ރައީސުލްޖުމްހޫރިއްޔާ ވެރިކަމުން އަޒުލް ކުރުމުގެ އެއްވެސް އިހްތިސާސެއް ސްޕްރޯމްކޯޓަށް ނެތްކަމަށާއި، އެފަދަ އަމުރެއް އެ ކޯޓުން ނެރުއްވިޔަސް ކިޔަމަން ނުވުމަށް ތަންފީޒީ އިދާރާތަކަނަށް ބަންޑާރަ ނާއިބު މިއަދު ގޮވައިލައްވައިފިއެވެ.
ބަންޑާރަ ނާއިބު މުހައްމަދު އަނިލް މިކަމަށް ގޮވައިލެއްވީ ސަރުކާރުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައެވެ.
އަނިލް ވިދާޅުވީ ރައީސް ޔާމީން ވެރިކަމުން އަޒުލް ކުރުމުގެ އަމުރެއް ސްޕްރީމް ކޯޓުން މިއަދު ކުރައްވާނެ ކަމުގެ މައުލޫމާތު ލިބިވަޑައިގެންފައިވާ ކަމަށެވެ. އެފަދަ އަމުރެއް ސްޕްރީމްކޯޓުން ކުރައްވާ ހިސާބުން ބަޔަކު މީހުން މާލޭގައި ހަމަނުޖެހުން އުފައްދުމަށް މަސައްކަތް ކުރަމުންދާ ކަމުގެ އަޑުތަކެއްވެސް އިވިވަޑައިގެންފައިވާ ކަމަށް ވިދާޅުވިއެވެ.
ދިވެހި ޖުމްހޫރިއްޔާގެ ގާނޫނު އަސާސީން ދީފައިނުވާ ބާރެއް އަދި ފުރުސަތެއްވެސް ބޭނުން ކުރުމުގެ ހައްގެއް އެއްވެސް މުއައްސަސާއަކަށް ލިބިފައިނުވާ ކަމަށްވެސް އޭނާ ވިދާޅުވިއެވެ. ރައީސް މަގާމުން ވަކިކުރުމުގެ ބާރުއޮތީ ހަމައެކަނި ރައްޔިތުންގެ މަޖިލީހަށް ކަމަށްވެސް ބަންޑާރަ ނާއިބު ވިދާޅުވިއެވެ.
"ގާނޫނީ އެންމެހާ ކަންކަމުގައި ލަފާދޭންހުރި މީހެއްގެ ހައިސިއްޔަތުން އަޅުގަނޑު މި ދަންނަވަނީ. ސުޕްރީމް ކޯޓުން ރައީސުލްޖުމްހޫރިއްޔާ ވަކި ކުރުމަށްކުރާ އެއްވެސް އަމުރަކީ ނުވަތަ ހުކުމަކީ ގާނޫނު އަސާސީގެ ތެރޭއިން ކުރެވޭނެ ކަމެއް ނޫން. އެހެންވީމާ މިކަން އަޅުގަނޑުވާނީ ރާއްޖޭގެ ގާނޫނު ތަންފީޒުކުރާ ފަރާތްތަކަށް ވަރަށް ސަރީހަކޮށް ދަންނަވާފައި،" ބަންޑާރަ ނާއިބު ވިދާޅުވިއެވެ.
