އިރުމަތީ އެފްރިކާގެ ގައުމެއް ކަމަށްވާ ޓެންޒޭނިޔާގެ ނާއިބު ރައީސުކަމުގެ މަގާމުގައި ހުންނެވި ސާމިޔާ ސުލޫހޫ ޙަސަން ރައީސުކަމުގެ ހުވައި އެގައުުމުގެ ރައީސުކަމުގެ ހުވައި މިއަދު ކުރައްވައިފިއެވެ. އޭނާ ރައީސުކަމުގެ މަގާމާ ހަވާލުވެވަޑައިގަތީ އެގައުމުގެ ރައީސުކަމުގެ މަގާމުގައި ހުންނެވި ޖޯން މަގުފުލީ ބުދަ ދުވަހު އަވަހާރަވުމާ ގުޅިގެންނެވެ.
ބުރުގާ އަޅުއްވައިގެން ހުންނެވި އުމުރުފުޅުން 61 އަހަރުގެ ސާމިޔާ ކީރިތި ޤުރްއާން ހިއްޕަވައިގެން ހުންނަވައިގެން ހުވައިކުރެއްވީ ޓެންޒޭނިޔާގެ އެންމެ ބޮޑު ރަށް ދާރުއްސަލާމްގައި ހުންނަ ސްޓޭޓް ހައުސްގައި ޗީފް ޖަސްޓިސް އިބްރާހީމް ހަމީސް ޖުމާގެ ކުރިފުޅުމަތީގައެވެ. މިއާއެކު ސާމިޔާ ސަލޫހޫ ޙަސަން ވެވަޑައިގެންފައި ވަނީ އެފްރިކާގެ ގައުމެއްގެ ރައީސުކަން ކުރައްވާ ފުރަތަމަ މުސްލިމް އަންހެނާ ކަމުގައެވެ.
ޓެންޒޭނިޔާގެ އާއްމުންގެ މެދުގައި 'މާމާ ސާމިޔާ' ގެ ނަމުން މަޝްހޫރުވެވަޑައިގެންފައިވާ ސާމިޔާއަކީ އެގައުމުގެ ގިނަ ބައެއްގެ އިހުތިރާމު ހޯއްދަވާފައިވާ ބޭފުޅެކެވެ.
"މިއަދަކީ އަހަރެންނަށް ހެޔޮ ދުވަހެއް ނޫން. އަަހަރެން ތިޔަބައިމީހުންނާ މި މުޚާޠަބުކުރަނީ ހިތް ޒަޚަމްވެފައިވާ ހާލުގައި ކަމަށް ވާތީ." މަގާމުގެ ހުވައިކުރެއްވުމަށް ފަހު ރައްޔިތުންނާ މުޚާޠަބުކުރައްވަމުން ރައީސާ ސާމިޔާ ވިދާޅުވިއެވެ.
އޭނާ މިހެން ވިދާޅުވެފައި މިވަނީ ތިން ހަފުތާއެއްހާ ދުވަހު އާއްމުންނަށް ފެނިވަޑައިނުގެން ހުންނެވުމަށް ފަހު ރައީސު ޖޯން މަގުފުލީ އަވާހަރަވުމާ ގުޅިގެން އާއްމުންގެ މެދުގައި ނުތަނަވަސްކަން އުފެދިފައިވާ ވަގުތެއްގައެވެ. އަދި މަގުފުލީ އަވަހާރަވީ ކޮވިޑް-19 ގައި ކަމުގެ އަޑުތައް ފެތުރިފައިވާ ވަގުތެއްގައެވެ.
ޓެންޒޭނިޔާގެ ގާނޫނު އަސާސީގައިވާ ގޮތުން ރައީސާ ސާމިޔާ، އަވަހާރަވީ ރައީސު މަގުފުލީގެ ރިޔާސީ ދައުރުގެ ބާކީ އޮތްބައި ފުރިހަމަ ކުރައްވާނެއެވެ. މަގުފުލީ 5 އަހަރުގެ ރިޔާސީ ދެވަނަ ދައުރަކަށް ހުވައިކުރެއްވީ ފާއިތުވި އޮކްޓޯބަރު މަހުގައެވެ.
ސާމިޔާ ސުލޫހޫ ޙަސަން އުފަންވެވަޑައިގަތީ 1960 ވަނަ އަހަރު ޒެންޒިބާރު (ޒެންޖިބާރު) ގައެެވެ. ޒެންޒިބާރަކީ ޓެންޒޭނިޔާގެ ބައެއްގެ ގޮތުގައި އޮންނަ ދާޚިލީ މިިނިވަންކަން ލިބިފައިވާ ޖަޒީރާއެކެވެ. ޒެންޒިބާރުގެ އާބާދީގެ %98 އަކީ މުސްލިމުންނެވެ.
1977 ވަނަ އަހަރު ސާނަވީ ތައުލީމު ނިންމެވުމަށް ފަހު ޓެންޒޭނިޔާގެ މިނިސްޓްރީ އޮފް ޕްލޭނިންގް އެންޑް ޑިވެލޮޕްމަންޓުގައި ވަޒީފާ އަދާކުރައްވަން ފެށްޓެވިއެެވެ. އަދި ވަޒީފާގައި އުޅުއްވަމުން ކުރު ކޯސްތައް ހައްދަވައިގެން ތައުލީމީ ފެންވަރު މަތިކުރެއްވުމަށް ފަހު އިންސްޓިޓިއުޓް އޮފް ޑިވެލޮޕްމަންޓް މެނޭޖެމަންޓުން ޕަބްލިކް އެޑްމިިނިސްޓްރޭޝަންގެ ދާއިރާއިން ޑިޕްލޮމާ ހެއްދެވިއެެެވެ. އޭނާ 1994 ވަނަ އަހަރު މާސްޓާސް ޑިގްރީ ހައްދަވާފައި ވަނީ ސަދަން ނިއު ހެމްޕްޝަޔާ ޔުނިވަސިޓީންނެވެ.
2000 ވަނަ އަހަރު ސިޔާސީ ދާއިރާއަށް ނުކުމެވަޑައިގަތް ސާމިޔާ، 2010 ވަނަ އަހަރު ޓެންޒޭނިޔާގެ ގާނޫނުހަދާ މަޖިލީހަށް ހޮވިވަޑައިގަތެވެ. 2014 ވަނަ އަަަހަރު މިނިސްޓަރުކަން ލިބިވަޑައިގަތެވެ. އަދި 2015 ވަނަ އަހަރުގެ ރިޔާސީ އިންތިޚާބުގައި ޖޯން މަގުފުލީގެ ރަނިންގް މޭޓެއްގެ ގޮތުގައި ވާދަކުރައްވައި، ޓެންޒޭނިޔާގެ ނާއިބު ރައީސަކަށް ހޮވިވަޑައިގަތެެވެ.
