ރާއްޖޭގެ އެކި ރަށްރަށަށް އުދަ އަރަމުންދާއިރު، އެންމެބޮޑަށް އަސަރުކޮށް، އެންމެބޮޑު ގެއްލުމެއް މިހައިތަނަށް ލިބުނީ އައްޑު ސިޓީ އާއި ގދ. މަޑަވެއްޔަށް ކަމަށް ނެޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެންޑީއެމްއޭ) އިން ހާމަކޮށްފިއެވެ.
އެ އޮތޯރިޓީން ކޮށްފައިވާ ޓްވީޓަށް ބަލާއިރު، ރާއްޖޭގެ 21 ރަށަކަށް އުދައިގެ އަސަރުކޮށްފައިވާ ކަމަށް މިހައިތަނަށް ވަނީ ހާމަވެފައެވެ.
އެގޮތުން ގާދިއްފުށިން 35 ގެއަކަށް ލޮނުވަދެ އެކިވަރުގެ ގެއްލުން ލިބިފައިވާ ކަމަށާއި މަޑިފުށިން 60 ގެއަކަށް ލޮނުވަދެ އެކިވަރުގެ ގެއްލުން ލިބިފައިވާ ކަމަށެވެ. އަދި ދިޔަމިގިލިން ފަސް ގެއަކަށާއި ވޭމަންޑުއިން 10 ގެއަކަށް އެކިވަރުގެ ގެއްލުން ލިބިފައިވާ ކަމަށެވެ. އަދި ތިމަރަފުއްޓަށް އުދައިގެ އަސަރު ކޮށްފައިވާއިރު، އޮމަދޫގެ 15 ގެއަކަށް އުދައިގެ އަސަރުކޮށް އެކިވަރުގެ ގެއްލުން ލިބިފައިވާ ކަމަށެވެ.
މީގެ އިތުރުން އދ ފެންފުއްޓާއި ތ. އަތޮޅުގެ 8 ރަށަކަށް އުދައިގެ އަސަރުކޮށްފައިވާ ކަމަށާއި ކިނބިދޫގެ އަ8 ގެޔަކަށް ފެންވަދެ އެކިވަރުގެ ގެއްލުން ލިބިފައިވާއިރު، ތ. ގުރައިދޫގެ މީހުން ދިރިއުޅޭ ހިސާބަށް އުދައިގެ އަސަރުކޮށްފައިވާ ކަމަށް ބުނެއެވެ. އެހެންނަމަވެސް ގޭގެއަށް ލޮނުވަދެފައި ނުވާ ކަމަށް ބުނެއެވެ.
މީގެ އިތުރުން ލ. މާވަށަށް އުދަ އަރައި 4 ގެއަކަށް އެކިވަރުގެ ގެއްލުން ލިބިފައިވާއިރު، ގއ. ކޮލަމާފުއްޓާއި މާމެންދޫއަށް ވެސް ކޮންމެވެސް ވަރަކަށް އުދައިގެ އަސަރުކޮށްފައިވާ ކަމަށް އެންޑީއެމްއޭ އިން ބުނެއެވެ. އަދި ގދ. އަތޮޅުގެ ފަސް ރަށަކަށް އުދައިގެ އަސަރުކޮށްފައިވާއިރު، މަޑަވެލީގެ 89 އިންސައްތަ ގެއަށް ލޮނުވަދެ، ފަރެސްމާތޮޑާގައި މީހުން ދިރިއުޅޭ ގެއަކަށް ބޮޑެތި ގެއްލުންތަކެއް ލިބިފައިވާ ކަމަށް ވަނީ ބުނެފައެވެ.
އެންޑީއެމްއޭ ގެ ޓްވީޓުގައި އިތުރަށް ބުނެފައިވަނީ ގދ. ހޯޑެއްދޫ، ފިޔޯރީ އަދި ރަތަފަންދުއަށް ވެސް އެކިވަރުގެ ގެއްލުން ވަނީ ލިބި، އައްޑުސިޓީ މަރަދޫގެ 50 ގެއަކަށް ލޮނުވަދެ، އޭގެތެރެއިން ދެ ގެއެއްގެ މީހުން އެހެން ގެއަކަށް ބަދަލުކުރުމުގެ މަސައްކަތް ކުރަމުން އަންނަކަމަށެވެ. އަދި މަރަދޫފޭދޫ އަށް ވެސް އުދަ އަރައި 30 ގެއަކަށް ލޮނުވަދެ ގެއްލުންތަކެއް ލިބިފައިވާ ކަމަށް ބުނެފައިވެއެވެ.
މީގެ އިތުރުން ޅ. ކުރެންދުއަށް ވެސް އުދައިގެ އަސަރުކޮށްފައިވާއިރު، އެ އަތޮޅު ނައިފަރަށް ވާރޭވެހި ފެން ބޮޑުވެގެން ފެން ހިންދުމުގެ މަސައްކަތް ކުރަމުން އަންނަކަމަށް ވެސް އެންޑީއެމްއޭ އިން ބުނެއެވެ.
