ބޮޑުވަޒީރު ބެންޖަމިން ނަތަންޔާހޫއަށް ފަހު އިސްރާއީލުގެ ބޮޑުވަޒީރުކަމާ ހަވާލުވި ނަފްތާލީ ބެނެޓްގެ ސަަރުކާރުގެ ޚާރިޖީ ވަޒީރު ޔައިރް ލަޕިޑް ބޭރު ގައުމަކަށް ކުރާ ފުރަތަމަ ދަތުރުގައި ޔުނައިޓެޑް އަރަބް އެމިރޭޓްސް (ޔޫއޭއީ) އަށް ދާގޮޮތަށް ހަމަޖެހިއްޖެއެވެ. މިއީ ފާއިތުވި އަހަރުގެ އޮގަސްޓު މަހުގެ ތެރޭގައި ދެގައުމުގެ ދެމެދުގައި ސިޔާސީ ގުޅުން ގާއިމުކުރި ފަހުން އިސްރާއީލުުގެ ޚާރިޖީ ވަޒީރަކު ޔޫއޭއީއަށް ކުރާ ފުރަތަމަ ދަތުރެވެ.
މި ޖޫން މަހުގެ 29 އިން 30 އަށް ލަޕިޑް ކުރާ ރަސްމީ ދަތުރުގައި ވެރިރަށްް އަބޫދާބީގައި އިސްރާއީލުގެ އެންބަސީ ހުޅުވައި، ދުބާއީގައި އިސްރާއީލުގެ ކޮންސިއުލޭޓެއް ހުޅުވުމަށް ވަނީ ހަމަޖެހިފައެވެ.
"އިސްރާއީލާ ޔޫއޭއީއާ ދެމެދު އޮތް ގުޅުމަކީ މުހިއްމު ގުޅުމެއް. އެ ގުޅުމުގެ މޭވާގެ ފޮނިކަން ލިބޭނީ ހަމައެކަނި ދެގައުގެ ރައްޔިތުންނަކަށް ނޫން. މުޅި މެދުއިރުމައްޗަށް." ޚާރިޖީ ވަޒީރުގެ ދަތުރުގެ ވާހަކަ ހާމަކުރަން އިސްރާއީލުގެ ފޮރިން މިނިސްޓްރީން ނެރުނު ބަޔާނުގައި ވެއެވެ.
ކުރިން އިސްރާއީލާ ގުޅުން ގާއިމުކޮށްފައިވާ އަރަބި ހަަމައެކަނީ ދެގައުމު ކަމަށްވާ މިސްރާއި ޖޯޑަން (އުރްދުން) އިން އިސްރާއީލާއި ގުޅުން ގާއިމުތާ އަހަރުތަކެއް ފަހުން ފާއިތުވި އަހަރު 4 އަރަބި ގައުމަކުން ވަނީ އިސްރާއީލާ ގުޅުން ގާއިމުކޮށްފައެވެ. އޭގެ ތެރޭގައި ޔޫއޭއީގެ އިތުރަށް ހިމެނެނީ، ބަހްރޭން، މޮރޮކޯ (މަޣްރިބު) އަދި ސޫދާނެވެ.
މި ހަތަރު ގައުމުގެ ތެެރޭންވެސް ޔޫއޭއީ ފާހަގަކުރެވިފައި ވަނީ އިސްރާއީލާއި ސިޔާސީ އަދި އިގްތިސާދީ ގުޅުން ވަރުގަަދަކުރުމަށް މަސައްކަތްކުރާ ގައުމެއްގެ ގޮތުގައެވެ. ޣައްޒާއަށް އިސްރާއީލުން އުދުވާނީ ހަމަލާ ދެމުން ދިޔައިރުވެސް ޔޫއޭއީގެ ވާހަކަ ހުރީ އިސްރާއީލަށް ތާއީދުކޮށް، ހަމާސް ކުށްވެރިކުރާ ރާގަކަށެވެ. ޔޫއޭއީގެ އިއްތިހާދު އެއާވޭޒްއިން ޓެލްއަވީވަށް ދަތުރު ފަށާފައިވާއިރު، ޔޫއޭއީގެ ވިޔަފާރިވެރިންގެ ވަފުދެއް ވަނީ އިސްރާއީލަށް ޒިޔާރަތްކޮށްފައެވެ.
އިސްރާއީލާއި ޔޫއޭއީން ވަނީ ދެ ގައުުގެ ރައްޔިތުންނަށް ވިސާ ނެތި އެެއް ގައުމުން އަނެއް ގައުމަށް ދަތުރުކުރެވޭ ގޮތަށް އެއްބަސްވެފައެެވެ. އެހެން ކަމުން މެދުއިރުމަތީގެ ވިޔަފާރީގެ މައި މަރުކަަޒު، ދުބާއީއަށް ޒިޔާރަތްކުރާ އިސްރާއީލު މީހުންގެ އަދަދު ދަނީ ދުވަހެއް ދުވަހަކަށް އިތުރުވަމުންނެވެ.
އިސްރާއީލުގެ އައި24ނިއުސް ޗެނެލުން ބުނެފައިވަނީ ދުބާއީ މީޑިޔާ ސިޓީގައި އެ ޗެނެލުގެ ބިއުރޯއެއް ހުޅުވައި 24 ގަޑިއިރު ދުބާއީން ދުރަށް ފޮނުވުގެ ހުއްދަ އެ ޗެނެލަށް ލިބިފައިވާ ކަމުގައެވެ.
