މިސްރުގެ ސުވޭސް ކެނަލްގައި ހުރަހަަށް ތާށިވެ، ފާއިތުވި މާރިޗު މަހުގެ 23 އިން 29 އަށް އެ ކެނަލް ބަންދުވުމުގެ ސަބަބަށްވި ބިޔަ ކޮންޓޭނާ ބޯޓު 'އެވަރ ގިވެން' ބުދަ ދުވަހު (މި ޖުލައި މަހުގެ 7 ވަނަ ދުވަހު) ދޫކޮށްލާނެ ކަމަށް ސުވޭސް ކެނެލް އޮތޯރިޓީ (އެސްސީއޭ) އިން ބުނެފިއެވެ.
އެސްސީއޭއިން ބުނި ގޮތުގައި އެ އޮތޯރިޓީއާއި އާގުބޯޓުގެ ވެރިފަރާތާ ދެމެދު ބަދަލު ދިނުމުގެ އެެއްބަސްވުމުގެ ސޮއިކުރުމަށާއި، ބޯޓު ފުރައިގެން ދިއުން ފާހަގަކުރުމަށް ބުދަދުވަހު ރަސްމިއްޔާތެއް ބާއްވާނެއެވެ.
މިސްރުގެ ކަމާބެހޭ ފަރާތްތަކުން ވަނީ އެވަރ ގިވެން ހިފަހައްޓާފައި އޮތީ ބޯޓުގެ ވެރިފަރާތް، ޖަޕާނުގެ ޝޯއި ކިޝެން ކައިޝާ ކުންފުނިން ބަދަލުދޭން އެއްބަސްވަންދެނެވެ. މިސްރުން އެދެމުން ދިޔައީ ބޯޓު ތާށިވެފައި ހުރުމުގެ ސަބަބުން އެސްސީއޭއަށް ނުލިބި ދިޔަ އާމްދަނީއާއި، ބޯޓު ފުންކުރަން ހިނގި ޚަރަދާއި، ކެނަލް މަރާމާތުކުރަން ހިނގާނެ ޚަރަދުގެ ބަދަލު އާގުބޯޓުގެ ވެރިފަރާތުން ހޯދުމަށެވެ.
20 ހާސް ޓަނުގެ ބިޔަ ކޮންޓޭނާ ބޯޓު ކައްޗަކަށް ސުވެސް ކަނަލުގައި ތާށިވީ 23 މާރިޗު ގައި އައި ވެލީގެ ޠޫފާނެއްގެ ތެރޭގަައެވެ. އެ ބޯޓު ފުންކޮށް ކެނަލް ހުޅުވާލެވުނީ އޭގެ 6 ދުވަސް ފަހުންނެވެ. ކެނެލް އޮތޯރިޓީން ބުނާ ގޮތުގައި ކެނަލް ބަންދުވެފައި އޮތް ކޮންމެ ދުވަހަކު އެ އޮތޯރިޓީއަށް 12 މިލިއަން އެެމެރިކާ ޑޮލަރާ 15 މިލިއަނާ އެމެރިކާ ޑޮލަރާ ދެމެދުގެ އާމްދަނީއެއް ގެއްލުނެވެ. އަދި ބޯޓު ފުންކުރުމަށް ބޮޑު މަސައްކަތެއް ކުރަން ޖެހުމުގެ ސަބަބުން ކެނެލަށް ވަނީ ބޮޑެތި ގެއްލުންތަކެއް ވެފައެވެ.
ސުވޭސް ކެނަލް އޮތޯރިޓީގެ ވެރިޔާ އުސާމާ ރަބީޢު ފާއިތުވި ހަފުތާގައި ވިދާޅުވެފައިވާ ގޮތުން، މިސްރު ސަރުކާރާ ބޯޓުގެ ވެރިފަރާތުން މިހާރު ވަނީ ބަދަލު ދިނުމާ ބެހޭ އެއްބަސްވުމަކާ ހަމައަށް އައިސްފައެވެ. އަދި އެ އެއްބަސްވުން ހާމަނުކުރާ ގޮތަށް ވަނީ ހަަމަޖެހިފައެވެ.
ޚަބަރު ލިބޭ ގޮތުގައި މިސްރުން ފުރަތަމަ އެދުނީ ބަދަލުގެ ގޮތުގައި 900 މިލިއަން އެމެރިކާ ޑޮލަރު ހޯދުމަށެވެ. އެހެންނަމަވެސް، ފަހުން އެ އަދަދު ވަނީ 550 މިލިއަން ޑޮލަރަށް ކުޑަކޮށްފައެވެ.
