ރައްޔިތުންގެ މަޖިލީހަށް ސަރުކާރުން ހުށަހެޅި 493 މިލިއަން ރުފިޔާގެ ސަޕްލިމެންޓްރީ ބަޖެޓް ރައްޔިތުންގެ މަޖިލީހުގެ ބަޖެޓް ކޮމިޓީން ފާސްކޮށްފިއެވެ.
ދައުލަތުގެ ފަރާތުން ފިނޭންސް މިނިސްޓަރ އަޙްމަދު މުނައްވަރު ރައްޔިތުންގެ މަޖިލީހަށް ހުށަހެޅުއްވި ސަޕްލިމެންޓްރީ ބަޖެޓް އަމާޒު އެންމެ ބޮޑަށް ހިފާފައި ވަނީ ރައްޔިތުންގެ ބޭސްފަރުވާއަށް ޚަރަދު ކުރުމަށް އެންސްޕާއަށް ދޭން ކަންޑައަޅާފައިވާ ފައިސާ އާއި ރައްޔިތުންގެ މަޖިލީހުން ގޮނޑި ހުސްވެފައިވާ ދާއިރާ ތަކުގެ ބައި އިލެކްޝަން ބޭއްވުމަށް ބޭނުންވާ ފައިސާއެވެ. މީގެއިތުރުން ކާޑެއްދޫ އެއާރޕޯޓް ހިންގުމަށް ބޭނުންވާ ފައިސާ އާއި ސްކޫލްތައް ޑިޖިޓަލައިޒް ކުރުމަށްވެސް ސަޕްލިމެންޓްރީ ބަޖެޓުގައި ވަނީ އަދަދު ޖަހާފައެވެ.
ފިނޭންސް މިނިސްޓަރ މުނައްވަރު ބަޖެޓް ހުށަހަޅުއްވަމުން ވިދާޅުވީ އެންސްޕާއަށް 330 މިލިއަން ރުފިޔާ ބޭނުންވާ ކަމަށާއި އަދި ރައްޔިތުންގެ މަޖިލީހުގެ ބައި އިލެކްޝަންތަކަށް 26 މިލިއަން ރުފިޔާ ބޭނުންވާ ކަމަށެވެ. އޭގެއިތުރުން ސްކޫލްތައް ޑިޖިޓަލައިޒް ކުރުމަށް 63 މިލިއަން ރުފިޔާގެ އަދަދެއް ބަޖެޓުގައި އޮތްއިރު ކާޑެއްދޫ އެއާރޕޯޓަށް ބަޖެޓުގައި ޖަހާފައިވާ އަދަދަކީ 40 މިލިއަން ރުފިޔާ ވަނީ ޖަހާފައެވެ. އަދި އެހެނިހެން ކަންކަމުގެ ގޮތުގައިވެސް 27 މިލިއަން ރުފިޔާގެ އަދަދެއް ފިނޭންސް މިނިސްޓަރ މަޖިލީހަށް ހުށަހެޅުއްވި ސަޕްލިމެންޓްރީ ބަޖެޓުގައި ވަނީ ހިމަނާފައެވެ.
ސަރުކާރުން ހުށަހެޅުއްވި ސަޕްލިމެންޓްރީ ބަޖެޓްގެ ބަހުސް އިދިކޮޅު ޕާޓީ ތަކުގެ މެމްބަރުން ވަނީ ބޮއިކޮޓް ކުރައްވާފައެވެ. އެހެންވެ ބަހުސްގައި ބައިވެރިވީ ސަރުކާރަށް ތާއީދު ކުރައްވާ މެމްބަރުން އެކަންޏެވެ.
