ދައުލަތުގެ ޓެކްސް ހިމެނޭ އެއްވެސް ކަމެއް ރައްޔިތުންގެ މަޖިލީހުން ފާސްކުރާނަމަ 43 މެމްބަރުންގެ ވޯޓު ލިބެންޖެހޭނެ ކަމަށް ރައްޔިތުންގެ މަޖިލީހުގެ ކުރީގެ ރައީސް އަދި ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދު ވިދާޅުވެއްޖެއެވެ.
ސަރުކާރުން ރައްޔިތުންގެ މަޖިލީހަށް ހުށަހެޅި 493 މިލިއަން ރުފިޔާގެ ސަޕްލިމެންޓްރީ ބަޖެޓް މިއަދު އޮތް ރައްޔިތުންގެ މަޖިލީހުން ފާސްކުރުމުން ޝާހިދު ކުރެއްވި ޓްވީޓެއްގައި ވިދާޅުވީ ސަޕްލިމެންޓްރީ ބަޖެޓަށް މިއަދު ސަރުކާރަށް ލިބުނީވެސް 38 ވޯޓު ކަމަށެވެ.
"މަޖިލިސް އަޣްލަބިއްޔަތުން، 43 އިން ނޫނީ ޓެކްސް އެއް ހިމެނޭ ކަމެއް މަޖިލިސްއިން ފާސްނުކުރެވޭނެ، ސަޕްލިމެންޓްރީ ބަޖެޓަށް ސަރުކާރަށް ލިބުނީ 38 ވޯޓު" ޝާހިދު ވިދާޅުވެފައި ވެއެވެ.
ޝާހިދު މިހެން ވިދާޅުވިއިރު މިއަދު ފާސްކުރި ސަޕްލިމެންޓްރީ ބަޖެޓުގައި ޓެކްސްއާބެހޭ ކަމެއްވެސް ހިމެނެއެވެ. ފިނޭންސް މިނިސްޓަރ މުނައްވަރު ހުށަހެޅުއްވި ބަޖެޓުގައި ބަޔެއް ޤާނޫނު ތަކަށް ބަދަލު ގެނައުމަށް ވެސް ބަޖެޓުގައި ވަނީ ހިމަނާފައެވެ. އެގޮތުން ރެވެނިއު ސްޓޭމްޕްގެ ގާނޫނާއި ޓެކްސްއާބެހޭ ބަޔެއް ގާނޫނު ތަކަށް ބަދަލު ގެނެސްގެންވެސް 268 މިލިއަން ރުފިޔާ އާންމުދަނީއެއް ހޯދުމަށްވެސް ބަޖެޓުގައި ވެއެވެ.
މިއަދު ފާސްކުރި ސަޕްލިމެންޓްރީ ބަޖެޓް ފާސްކުރުމަށް ނެގި ވޯޓަކީ ޣައިރު ގާނޫނީ ވޯޓެއް ކަމަށްވެސް އިދިކޮޅު ޕާޓީ ތަކުން މިއަދު ބޭއްވި ނޫސްވެރިންގެ ބައްދަލުވުމެއްގައި ވަނީ ބުނެފައެވެ.
