ނިއުޒީލޭންޑުގެ ނޯތު އައިލޭންޑް އިރުން ކަނޑުގެ ސަރަަހައްދަށް އައި ބާރުގަަދަ ބިންހެލުމާ ގުޅިގެން އެ ސަރަހައްދަށް ސުނާމީގެ އިންޒާރު ނެރެފިއެވެ. ބިންހެލުން އައީ 7.3 މެގްނިޓިއުޑްގެ ބާރުމިނުގައި ކަމަށް ފުރަތަމަ ބުނި ނަމަވެސް، އަލުން މުރާޖައާ ކުރުމަށް ފަހު ބުނެފައި ވަނީ ބިން ހެލުން އައީ 6.9 މެގްނިޓިއުގެ ބާރުމިނުގައި ކަމަށެވެ.
ޔުނައިޓެޑް ސްޓޭޓްސް ޖިއޮލޮޖިކަލް ސާވޭ (ޔޫއެސްޖީސީ) އިން ބުނިގޮތުގައި ބިންެހެލުން އައިސްފައި ވަނީ ބުރާސްފަތި ދުވަހުގެރޭ ދަންވަރު 2:27 (ރާއްޖޭ ގަޑިން ބުރާސްފަތި ދުވަހުގެ އިރުއޮއްސި 6:27) ގައި ގިސްބޯން ސިޓީގެ 180 ކިލޯމީޓަރު އުތުރުން 10 ކިލޯމީޓަރު އަޑިއަށެވެ.
"ބިންހެލުމުގެ އަސާސީ މިންތަކަށް ބަލާއިރު، ބިންހެލުން އައި ތަނުން ފެށިގެން 300 ކިިލޯމީޓަރުގެ ސަރަހައްދުގައިވާ އައްސޭރިފަށުގެ ހިސާބުތަކަށް ނުރައްކާތެރި ރާޅުއެރުމަކީ އެކަށީގެންވާ ކަމެއް." ހަވާއީގައި ހުންނަ ޕެސިފިކް ސުނާމީ ވޯނިންގް ސެންޓަރުން ބުނެފައި ވެއެެވެ.
ނިއުޒީލޭންޑުގެ ނޭޝަނަލް އެމަޖެންސީ މެނޭޖްމަންޓް އެޖެންސީން ވެސް ވަނީ ނިއުޒީލޭންޑުގެ އައްސޭރިފަށުގެ ރަށްރަށަށް ސުނާމީގެ އިންޒާރު ނެރެފައެވެ.
"ނިއުޒީލޭންޑުގެ ނޯތު އައިލޭންޑްގެ އިރަށް އައި 7.3 މެގްނިޓިއުޑްގެ ބިންހެލުމަަށް ފަހު އަހަރުމެން މިވަނީ ނިއުޒީލޭންޑުގެ އައްސޭރިފަށުގެ ސަރަހައްދުތަކަށް ސުނާމީގެ އިންޒާރު ނެެރެފައެވެ." އެ އެޖެންސީން ކުރި ޓުވީޓެއްގައި ވެއެވެ. އެ އެއެޖެންސީން ވަނީ ކޭޕް ރަންއަވޭއާއި ޓޮލާގާ ބޭއާ ދެމެދުގައި އައްސޭރިފަށުގައި ތިބި މީހުން ވަގުން އުސް ހިސާބުތަކަށް ދިއުމަށާއި، ހުރިހާ ކަމެއް ހަމައަކަށް އެޅިއްޖެކަމަށް ސިވިލް ޑިފެންސުން ނައަންގަނީސް އެމީހުން އެނބުރި ނައުމަށް އަންގާފައެެވެ.
