ހަލުވިކަމާއެކު ފެތުރެމުންދާ ކޮވިޑް-19 މައިތިރިކުރުމަށް އަޅާ ރައްކާތެރިކަމުގެ ފިޔަވަޅެއްގެ ގޮތުން މެލޭޝިޔާގައި ކުުއްލި ނުރައްކަލުގެ ހާލަތު އިއުލާންކޮށްފިއެވެ. މިކަމަށް ރަސްގެފާނު އައްސުލްޠާން ޢަބްދުﷲ ރިޢާޔަތުއްދީން އަލްމުސްޠަފާ ބިއްލާހި ޝާހް ނެރުއްވި ޝާހީ ގަރާރުގައި ވާގޮތުން މި ހާލަތު 1 އޮގަސްޓާ ހަމައަށް ދެމިގެން ދާނެއެވެ.
"މި ކުއްލި ހާލަތާއި، އެއް ތަނުން އަނެއް ތަނަށް ދިއުންް ކޮންޓްރޯލްކުރުމުގެ ކުރިމަތީގައި ހުރިހާ ރައްޔިތުންވެސް މައިތިރިކަމާ ގަދަފަދަކަމާއެކު ތިބުމަށް އަހުރެން ގޮވާލަން." ރަސްގެފާނުގެ ގަރާރުގައި ވެއެވެ.
ރަސްގެފާނު މި ގަރާރު ނެެެރެއްވާފައި ވަނީ އިއްޔެގެ ވަގުތެއްގައި ބޮޑުވަޒީރު މުޙްޔިއްދީން ޔާސީން ރަސްގެފާނާ ބައްދަލުކުރައްވައި މިކަމަށް މަޝްވަރާ އެރުވުމުންނެވެ. ފާއިތުވި އޮކްޓޯބަރު މަހުގެ ތެރޭގައި ވެސް ކުއްލި ނުރައްކަލުގެ ހާލަތު އިއުލާންކުރެއްވުމަށް ބޮޑުވަޒީރު މުޙްޔިއްދީން ރަސްގެފާނަށް މަޝްވަރާ އެރުވިއެވެ. އެހެންނަަމަވެސް، ރަސްގެފާނު ވަނީ އެފަހަރު އެކަމަށް ދެކޮޅުހައްދަވާފައެވެ.
މިހިނގާ 2021 ވަނަ އަހަރު ފެށުުނު ފަހުން މެލޭޝިޔާގައި ވަނީ ކޮވިޑް-19 ގެެ ހާލަތު އިތުުރަށް ގޯސްވެގެން ގޮސްފައެވެ. އެ ގައުމުގައި ކޮވިޑް-19 ޖެހިގެން މިހާތަނަށް 555 މީހުން މަރުވެފައި ވާއިރު، މީގެ ތެރޭން ގާތްގަނޑަކަށް ދެބައިކުޅަ އެއްބައި މަރުވެފައި ވަނީ މިއަަަހަރު ފެށުނު ފަހުންނެވެ.
ދުނިޔޭގައި ކޮވިޑް-19 އަަށް ޕޮޒިޓިވްވި މީހުން 90 މިލިއަނަށްވުރެ މައްޗަށް ގޮސްފައިވާއިރު، މިބަލީގައި މަރުވި މީހުންގެ އަދަދު 2 މިލިއަނާ ގާތްކުރެއެވެ.
