ވިޔަވަތި ކޮންފަރެންސްގެ ހަތަރު ވަނަ ބައްދަލުވުން ޚާއްސަކުރާނީ ތިލަދުންމައްޗަށް ކަމަށް އިއުލާންކޮށްފިއެވެ.
މިއީ ލާމަރުކަޒީ ނިޒާމު ތަންފީޒު ކުރުމުގައި ކައުންސިލްތަކަށް ކުރިމަތިވަމުން އަންނަ ގޮންޖެހުންތައް ދެނެގަނެ، ކުރިމަތިވާ ގޮންޖެހުންތަކާއި މައްސަލަތައް ހައްލުކުރުމަށް ބާއްވާ ކޮންފަރެންސެކެވެ.
މި ބައްދަލުވުން ބާއްވާނީ އަންނަ އަހަރުގެ ޖެނުއަރީމަހު ކަމަށް ލ. އަތޮޅުގައި ނިމިގެންދިޔަ ވިޔަވަތި ކޮންފަރެންސްގައި ވަނީ އިޢުލާންކޮށްފައެވެ.
މާލޭގެ ދެކުނުގެ 5 އަތޮޅާއި ދެ ސިޓީއަކަށް ޚާއްސަ ކޮށްގެން ލ. ގަމުގައި ބޭއްވި ވިއަވަތި ކޮންފަރެންސް ނިންމުމުގެ ރަސްމިއްޔާތުގައި ވާހަކަ ދައްކަވަމުން ރައީސް ސާލިހު ވިދާޅުވީ ކުރިޔަށް އޮތް ވިއަވަތި ކޮންފަރެންސްއަކީ ރާއްޖޭގެ އެންމެ އުތުރަށް ޚާއްސަކޮށްގެން ބާއްވާ ކޮންފަރެންސެއް ކަމަށެވެ.
"ފާއިތުވެދިޔަ ތިން ކޮންފަރެންސަކީވެސް ވަރަށް ކާމިޔާބު ކޮންފަރެންސްތަކެއް. ކުރިޔަށް އޮތް ކޮންފަރެންސަކީ މިއަށްވުރެވެސް ކާމިޔާބު ކޮންފަރެންސެއްކަމަށް ވެގެންދާނޭކަމަށް އުއްމީދުކުރަން." އެމަނިކުފާނު ވިދާޅުވިއެވެ.
ރައީސް ސާލިހު އިތުރަށް ވިދާޅުވީ މި ކޮންފަރެންސްގައި ބައިވެރިން ބޭނުންވާ ވަރަށް ޚިޔާލު ފާޅުކުރުމަށް ވަގުތު ނުދެވުނު ކަމަށާއި، މިފަހަރުގެ ތަޖުރިބާގެ އަލީގައި ކުރިޔަށް އޮތް ކޮންފަރެންސް އިތުރަށް ފުރިހަމަ ކުރައްވާނޭ ކަމަށެވެ.
ވިއަވަތި ރާއްޖެ ކޮންފަރެންސަކީ، ލާމަރުކަޒީ ނިޒާމު ހަރުދަނާ ކުރުމަށް އަމާޒު ކޮށްގެން ރައީސުލްޖުމްހޫރިއްޔާގެ އިސް ނެންގެވުމުގެމަތިން ބާއްވަމުން އަންނަ ކޮންފަރެންސެކެވެ.
މިކޮންފަރެންސްގައި ރައީސް އޮފީހުގެ އިސް ބޭފުޅުންނާއި ވަޒީރުންނާއި ރައްޔިތުންގެ މަޖިލިހުގެ މެމްބަރުންނާއި، ސަރުކާރުގެ އިސްވެރިންނާއި ފަންނީ މާހިރުން ވެސް ބައިވެރިވެ ވަޑައިގަންނަވައެވެ.
ރަށުގެ ނަންވެސް ހާމަކޮށްލިނަމަ!