(5 އޭޕްރީލް 2022 ގައި ޝާއިއުކުރި ބަޔާ ގުޅޭ)
އޭނާ ވިސްނަމުން ދިޔައީ ބާޒާރު މަތިންދާ މައިމަގު ނިމޭ ހިސާބުން އޭނާއަށް އެންމެ ފުރަތަމަ ދިމާވާ ހޮޓަލެއްގައި ހުރުމަށެވެ. މާދުރަށް ނުދެވެނީސް އޭނާއަށް ހޮޓަލެއް ފެނިއްޖެއެވެ. އެއީ " ޕާރކްމިޔޫ ހޮޓެލް "އެވެ. އިންދަރްޖީތު އެހޮޓަލުގެ ދޮރުމަތީގައި ޖީޕް މަޑުކޮށްލާފައި އެތެރެއަށް ނަޒަރު ހިންގާލިއެވެ. ހޮޓަލުގެ ދޮރުމަތީގައި ރީތި ވިނަގަނޑު ހީވަނީ ފެހިކުލައިގެ ދޫލައެއް ފަތުރާލާފައި އޮތްހެންނެވެ. އެތާނގައި ތަންތަންކޮޅުގައި ޖަހާފައިވާ ކުޑަތަކުގެ ދަށުގައި ޔޫރަޕްގެ އަންހެން ކުދިންތައް ކޮޕީބޯން ތިއްބެވެ. ބައެއް މީހުން މެގަޒިން ފަދަ ތަކެތި ބަލަންވެސް ތިއްބެވެ. އެމީހުން ފެނުމުން މިއީ ރަނގަޅު ހޮޓަލަކަށް ވެދާނެއޭ ހީކޮށްފައި އިންދަރްޖީތު ޖީޕުން ފައިބަން ޚިޔާލުކޮށްލިއެވެ. ހަމަ އެތަންވަޅު އިސްކޮޅުން ކުރުވަރެއްގެ މީހަކު އެޖީޕްގެ އަނެއް ފަރާތުން ދޮރު ހުޅުވާލައިފައި ޖީޕަށް އަރައި ދުއްވާމީހާ އިންނަ ސީޓް (މިހާރު އިންދަރްޖީތު އިން ސީޓް) އާ ޖެހިގެން ކުރިމަތީގައި ހުރި އަނެއް ސީޓްގައި އިށީނދެއްޖެއެވެ. އެނާ ބަލާބެލުމުން ވަރަށް ނުލަފާ ވައްތަރުޖަހާ އަދި ކީއްތޯ؟ ހިފާމީހަކާ ވައްތަރު މީހެކެވެ. ޖީޕަށް އެރިއިރު އޭނާ އަތްވަނީ ފަޓްލޫން ޖީބުތެރޭގައެވެ. އިންދަރްޖީތު ހިމޭންކަމާއިއެކު އޭނާއާ ދިމާއަށް ބަލަންފެށީމެވެ. އޭނާ ޖީބުން ފިސްތޯލައެއް ނަގާފައި އިންދަރްޖީތާއި ދިމާއަށް ދިއްކޮލުމާއެކު ބުންޏެވެ.
"އަހަރެން ބުނާ ތަނަކަށް ހިނގާ.. ހިމޭންކަމާއެކު އެހެންނޫނީ ...... "
އިންދަރްޖީތު އެއްވެސް އެއްޗެއް ނުބުނެ ޖީޕް ދުއްވާ ލައިފިއެވެ. އޭނާ މިތަނަށް އައިކަމުގެ ޚަބަރު މީހާ އަވަހަށް އެއްވެސް މީހަކަށް ލިބިދާނެއޭ، އޭނާގެ ހިތަށް ހުވަފެނެއްގައިވެސް އަރާފައެއް ނެތެވެ. ޚާއްޞަކޮށް މިކަހަލަ ދެކޮޅުވެރި ޢަމަލެއް ހިންގާނޭ މީހަކަށް އޭނާގެ ޚަބަރު މިހާ އަވަހަށް ލިބުނުކަން އެއީ އޭނާއަށް ވަރަށް ބޮޑަށް ހައިރާންވާން ޖެހުނުކަމެކެވެ. ނަމަވެސް މީހާރު ދެން ކުރާނެކަމެއް ނެތެވެ. އޭނާ މަޖްބޫރުވެފައެވެ. މިއީ އޭނާއަށް ރަނގަޅަށް ނޭނގޭ ތަނެކެވެ. އެއްގޮތަކަށްވެސް ނޭނގޭ މާޙައުލެކެވެ. ހަވީރު ހައެއް ޖަހާ ބައިގަޑިވަނީއެވެ. އަދި އެންމެ ހައެއްކަ އިންޗި ދުރުގައި އެނާއާ ދިމާއަށް ދިއްކޮށްފައިވާ ފިސްތޯލައެކެވެ. މިވަގުތު އޭނާ ވަނީ އޭނާ އެއްގޮތަކަށް ވެސް ނުދަންނަ މީހެއްގެ އަތް ދަށުގައެވެ. ކުރާނެ ކަމެއް ނެތިފައެވެ. އިންދަރްޖީތު ހަމަގަސްދުގައި ޖީޕްދުއްވަމުން ދިޔައީ ވަރަށް މަޑުމަޑުންނެވެ. ނަމަވެސް އޭނާ ކައިރިގައި އިންމީހާ އަންގައިގެން ދެ ފަހަރެއްގެ މަތިން ޖީޕްގެ ދުވެލި ބާރުކުރަން ޖެހުނެވެ.
އޭމިސްޓަރ!" އެމީހާގެ ފިސްތޯލަ މިހާރުވެސް ވަނީ އިންދަރްޖީތު ދިމާއަށެވެ. އެއްއަތުން ފިސްތޯލައިގައި ހިފައިގެން އިންއިރު އަނެއް އަތްވަނީ ކައިރިންދާ އެހެން މީހަކަށް އެ ފިސްތޯލަ ނުފެންނާނޭ ގޮތަށް އޭގެ މަތީގައި ބާއްވާފައެވެ. "ކަލޭ އަންނަ ޚަބަރު އަހަރެމެންނަށް މާކުރީއްސުރެ ލިބިފައި ނަމަވެސް ކަލޭ މިހާ އަވަހަށް ބޮމްބޭއިން މިތަނަށް އަތުވެދާނެކަމެއް އަހަރުމެންނަކަށް އެނގިފައެއް ނުވޭ"
އިންދަރްޖީތަށް އެވަގުތު ކުރަންވީ ކީއްކަމެއް ނުވަތަ ނުކުރަންވީ ކީއްކަމެއް ވެސް ނުވިސްނެއެވެ. އަދި އެމީހާއާ ދައްކާނީ ކޮންވާހަކައެއް ކަމެއް ވެސް ނޭނގެއެވެ. އެހެން ކަމުން އެއްވެސް އެއްޗެއް ނުބުނެ ހިމޭނުން އިނީއެވެ. ނަމަވެސް އެވަގުތު އޭނާގެ ހިތުގައި ހިނގަމުންދާ ފިކުރަކީ މި މީހާއަކީ ކާކުގެ ފަރާތުން ނުވަތަ ކޮން ބައެއްގެ ފަރާތުން އައިސް އުޅޭ މީހެއް ބާވައޭ ހީކޮށް ކުރެވޭ ފިކުރުތަކެވެ. "ފަހަރެއްގައި މި މީހަކީ ސީމާއާ ގުޅޭ މައްސަލައާ ބެހޭ މީހެއް ބާވައެވެ. ނުވަތަ ޕެހެލްގާމްގައި ހުރި ސީ.އައި.ޑީ އޭޖެންޓާގުޅޭ މައްސަލައިގެ މީހެއް ބާވައެވެ." އޭނާގެ ހިތަށް އަރަމުން ދިޔައެވެ. އޭނާ އެފަދަ ފިކުރުތަކެއްގައި އިންދާ ފިސްތޯލަ ހިފައިގެން އިންމީހާ ޖީޕް ހުއްޓާލުމަށް އެނާއަށް އަންގައިފިއެވެ.
ޖީޕް ހުއްޓާލުމާއެކު އެމީހާ ވަރަށް އަވަސް އަވަހަށް ޖީޕުން ފުންމާލައިފިއެވެ. އަދި ޖީޕްގެ ކުރިމަތިންލާފައި އިންދަރްޖީތުއިން ފަރާތަށް އައިސްފައި ބުންޏެވެ." އޭ މިސްޓަރ ރަނގަޅަށް އަޑުއަހާ.. އަހަރެމެން މިފަހަރު މިއައީ ކަލޭގާތުގައި އެންމެ ވާހަކައެއް ބުނަން..އެވާހަކައަކީ މާދަމާ އިރު އަރަން ވާއިރަށް ކަލޭ ޕެހެލްގާމުން އެނބުރިދާށޭ..އެހެން ނޫނީ...."
"އެހެންނޫނީ ވާނީ ކީއް؟ " އިންދަރްޖީތު ވަރަށް ހަމަޖެހިލައިފައި ސުވާލު ކުރިއެވެ."އެހެންނޫނީ އެތަނަކުން އެއްވެސް މީހަކަށް އެނބުރި ނާދެވޭ ތަނަށް ފޮނުވާލެވޭނެ"
އިންދަރްޖީތު ހިނިތުންވެލިއެވެ އަދި އެއްޗެއް ނުބުނެ ހިމޭންކަމާއެކު އިނދެލުމަށްފަހު ޖީޕް ފުރަތަމަ ގިއަރަށްލަމުން އަހާލިއެވެ."އެކަމަކު އަޅެ ބުނެފާނަންތަ ... ކަލޭއަކީ ކާކު؟"
"ކަލޭގެ ބައްޕަ!"އެމީހާ ވަރަށް ބާރަށް ބުނެލިއެވެ." އަދި ޑާގަރްގެ ދަރިފުޅު" ކުއްލިއެއް ޖެހިހެން ޖީޕް ކުރިއަށް ދުއްވައިގެންފިއެވެ. އަދި އިންދަރްޖީތުގެ ސިކުނޑި ސީ.އައި.ޑީ. އޮފީހުގެ އިންފޮމޭޝަން ރޫމްގެ ތެރެއަށް ހިނގައްޖެއެވެ. އޭނާގެ ކަންފަތަށް އިވެމުންދަނީ ސީނިއަރް އޭނާއަށް އޮޅުން ފިލުވާ ދިނުމުގެ ގޮތުން ދިން މަޢުލޫމާތުތަކެވެ. ސީނިއަރްއަށް ކިޔާދިނެވެ.
"މިދުވަސްވަރު އޭނާގެނަމަކަށް ގެންގުޅެނީ ޑާގަރް.1962ގައި އިންޑިޔާއާއި ޗައިނާގެ ހަނގުރާމަ ހިނގިދުވަސްވަރު ޑާގަރް އުޅުނީ ހޮންގްކޮންގްގައި. އަފިހުން ސްމަގްލް ކުރުމުގެ ކުށުގައި ފުލުހުން ހޯދަމުން ދިޔަ ނަމަވެސް ކޮންމެވެސް އެހެން ގޮތަކުން އެތަނުން އޭނާ ފިލައިގެން ނިކުމެން ދިޔައީ ބޭރޫތަށް. ދެން އޭނާގެ އަފިހުންނާއި ޑްރަގް ސްމަގްލް ކުރުމުގެ މަރުކަޒު ހިންގީ ބޭރޫތުގައި. އެތަނުން ރޯމް އާއި ނޭޕާލްސް މެދުވެރިކޮށް ހުރިހާ އަފިހުންނަކާއި ޑްރަގެއް އެމެރިކާއަށް ފޮނުވަމުން ގެންދިޔައީ .. ވަރަށް ގިނަ ދުވަސް ވަންދެން މިގޮތަށް ބޭރޫތުގައި އޭނާގެ ސްމަގްލް ކުރުމުގެ ކަންތައްތައް ހިންގި.1968 ވަނަ އަހަރު ބޭރޫތުގައި މަރާލެވުނު މަޝްހޫރު އެކްޓެރެސްއެއް މަރާލުމުގައި ޑާގަރް ބައިވެރިވި. އެކަމަކު އެފަހަރުވެސް ފުލުހުން އޭނާ ހައްޔަރު ކުރުމުގެ ކުރިން އެތަނުންވެސް ފިލައިގެން ނިކުތީ. ނަމަވެސް އޭނާ ބައިވެރީންކުރެ ވަރަށް ގިނަ މީހުން އެފަހަރު ހައްޔަރު ކުރެވުނު. އެފަހަރު ޑާގަރްއައީ އިންޑިޔާއަށް. ދެއަހަރު ވަންދެން އިންޓަރނޭޝަނަލް ޕޮލިސް އޭނާގެ ފަހަތުން އޭނާ ހޯދަން މަސައްކަތް ކުރި. އިންޑިއާގެ ކަންކޮޅުތަކަށް ދަންދެން ބަލާހެދި. ނަމަވެސް އޭނާގެ ނިޝާނެއްވެސް ނުވި. ނަމަވެސް ދާދި މިދާކަށް ދުވަހު ކުއްލިއަކަށް އިވުނީ ޕެހެލްގާލުން އޭނާ ފެނުނު ވާހަކަ. އެތާނގައި އޭނާ އުޅެނީ ޑާގަރްގެ ނަމުގައި އަދި މިހާރު އޭނާގެ ކުރީގެ ވިޔަފާރިވެސް ފައްޓައިފިކަމަށްވޭ. އޭނާގެ ހުރިހާ ޙަރަކާތްތަކެއްގެ ފުރިހަމަ ރިޕޯޓެއްވަނީ އެންޓިކޮރަޕްޝަން އޮފިސަރ ތައްޔާރުކޮށްފައި އަދި އެރިޕޯޓް ޚާއްޞަމަގަކުން އިންޑިއާގެ މަރުކަޒީ ސަރުކާރުން ހުށަހެޅުމަށް ވަނީ ފޮނުވާފައި. ނަމަވެސް އެރިޕޯރޓް ހިފައިގެންއޮފިސަރ ދިއްލީއަށް ފޯރުމުގެ ކުރިން އޭނާވަނީ މަރާލާފައި އަދި އެގޮތުން އެރިޕޯރޓް އަހަރެމެންގެ އަތަށް ނުލިބި ވަނީ ގެއްލިފައި. މިއީ މިދިޔަ އަހަރު ހިނގިކަމެއް. މިއަހަރުގެ ފެބްރުވަރީ މަހުގެ ތެރޭގައި ބޮމްބޭގެ ސީ.އައި.ޑީގެ ޚާއްޞަ އެޖެންޓެއް ޕެހެލްގާމަށް ފޮނުވުނު. ލައްކަ ދުވަސްވަންދެން އޭނާ ވަރަށް ހިމޭންކަމާއެކު އޭނާގެ މަސައްކަތް ކުރިއަށް ގެންދިޔަ ނަމަވެސް މީގެ ދެތިން ހަތަރު ދުވަސް ކުރިން ކުއްލިއަކަށް އޭނާ ގެއްލިއްޖެ. އެހެން ގޮތަކަށް ބުނާނަމަ ބޮމްބޭއާ އޭނާއާ ދެމެދުގައިވާ ކޮމިއުނިކޭޝަން ކެނޑިއްޖެ. ނަމަވެސް އޭނާ ފޮނުވުމަށް ގެންދިޔަ މަޢުލޫމާތުތަކުން، ޑާގަރްގެ ސިފައާއި އެނޫން ވެސް ވަރަށް ގިނަ މުޙިއްމު އިންފޮމޭޝަންތައް ވަނީ ލިބިފައި."
އިންފޮމޭޝަންރޫމްގެ ސްކްރީންގައި އެވަގުތު ދައްކަމުން ދިޔަ ޑާގަރްއާއި ބެހޭ މަންޒަރުތައް އިންދަރްޖީތުގެ ހިތަށް ފެންނަމުން ދިޔައެވެ.
އޭނާގެ އިސްކޮޅަކީ ފަސްފޫޓް އަށް އިންޗިއެވެ. ބޮލުގެ އިސްތަށިގަނޑުގެ ކުލައަކީ ކަޅުކުލައެވެ. ހަނި ނިތްކުރިއެކެވެ. ވަރުގަދަ ދެބުމައެވެ. ފުން ލޮލެކެވެ. ފަތާ ނޭފަތެކެވެ. ބޮޑު ތުންފަތެކެވެ. ފުޅާ ހަށިގަނޑެކެވެ. ބަޑި ޖެހުމުގައި ވަރަށް ކުޅަދާނައެވެ. ވަޅިން ޙަމަލާދީފިނަމަ ބިރުގަންނަ ގޮތްވެއެވެ. ކަރާޓޭއާއި ޖޫޑޯއަށް މާމޮޅެއް ނޫނެވެ. ނަމަވެސް ކުޑަކޮށް އެކަންވެސް ދަނެއެވެ. ރާބޮއި އުޅެނީ ވަރަށް މަދުންނެވެ. ނަމަވެސް ބައެއް ފަހަރު އަމަލުވާ ކަހަލަ ކޮންމެވެސް ގުޅައެއް ކާލައެވެ. ލަފާކުރެވޭ ގޮތުގައި އެއީ އެލް.އެސް.ޑީ ކަހަލައެއްޗެކެވެ. އަންހެންކުދީންނާ މާބޮޑަށް ގުޅުން ބަހައްޓައެއް ނުހަދައެވެ.
(ނުނިމޭ)
