އިނިގިރޭސިވިލާތުގެ ލަންޑަނަށް ދިރިއުޅުން ބަދަލު ކުރައްވާފައިވާ ކުރީގެ ނައިބު ރައީސް ޑރ މުޙަންމަދު ޖަމީލް އަޙްމަދު އެނބުރި ޕީޕީއެމްއާ ގުޅިވަޑައިގަތުމަށް ހުޅުހެންވޭރު ދާއިރާގެ މެމްބަރު ރީކޯ މޫސާ މަނިކު ދައުވަތު ދެއްވައިފިއެވެ.
ޕީޕީއެމުން ބޭއްވި ކަނބަލުންގެ މަހާސިންތާގައި ވާހަކަ ދައްކަވަމުން މޫސަގެ ދައުވަތު ޑރ ޖަމީލަށް ދެއްވަމުން ވިދާޅުވީ ޑރ ޖަމީލަކީ ޕީޕީއެމް ކުރިއަރުވަން ވަރަށްގިނަ މަސައްކަތްތަކެއް ކުރެއްވި އެޕާޓީއަށް މުހިންމު ބޭފުޅެއް ކަމަށެވެ. އަދި ނައިބު ރައީސް ކަމުގައި ހުންނަވައިގެން ކުރިމަތިވެވަޑައިގެންނެވި ކަންތަކާ ލަދު ގަންނަން ނުޖެހޭ ކަމަށާއި އެނބުރި ރާއްޖެ ވަޑައިގެން ޕީޕީއެމްގެ މަސައްކަތަށް ނުކުމެވަޑައިގަތުން އެދޭ ކަމަށް މޫސަ ވިދާޅުވިއެވެ.
މޫސަ ވިދާޅުވި ގޮތުގައި ނައިބު ރައީސް ކަމުން ވަކިކުރެއްވުމާއެކު ޑރ ޖަމީލް ލަންޑަނަށް ދިރިއުޅުއްވުން ބަދަލު ކުރެއްވުމަށް ފަހު ކުރީގެ ރައީސް މުޙަންމަދު ނަޝީދާ ގުޅިވަޑައިގަތުމުން ޑރ ޖަމީލަށް ނަޝީދު ދެއްވީ ލަނޑެކެވެ. މޫސަ ވިދާޅުވީ ނަޝީދު ޖަމީލަށް ކާންދެއްވީ "ރަންއިލޮށިން ކަދުރު" ކަމަށެވެ.
އިދިކޮޅު އެމްޔޫއޯ ހަދައިގެން އުޅުނު ބޭފުޅުންގެ ތެރެއިން ރާއްޖޭގެ ވެރިކަން ކުރައްވާނެ ކަމަށް ވިދާޅުވި ކޮންމެ ބޭފުޅެއްގެ ގައިގައި ނަޝީދު "ހައްދު ޖެއްސެއްވި" ކަމަށާއި ޑރ ޖަމީލަށްވެސް ނަޝީދު "ވަރަށްގިނަ ދަޅަތައް" ދައްކަވައި އެންމެ ފަހުން މަގާމު ދެއްވީ އެހެން ބޭފުޅަކަށް ކަމަށްވެސް މޫސަ ވިދާޅުވިއެވެ.
ޑރ ޖަމީލަކީ ރައީސް ޔާމީންގެ ފުރަތަމަ ނައިބު ރައީސެވެ. ނަމަވެސް ދައުރުގެ ވަކި ހިސާބަކުން ޑރ ޖަމީލްގެ މައްޗަށް ރައްޔިތުންގެ މަޖިލީހުން ވަނީ އިތުބާރު ނެތްކަމުގެ ވޯޓެއް ނަގައި މަގާމުން ދުރުކުރައްވާފައެވެ. މަގާމުން ދުރުކުރެއްވުމުގެ ކުރިން ޑރ ޖަމީލް ވަނީ ރާއްޖެ ދޫކުރައްވައި އަވައްޓެރި ސްރީލަންކާއަށް ވަޑައިގެން، އެއަށް ފަހު ލަންކާއިން ލަންޑަނަށް ވަޑައިގެންފައެވެ.
