ރައްޔިތުންގެ މަޖިލީހުގެ މެމްބަރުންނަށް ރިޝްވަތު ދެއްވި ކަމުގެ ތުހުމަތުގައި 80 އަށްވުރެ ގިނަ ދުވަހު ޖަލުގައި ބެހެއްޓެވުމަށް ފަހު ގެޔަށް ބަދަލު ކުރެއްވި ދިއްގަރު ދާއިރާގެ މެމްބަރު އަދި ކުރީގެ ރައީސް މައުމޫންގެ ދަރިކަލުން ފާރިޝް މައުމޫން އަލުން އަނެއްކާ ޖަލަށް ބަދަލުކޮށްފިއެވެ.
ޖަލުގައި 83 ދުވަސް ހޭދަކުރެއްވި ފާރިޝް ގެޔަށް ބަދަލު ކުރެއްވީ މިމަހުގެ 11 ވަނަ ދުވަހުއެވެ. ކުއްލި ގޮތަކަށް އަނެއްކާވެސް ފާރިޝް އަނބުރައި ޖަލަށް ގެންދެވީ ކީއްވެގެން ކަމެއް ނޭނގެއެވެ. ނަމަވެސް ފާރިޝް ޖަލަށް ކުއްލި ގޮތަކަށް ބަދަލުކުރެއްވުމުގެ ކުރިން މިއަދު ވަނީ ހަމަ ކުއްލި ގޮތަކަށް އަދާލަތު ޕާޓީގެ ރައީސް ޝައިޚް އިމްރާން އަބްދުﷲ ވެސް ގެއިން ޖަލަށް ބަދަލު ކުރައްވާފައެވެ.
ފާރިޝްގެ މައްސަލަ ކޯޓުގައި އޮތްއިރު ޝައިޚް އިމްރާންއަކީ ބާރަ އަހަރުގެ ޖަލު ޙުކުމެއްގައި ހުންނެވި ބޭފުޅެކެވެ. އިމްރާން ޖަލުން ގެޔަށް ބަދަލު ކުރެއްވީ އަނބިކަނބަލުން ވިހެއުމާއި ގުޅިގެންނެވެ. ފާރިޝް އާއި އިމްރާން އަލުން ޖަލަށް ބަދަލު ކުރެއްވުމުން ކުރީގެ ދެ ރައީސުން ކަމަށްވާ ފާރިޝްގެ ބައްޕާފުޅު މައުމޫން އާއި ރައީސް މުޙަންމަދު ނަޝީދު ވަނީ އެދެބޭފުޅުން ދޫކޮށްލުމަށް ގޮވާލައްވާފައެވެ.
