ކުރިޔަށް އޮތް ރިޔާސީ އިންތިޚާބުގައި ހޮވަން ޖެހޭނީ އިދިކޮޅު ފަރާތްތަކުން ގުޅިގެން އިންތިޤާލީ ރައީސެއް ކަމަށް ކުރީގެ ރައީސް މުޙަންމަދު ނަޝީދު ވިދާޅުވި ނަމަވެސް އެއީ ޤާނޫނުގައި ކުރެވެން އޮތް ކަމެއް ނޫން ކަމަށް ޕީޕީއެމްގެ ސެކްރެޓަރީ ޖެނެރަލް އަދި ނިލަންދޫ ދާއިރާގެ މެމްބަރު ޑރ އަބްދުﷲ ޚަލީލް ވިދާޅުވެއްޖެއެވެ.
ޚަލީލް ވިދާޅުވީ އިންތިގާލީ ރައީސެއްގެ ވާހަކަ ދިވެހި ގައުމުގެ ޤާނޫނު އަސާސީގައި ނެތް ކަމަށާއި އެވާހަކަ އޮތީ "ނަޝީދުގެ ޤާނޫނު އަސާސީގައި" ކަމަށް ވެދާނެ ކަމަށެވެ.
"ނަޝީދުގެ ޤާނޫނު އަސާސީގައި އޮތްގޮތް ކަމަށްވެދާނެ، ދިވެހި ގައުމުގެ ޤާނޫނު އަސާސީއަކު ތިވާހަކައެއް ނެތް" ރައީސް ނަޝީދުގެ ވާހަކައަށް ރައްދު ދެއްވައި ޚަލީލް ކުރެއްވި ޓްވީޓެއްގައި ވިދާޅުވެފައި ވެއެވެ.
ރައީސް ނަޝީދު ވިދާޅުވެފައި ވަނީ ކުރިޔަށް އޮތް ރިޔާސީ އިންތިޚާބުގައި އިދިކޮޅު ހުރިހާ ފަރާތްތަކެއް ގުޅިގެން އެއް ކެންޑިޑޭޓް ނެރުން ބުއްދިވެރި ކަމަށާއި އެބޭފުޅަކު ވާންޖެހޭނީ އިންތިގާލީ ރައީސަކަށް ކަމަށެވެ. އަދި ރައީސްގެ ޒިންމާއަކީ އިންތިގާލީ މަރުޙަލާގައި އިސްލާޙު ކުރަން ހުރި ކަންކަން އިސްލާޙުކޮށް އަލުން އިންތިޚާބެއް ބޭއްވުން ކަމަށްވެސް ނަޝީދު ވިދާޅުވެފައި ވެއެވެ.
