ޕާކިސްތާނުގައި ބާާއްވަން ހަމަޖެހިފައި އޮތް ސާކް (ސައުތު އޭޝިއަން އެސޭސިއޭޝަން ފޯ ރީޖަނަލް ކޯޕަރޭޝަން) ގެ އެންމެ އިސްވެރިންގެ ބައްދަލުވުން ބާއްވަން ޕާކިސްތާނު އޮތީ ތައްޔާރަަށް ކަމަށާއި، އިންޑިޔާގެ ބޮޑުވަޒީރު ނަރެންދްރަ މޯދީއަށް އެ ބައްދަލުވުމުގައި ވާޗުއަލްކޮށް ބައިވެރިވެވަޑައިގެންވިދާނެކަަމަށް ޕާކިސްތާނުގެ ޚާރިޖީ ވަޒީރު ޝާހް މަޙްމޫދު ޤުރައިޝީ ވިދާޅުވެއްޖެއެވެ.
"ޕާކިސްތާނު ދެކެނީ ސާކަކީ މުހިއްމު ފޯރަމެއް ކަމަށް. އަހަރުމެން މިތިބީ 19 ވަނަ ސާކް ސަމިޓް ބާއްވާން ތައްޔާރަށް. އަދި އެ ބައްދަލުވުމަށް ހާޒިރުވުގައި އިންޑިޔާއަށް މައްސަލައެއް އޮތްނަމަ، އެ ގައުމަށް ވާޗުއަލްކޮށް ބައިވެރިވެވިދާނެ." އިއްޔެ ނޫސްވެރިންނާ ބައްދަލުކުރައްވަމުން ޤުރައިޝީ ވިދާޅުވިއެވެ.
އޭނާ ފާހަގަކުރެއްވި ގޮތުގައި އިންޑިޔާ ވަނީ ގޮތްދޫނުކުރުމާއި، އިސްލާމްއާބާދުގައި ބާއްވަން ހަމަޖެހިފައި އޮތް އެންމެ މަތީ ވެރިންގެ ބައްދަލުވުމަށް ހާޒިރުވުމަށް ދެކޮޅުހަދަމުން ދިއުމުގެ ސަބަބުން ސާކަކީ މަސައްކަތް ހުއްޓިފައިވާ ޖަމާއަތަކަށް ހަދާފައެވެ.
"19 ވަނަ ސާކް ސަމިޓަށް ދީފައި އޮތްް ދައުވަތު އަހަރެން ތަކުރާރުކުރަން. އިސްލާމްއާބާދަށް އަންނަން އިންޑިޔާ ތައްޔާރު ނޫންނަަމަ، އެގައުމަށް ވާޗުއަލްކޮށް ބައިވެރިވެވިދާނެ. އެހެނަސް އެހެން ގައުމުތަކުން ސަމިޓަށް ހާޒިރުވުމަށް އިންޑިޔާ ހުރަސްއަޅައިގެން ނުވާނެ." ޕާކިސްތާނުގެ ޚާރިޖީ ވަޒީރު އިތުރަށް ވިދާޅުވިއެވެ.
ދެކުނު އޭޝިޔާގެ އަށް ގައުމުކަމަށްވާ އަފްޣާނިސްތާން، ބަންގްލާދޭޝް، ބޫޓާން، އިންޑިޔާ، ދިވެހިރާއްޖެ، ނޭޕާލް، ޕާކިސްތާން އަދި ސްރީލަންކާ ބައިވެރިވާ ސަރަހައްދީ ޖަމާއަތް، ސާކުގެ މަސައްކަތްތައް ވަނީ 2016 އަހަރުން ފެށިގެން ގާތްގަނޑަކަށް ހުއްޓުމަކަށް އައިސްފައެވެ. ދެ އަހަރުން އެއް އަހަރު ބާއްވަމުން އައި ސާކް ސަމިޓް އެންމެ ފަހުން އޮތީ 2014 ވަނަ އަހަރު ނޭޕާލުގައެވެ.
19 ސާކް ސަަމިޓް ބާއްވަން ނިންމާފައި އޮތީ 2016 ވަނަ އަހަރުގެ ނޮވެންބަރު މަހުގެ 15 އިން 19 އަށް ޕާކިސްތާނުގެ ވެރިރަށް އިސްލާމް އާބާދުގައެވެ. އެެހެންނަމަވެސް، އެއަހަރު ސެޕްޓެންބަރު މަހުގެ މެދުތެރޭގައި ކަޝްމީރުގެ ވަގުތީ ސަރަހައްދީ ރޮނގު ހުރަސްކޮށް ދެގައުމުން ބަދަލުކުރި ވަރުގަދަ އަސްކަރީ ހަމަލާތަކަށް ފަހު އިންޑިޔާއިން ބުނީ "މިހާރު ހާލަތު އޮތްގޮތުން" ބައްދަލުވުމަށް ހާޒިރުވުމަށް ޕާކިސްތާނަށް ދެވެން ނެތްކަމުގައެވެ.
އެ ފަހުން ފާއިތުވެ މިދިޔަ ފަސް އަހަރުވެސް އިންޑިޔާއިން ދަނީ އެބަހުގައި ހިފަހައްޓައިގެން، ބައްދަލުވުމަށް ހާޒިރުވުމަށް އިންކާރުކުރަމުންނެވެ.
ޚާރިޖީ ވަޒީރު ޤުރައިޝީ ފާހަގަކުރެއްވި ގޮތުގައި ސާކް ސަމިޓާ މެދު ގޮތް ދޫނުކުރުމުގެ ސިޔާސަތެއް އިންޑިޔާއިން ގެންގުޅުނު ނަމަވެސް ސާކްގެ ފެންވަރުގައި ކޮވިޑް-19 އާ ދެކޮަޅަށް މަސައްކަތްކުރުމުގައި އިންޑިޔާއިން ވަނީ މުހިއްމު ދައުރެއް އަދާކޮށްފައެވެ.
ޤުރައިޝީ ފާހަގަކުރެއްވި ގޮތުގައި، އިންޑިޔާވެސް ހިމެނޭހެން، ސަރަހައްދުގެ ހުރިހާ ގައުމަކާއެކު ގާތް ގުޅުމެއް ބާއްވަން ޕާކިސްތާނުން ބޭނުންވެއެވެ. އަދި ގުޅުން ރަނގަަޅު ކުރުމުގެ މަސްއޫލިއްޔަތު އޮތީ އިންޑިޔާގެ ކޮނޑުގައެވެ. އެހެންނަމަވެސް، އޭނާ ފާހަގަކުރެއްވި ގޮތުގައި، ކަޝްމީރުގެ މައްސަލަ ހައްލުކުރެވިގެން ނޫނީ، އިންޑިޔާއާއެކު ރަނގަޅު ގުޅުމެއް ނުބޭއްވޭނެއެވެ.
