެ މިއޮށްގެން ޤިޔާމަތްވަނީއެވެ. ދޮންބެއްޔާގެ ހިތަށް އެރިއެވެ.
ވަރަށް މޮޅު ލިއުމެއް. އާފަތިސްގެ ކުލަވަރު ފެންނަން ފަށައިފި. މި ކަހަލަ ހޯގުޅާ މި ގަވްމުގަ ވަރަށް ގިނަ