އެމެރިކާގެ މިނެސޯޓާ ސްޓޭޓުގެ މިނިއާޕޮލިސްގެ ކުރީގެ ފުލުސް އޮފިސަރު ޑެރެކް ޝޯވިންގެ މައްޗަށް ގަސްތުގައި މީހަކު މަރާލުމާއި މީހަކު މަރުވާފަދަ އަމަލެއް ހިންގުމުގެ ކުށް ސާބިތުވެއްޖެއެވެ. އެއީ ކަޅު ނަސްލުގެ މީހެއް ކަމަށްވާ ޖޯޖް ފްލޮއިޑްގެ ކަރުގައި ނުވަ މިނެޓް ވަންދެން ކަކޫ އަޅައި ފިއްތައިގެން އޮތުމުގެ ސަބަބުން އޭނާ މަރުވި މައްސަލައިގައެވެ.
ފްލޮއިޑް މަރާލި ހާދިސާ ފެންނަ ވީޑިއޯ މީސް މީޑިޔާގައި އާއްމުވުމާ ގުޅިގެން އެމެރިކާގެ ފުލުހުން ގެންގުޅޭ ނަސްލީ އިމްތިޔާޒާ ދެކޮޅަށް މުޅި އެމެރިިކާގައި ވަރުގަދަ މުޒާހަރާތަކެއް ފެތުރިގެން ދިޔައެވެ. އަދި ފުލުހުންގެ ގާނޫނަށް ބޮޑެތި ބަދަލުތަކެއް ގެންނަން ގޮވާލާ އަޑުތައް އިތުރުވެގެން ދިޔައެވެ.
މިނެސޯޓާގެ ހެނެޕިން ކައުންޓީ ޑިސްޓްރިކް ކޯޓުގެ 12 ފަނޑިޔާރުންގެ އިއްތިފާގުން އިއްވި ހުކުމުގައި ވާގޮތުން ފާއިތުވި އަހަރުގެ މޭ މަހުގެ 25 ވަނަ ދުވަހު މިނިއާޕޮލިސްގައި އުމުރުން 45 އަހަރުގެ ޑެރެކް ޝޯވިން ކަޅު ނަސްލުގެ ޖޯޖް ފްލޮއިޑް ބިންމަތީގައި ބަންޑުން ބާއްވާއި އޭނާގެ ކަރުގައި ކަކޫ އަޅައިގެން 9 މިނެޓް 29 ސިކުންތަށް އޮތުމުގެ ސަބަބުން ފްލޮއިޑް މަރުވެފައިވާތީ އެ މައްސަލަައިގައި އޭނާގެ މައްޗަށް އުފުލި ތިން ދައުވާވެސް ސާބިތުވެއެވެ. އެއީ ގަސްތުގައި މީހަކު މަރާލުމުގެ ދެވަަނަ ދަރައިޖެ ކުށުގެ ދައުވާއާއި، ގަސްތުގައި މީހަކު މަރާލުމުގެ ތިންވަނަ ދަރަޖައިގެ ކުށުގެ ދައުވާއާއި، މީހަކު މަރުވާފަދަ އަމަލެއް ހިންގުމުގެ ދެވަނަ ދަރަޖައިގެ ކުށުގެ ދައުވާއެވެ.
ޝޯވިންގެ މައްޗަށް ހިންގި ޝަރީއަތް 3 ހަފުތާއަށް ދެމިގެން ގޮސްފައިވާއިރު، ކޯޓުން ވަނީ މި މައްސަލައިގައި 45 ހެކިންގެ ހެކިބަސް ނަގާފައެވެ. ހެކިންގެ ތެރޭގައި އެ ހާދިސާގެ ވަގުތު އެތަނުގައި، ތިބި މީހުންނާއި، ފުލުސް އޮފިސަރުންނާއި، ބޭސްވެރިކަމުގެ މާހިރުން ހިމެެނެއެވެ.
ވައިޓް ހައުސްއިން ބުނި ގޮތުގައި މި ހުކުމާ ގުޅިގެން ރައީސު ޖޯ ބައިޑަން ވަނީ ފްލޮއިޑްގެ އާއިލާއަށް ގުޅުއްވަައި ހުކުމާމެދު ހިތްޕުޅުހަމަޖެހުން ފާޅުކުރައްވާފައެވެ. އަދި ބައިޑަން ވަނީ ކުރިން މި އެޅުނީ މަދުން ނޫނީ ނުފެންނަ ފަދަ ފިޔަވަޅެއްކަން ފާހަގަކުރައްވާފައެވެ.
މިނެސޯޓާގެ ގާނޫނުގައި ވާގޮތުން ޝޯވިންގެ މައްޗަށް ސާބިތުވި ފުރަތަމަ ކުށަށް ގިނަވެގެން 40 އަހަރު، ދެވަނަ ކުށަށް ގިނަވެގެން 25 އަހަރު އަދި ތިންވަނަ ކުށަށް ގިނަވެގެން 10 އަހަރުގެ ޖަލުހުކުމް އިއްވިދާނެއެވެ.
މިނެސޯޓާގެ ފިހާރައެއް ކައިރިން ފުލުހުން އުމުރުން 46 އަހަރުގެ ޖޯޖް ފްލޮއިޑް ހައްޔަރުކުރީ އެ ފިހާރައަށް އޭނާ 20 ޑޮަަލަރުގެ ވަގު ނޫޓެއް ދިންކަމަށް ބުނެ ފުލުހުންނަށް ގުޅުމުންނެވެ. ފުލުހުން އޭނާ ބިންމައްޗަށް ވައްޓާލައި އޭނާއަށް އަނިޔާކޮށްފައި ވަނީ ހައްޔަރުކޮށްގެން ކާރައަށް އަަރުވަން އުޅުމުގެ ތެރޭގައެވެ.
