މިސްރުގައި އާދީއްތަ ދުވަހު ހިނގި ރޭލު އެކްސިޑެންޓެއްގައި 11 މީހުން މަރުވެ 100 އެއްހާ މީހުން ޒަޚަމްވެއްޖެއެވެ. މި އެކްސިޑެންޓު ހިނގާފައި ވަނީ ވެރިރަށް ޤާހިރާ (ކައިރޯ) އިން މަންސޫރާއަށް ދަތުރުކުރަމުން ދިޔަ ރޭލެއް، ޤަހިރާގެ އުތުރުން 40 ކިލޯމީޓަރު ދުރުގައި އޮންނަ ޠޫޚް އަވަށާ ހަމަވެފައި ވަނިކޮށް، އޭގެ 4 ބައި ދަނގަޑުން ނައްޓާލައި ފުރޮޅާލައިގެންނެވެ.
މިހާދިސާއާ ގުޅިގެން ރޭލްވޭ އޮތޯރިޓީގެ ވެރިޔާ އަޝްރަފް ރަސްލާން އިސްތިއުފާ ދެއްވާފައިވާ ކަމަށްވެސް މިސްރުގެ ޚަބަރު ފަތުރާ ވަސީލަތްތަކުން ބުނެފައި ވެއެެވެ.
އިއްޔެ މެންދުރު 1:54 (ރާއްޖޭ ގަޑިން ހަވީރު 4:54) ގައި ހިނގި ހާދިސާއަށް ފަހު ޓްރާންސްޕޯޓް މިނިސްޓަރު ކާމިލު އަލްވަޒީރު އިސްތިއުފާ ދެއްވުމަށް ގޮވާލާ އަޑުތައްވެސް ވަނީ ގަދަވެފައެވެ. އެހެންނަމަވެސް، ޒަމާންވެ ބާވެފައިވާ ރޭލްވޭ ނިޒާމު ޒަމާނީކުރެއްވުމަށް މަސައްކަތްޕުޅު ކުރައްވާނެކަމަށް ވިދާޅުވެ، އޭނާ ވަނީ އިސްތިއުފާ ދެއްވުމަށް ދެކޮޅުހައްދަވާފައެވެ.
މިސްރުގެ ޚަބަރުފަތުރާ ބައެއް ވަސީލަތްތަކުން އިއްޔެގެ އެކްސިޑެންޓުގައި 16 މީހުން މަރުވިކަަމަށް ބުނެފައިވާއިރު، ހާދިސާގެ އިބްތިދާއީ ތަހުގީގުން އެނގުނު ގޮތުގައި ރޭލު ފުރޮޅާލާފައި ވަނީ ރޭލު ދަގަނޑު މަރާމާތުކުރުމުގެ މަސައްކަތް ހިނގާ ސަރަހައްދެއްގަ މާ ބާރު ދުވެލީގައި ދިއުމުގެ ސަބަބުންނެވެ. ގަޑިއަކު 30 ކިލޯމީޓަރަށްވުރެ މަޑުން ދުއްވަން ޖެހޭ އެ ސަރަހައްދުގައި ރޭލު ދުއްވާފައި ވަނީ ގަޑިއަކު 120 ކިލޯމީޓަރަށެވެ. މިކަމާ ގުޅިގެން ރޭލުގެ ޑްރައިވަރާއި އެ ސަރަހައްދުގައި މަސައްކަތްކުރާ ރޭލްވޭގެ 8 މުވައްޒަފަކު ވަނީ ހައްޔަރުކޮށްފައެވެ.
މިއީ ފާއިތުވި ތިން މަހުގެ ތެރޭގައި މިސްރުގައި ހިނގި ރޭލުގެ ތިންވަނަ ހާދިސާއެވެ. މި އެޕްރީލް މަހުގެ 15 ވަނަ ދުވަހު މިންޔާ ސިޓީ ކައިރީގައި ރޭލެއްގެ ދެބައި ދަގަނޑުން ނައްޓާލުމުގެ ސަބަބުން 15 މީހަކު ޒަޚަމްވެފައި ވެއެެވެ. އަދި މާރިޗު މަހުގެ 16 ވަނަ ދުވަހު ސޯހާޖް ޕްރޮވިންސުގައި ދެ ރޭލެއް ޖެހި ހިނގި އެކްސިޑެންޓުގައި 32 މީހުން މަރުވެ، 165 މީހުން ޒަަޚަމްވެފައި ވެއެެވެ.
