މިސްރުގެ އަސްވާނު ކަރީގައިގައި ފަތުރުވެރިން ދަތުރުކުރި ބަހެއް ލޮރީއެއްގައި ޖެހި އިއްޔެ ހިނގި ހާދިސާގައި 10 މީހުން މަރުވެއްޖެއެވެ.
ދެކުނުގެ އަސްވާނު-އަބޫސިންބަލް ހައިވޭގައި، އާސާރި ރަށެއް ކަމުގައިވާ އަލްއަޤްޞަރު (ލަކްޒަރ) ގެ 55 ކިލޯމީޓަރު ދެކުނުން ދަތުރުކުރަމުން ދިޔަ ބަހާއި ލޮރީ މުޑިއެރުމުގެ ސަބަބުން ބަހުގައި ވަނީ އަލިފާން ރޯވެފައެވެ. މި ހާދިސާ ހިނގަން މެދުވެރިވި ސަބަބެއް އަދި ވަނީ ސާފުނުވެފައެވެ.
މަރުވިމީހުންގެ ތެރޭގައި ހިމެނެނީ މިސްރުގެ 5 މީހުންގެ އިތުރަށް، ފްރާންސުގެ 4 ފަތުރުވެރިންނާއި، ބެލްޖިއަމްގެ ފަތުރުވެރިއެކެވެ. އިތުުރު 14 މީހަަކަށް ވަނީ އެކިވަރުގެ އަނިޔާ ލިބިފައެވެ. އަނިޔާ ލިބުނު މީހުންގެ ތެރޭގައި ހިމެެނެނީ ފްރާންސުގެ 8 ފަތުރުވެރިންނާއި، ބެލްޖިއަމްގެ 6 ފަތުރުވެރިންނެވެ.
ބަހުގައި ރޯވި އަލިފާންގަނޑު ނިވާލެވުނުއިރު، މަރުވި ގިނަ މީހުންގެ ހަށިގަނޑު ވަނީ ކާކުކަން ދެނެގަނެވޭ ވަރަށް ބޮޑަށް އަނދައިފައެވެ. އަނިޔާވި މީހުންގެ އެކިތަންތައް ފިހިފައިވާއިރު، ބައެއް މީހުންގެ ތަންތަން ބިނދިފައި ވެއެވެ. އަސްވާން ޕްރޮވިންސުގެ ގަވަރުނަރު އަޝްރަފް ޢަޠިއެްޔާ ވިދާޅުވި ގޮތުގައި ހާދިސާގައި އަނިޔާވި އެންމެންނަށް މިހާރު ދަނީ ހޮސްޕިޓަލުގައި ފަރުވާދެމުންނެވެ.
ބުދަދުވަހުގެ ހާދިސާގައި ހިނގާފައި މިވަނީ ރަތްކަނޑު ކައިރީގައި އޮންނަ ސަޤަފާއިން އަލްޤުސައިރަށް ޕޮލެންޑުގެ 19 ފަތުރުވެރިނާއެކު ދަތުރުކުރިން ބަހެއް ފާއިތުވި ބުރާސްފަތި ދުވަހު ފުރޮޅާލުމުގެ ސަބަބުން ޕޮލެންޑުގެ 3 ފަތުރުވެރިން މަރުވެފައި ވަނިކޮށެވެ.
މިސްރުގެ މަގުތަކާއި ހައިވޭތަކުގައި ސަލާމަތީ ކަންކަން ދޯދިޔާވުމުގެ ސަބަބުން ހިނގާ ހާދިސާތަކުގައި ކޮންމެ އަހަރަކު އެތައް ހާސް ބަޔަކު މަރުވެއެވެ. ގިނަ ހާދިސާތައް ހިނގަނީ އާދަޔާއި ޚިލާފަށް ބާރަށް ދުއްވުމާއި، މަގުތަކުގެ ހާލަތު ގޯސްވުމާއި، ޓްރެފިކް ގަވާއިދުތައް ތަންފީޒުނުކުރެވުމުގެ ސަބަބުންނެވެ.
ތަފާސް ހިސާބުތައް ލިބެން ހުރި އެންމެ ފަހުގެ އަހަރު ކަމުގައިވާ 2019 ވަނަ އަހަރު 10 ހާހަށްވުރެ ގިނަ އެކްސިޑެންޓު ހިނގައި 3480 މީހުން މަރުވެފައި ވެއެވެ.
