އެއްވެސް ބައެއްގެ މައްޗަށް ޝަރުއީ ކޯޓަކުން ޝަރުއީ އަމުރެއްނެރެފި ކަމަށްވާނަމަ އެއަށް އަމަލު ކުރަންޖެހޭނެ ކަމަށް ކުރީގެ ބަންޑާރަނާއިބު ހުސްނުއްސުއޫދު ވިދާޅުވެއްޖެއެވެ.
ސުއޫދު ލޯފާމުގައި ނޫސްވެރިންނާ ބައްދަލުކުރައްވައި އޭނާ މިއަދު ދެއްކެވި ވާހަކައިގައި ވިދާޅުވީ މިދިޔަ ބުރާސްފަތި ދުވަހުގެރޭ ސްޕްރީމްކޯޓުން ނެރެފައިވާ ސިޔާސީ ކުށްވެރިން ދޫކޮށްލުމުގެ އަމުރުގައި އުނި ކަންތައްތަކެއް އެބަހުރި ކަމަށް ގަބޫލު ކުރައްވާ ކަމަށެވެ. އެހެންނަމަވެސް "ޝަރުއީ އަމުރެއް އޮތިއްޔާ ޖެހޭނެ އެއަށް އަމަލުކުރަން،" އޭނާ ވިދާޅުވިއެވެ.
ސުއޫދު ވިދާޅުވީ ސްޕްރީމްކޯޓުގެ އަމުރަކީ ރާއްޖޭގެ ހުރިހާ މުއައްސަސާއެއްގެ މައްޗަވެސް ލާޒިމް ކުރައްވައިފައިވާ އަމުރެއް ކަމަށެވެ. އެހެންނަމަވެސް މިހާތަނަށް އެއަމުރު އެއްވެސް މުއައްސަސާއަކުން ތަންފީޒު ކޮށްފައެއް ނުވެއެވެ.
އެ އަމުރުގައިވަނީ ސިޔާސީ 9 ބޭފުޅަކު ބަންދުން ދޫކޮށްލުމުގެ އިތުރަށް ރައްޔިތުންގެ މަޖިލީހުގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން އަންގަވާފައިވާ 12 މެންބަރެއްގެ ގޮނޑި ނުގެއްލޭ ކަމަށް ކަނޑައެޅުމަށެވެ.
ސުއޫދު ވިދާޅުވެފައިވަނީ ސުޕްރީމް ކޯޓުގެ އަމުރުގައި އުނިކަންތައްތަކެއް ހުއްޓަސް އެކަން ހައްލުކުރެވޭނެ ގޮތްތަކެއް ރާވައި ހުށަހަޅައިދިނުމުގެ ކުރިން އަމުރުގައިވާ ގޮތަށް އަމަލުކުރަންޖެހޭނެ ކަމަށެވެ. އެއަށްފަހު އެކަންކަން ރަނގަޅު ކުރުމަށް ބަންޑާރަނާއިބަށް ލަފާ ދެވިދާނެ ކަމަށް ދެކޭކަމަށް ވިދާޅުވެފައިވެއެވެ.
