އެމެރިކާގެ ރައީސު ޖޯ ބައިޑަން އެގައުމުގެ އަސްކަރީ ދެ ކޮމާންޑެއްގެ ކޮމާންޑަރުންނަށް އަންހެން ޖެނެރަލުން އައްޔަން ކުރައްވައިފިއެވެ. މިއީ އެމެރިކާގެ ތާރީޚުގައި އަސްކަރީ މަތީ މަގާމަށް އަންހެނުން އައްޔަންކުރި ދެވަނަ ފަހަރެވެ.
ޔޫއެސް އެއާފޯސް ޖެނެރަލް ޖެކްލީން ވާން އޮވޮސްޓް އައްޔަންކުރައްވާފައި ވަނީ ޓްރާންސްޕޯޓޭޝަން ކޮމާންޑް (ޔޫއެސްޓްރާންސްކޮމް) ގެ ކޮމާންޑަރަކަށެވެ. އޭނާއަކީ އެމެެރިކާގެ އަސްކަރީ އެންމެ މަތީ ދަރަޖަ، ހަތަރު ތަރީގެ ޖެނެރަލް، ގެ މަގާމާ ހަަމައަށް ދިޔަ ފުރަތަމަ އަންހެނާއެވެ.
ތިންތަރީގެ ޔޫއެސް އާމީ ޖެނެރަލް ލައުރާ ރިޗަޑްސަން އަައްޔަންކުރައްވާފައި ވަނީ ސަދަން ކޮމާން (ސައުތުކޮމް) ގެ ކޮމާންޑަރަކަށެވެ. މިއީ މެދުތެރޭ އަދި ދެކުނު އެމެރިކާއާ ގުޅޭ ކަންކަން ވިލަރެސްކުރާ ކޮމާންޑެވެ. އޭނާ މިމަގާމަށް އައްޔަންކުރުމާއެކު އޭނާވެސް ވަނީ ހަތަރު ތަރީގެ ޖެނެރަލަށް ޕްރޮމޯޓްކޮށްފައެވެ.
ބައިޑަންގެ ނިންމެވުން ސެނެޓުން ތަސްދީގުކޮށްފިނަމަ، ވާން އޮވޮސްޓާއި ރިޗަޑްސަން ވާނީ ލޯރީ ރޮބިންސަންއަށް ފަހު އެމެރިކާގެ އަސްކަރީ ކޮމާންޑަކާ ހަވާލުވާ ފުރަތަމަ ދެ އަންހެނުންނަށެވެ. 2018 ވަނަ އަހަރު ރިޓަޔާކުރުމުގެ ކުރިން އޭނާ ވަނީ އެމެރިކާގެ ނޯދަން ކޮމާންޑް (ޔޫއެސްނޯތުކޮމް) ގެ ކޮމާންޑަރުކަން ކޮށްފައެވެ.
"މި ދެބޭފުޅުންކުރެ ކޮންމެ ބޭފުޅަކުވެސް ވަނީ ވާދަނުކުރެވޭނޭ ހުނަރާއި، ތެދުވެރިކަމާއި، ގައުމަށްޓަކައި ވާޖިބު އަދާކުރުމުގެ މިސާލުދައްކަވާފައި." ދެ ޖެނެރަލުންނާ މަގާމު ހަވާލުކުރުމަށް ވައިޓް ހައުސްގައި އިއްޔެ ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސު ބައިޑަން ވިދާޅުވިއެވެ.
"މިއަދަކީ ބައިނަލް އަގުވާމީ އަންހެނުންގެ ދުވަސް. އެހެންކަމުން، ހުރަސްތައް ގިރާކުރުމުގައި މި ދެ އަންހެން ބޭފުޅުން ހޯއްދަވާފައިވާ ކާމިޔާބީއަށް ބަލައި، އެކަމުގެ އަގުވަޒަންކުރަން އަހަރުމެން ޖެހެނޭ." ބައިޑަން އިތުރަށް ވިދާާޅުވިއެވެ.
