މޯލްޑިވްސް މީޑިޔާ ކައުންސިލާއި މޯލްޑިވްސް ބްރޯޑް ކާސްޓިންގ ކޮމިޝަން އުވާލައި ހުރިހާ މީޑިޔާއެއް އެއްތަނަކުން ބަލަހައްޓައި ދިނުމަށްޓަކައި މޯލްޑިވްސް މީޑިޔާ ކޮމިޝަން އުފެއްދުމުގެ ބިލެއް ރައްޔިތުންގެ މަޖިލީހަށް ވައްދައިފިއެވެ.
ވެރިކަންކުރާ ޕީޕީއެމްގެ މެމްބަރެއް ކަމަށްވާ އުނގޫފާރު ދާއިރާގެ މެމްބަރު ޖައުފަރު ދާއޫދު މަޖިލީހަށް ހުށަހަޅުއްވާފައިވާ ބިލުގައި ވަނީ ހުރިހާ މީޑިޔާއެއްގެ ކަންކަން ބެލެހެއްޓުމަށް މީޑިޔާއާބެހޭ އެއް މުއައްސަސާ އުފެއްދުމަށެވެ. ނަމަވެސް މަޖިލީހަށް ހުށަހަޅާފައިވާ ބިލުގައިވާ މާއްދާތަކާބެހޭ އެއްވެސް ތަފްސީލެއް ބިލު ހުށަހެޅުއްވި މެމްބަރު ދެއްވާފައި އަދި ނުވެއެވެ.
މައުލޫމާތު ލިބިފައިވާ ގޮތުގައި ބިލު ތައްޔާރު ކުރަމުން ދިޔައިރު އޮތީ މީޑިޔާ ތަކާއި މަޖިލީހުން އިންތިޚާބުކުރާ ފަސް މެމްބަރެއްގެ މައްޗަށް ކޮމިޝަން ހަދާގޮތަށެވެ. އެހެންނަމަވެސް މަޖިލީހަށް ހުށަހެޅިއިރު ބިލުގައި ހުރި ވާހަކަތައް އަދި ހާމަނުކުރެއެވެ. އެނގިފައިވާ ގޮތުގައި ބިލް ޑްރާފްޓް ކުރިއިރު އެޓާރނީ ޖެނެރަލްގެ ލަފާވެސް ވަނީ ހޯދާފައެވެ.
މީޑިޔާ ކައުންސިލާއި ބްރޯޑްކޮމް އުވާލައި އެއް މުއައްސަސާއެއް އުފެއްދުމަށްޓަކައި މަޖިލީހަށް ބިލެއް ހުށަހެޅިއިރު މީގެކުރިން އެ ދެމުއައްސަސާގެ މަސައްކަތް ވަނީ މައިގަނޑު ދެބަޔަކަށް ބަހާލާފައެވެ. އެގޮތުން މީޑިޔާ ކައުންސިލުން މައިގަނޑު ގޮތެއްގައި ބަލަހައްޓަމުން އައީ އޮންލައިން އަދި ޕްރިންޓް މީޑިޔާއެވެ. ބްރޯޑްކޮމްއިން ޓީވީ އަދި ރޭޑިޔޯއެވެ. ނަމަވެސް މީޑިޔާ ކައުންސިލުން ޓީވީ ތަކާއި ރޭޑިޔޯ ތަކުގެ ފަރާތުން ހުށަހެޅި މައްސަލަތައްވެސް ބަލާފައި ވެއެވެ. އަދި މީޑިޔާ ކައުންސިލުން އިސްނަގައި ޓީވީތަކަށް ކުރިމަތިވި ބަޔެއް މައްސަލަތައް ޙައްލު ކުރަން މަސައްކަތް ކޮށްފައި ވެއެވެ.
