ސަރުކާރުގެ ބޯހިޔާވަހި ކަމުގެ މަޝްރޫއުގެ ދަށުން އަލަތު ކައިވެނި ކުރާ ކޮންމެ ދެމަފިރިއަކަށް ފްލެޓެއް ދިނުމުގެ ވައުދުގެ ތެރެއިން ހުޅުމާލޭގައި 1 ކޮޓަރީގެ އެޕާޓްމެންޓްތަކެއް އަޅަން އެޗްޑީސީން ނިންމައިފިއެވެ.
އެޗްޑީސީން ބުނީ 1 ކޮޓަރީގެ އެޕާޓްމެންޓްތަކެއް އަޅަން 14 ބުރީގެ އިމާރާތެއް އަޅަނީ އަލަތު ކައިވެނިކުރާ މީހުންނަށް ފްލެޓް ދިނުމަށް އަމާޒުކޮށް ކަމަށެވެ. އެފަރާތުން ބުނީ 1 ކޮޓަރީގެ އެޕާޓްމެންޓްތައް ޖާގައިގެ ގޮތުން ވަރަށް ތަނަވަސްވާނެ ކަމަށާއި އަދި ހެޔޮ އަގެއްގައި އެތަންތަން ލިބޭނެ ކަމަށެވެ.
14 ބުރީގެ އިމާރާތް ހެދުމަށް އެޗްޑީސީން މިހާރު ވަނީ އިއުލާން ކޮށްފައެވެ. އެގޮތުން 14 ބުރީގެ އިމާރާތް ހެދުމަށް ޝައުގުވެރިވާ ފަރާތްތަކަށް އެޗްޑީސީން ވަނީ ތިންގޮތެއް ހުށަހެޅުމުގެ ފުރުޞަތުވެސް ހުޅުވާލާފައެވެ. އޭގެތެރެއިން އެއްގޮތަކީ އިމާރާތްކުރުމަށް ހިނގާ ޚަރަދުގެ 15 ޕަސެންޓު، އިމާރާތް ކުރާ ފަރާތަށް އެޗްޑީސީން ދީގެން އިމާރާތް ކުރުމެވެ. ދެވަނަ ގޮތަކީ އިމާރާތް ކުރާ ފަރާތުގެ އަމިއްލަ ހަރަދުގައި އިމާރާތްކުރުމެވެ. ތިންވަނަ ގޮތަކީ ސަރުކާރު ހިއްސާވާ ކުންފުންޏަކުން ނުވަތަ ރާއްޖޭގެ އަމިއްލަ ކުންފުންޏަކުން ޚަރަދު ކުރާ ގޮތަށް އިމާރާތް ކުރުމެވެ. އިއުލާނުގައިވާ ގޮތުން 14 ބުރީގެ ފައުންޑޭޝަން އެޅުމަށް ފަހު ފުރަތަމަ ފަސް ބުރި ނިންމުމަށް ވެސް ހުށަހެޅިދާނެ ކަމަށެވެ. އަދި ކޮންމެ ބުރިއެއްގައި ތޭވީސް އެޕާޓްމެންޓް ހުންނަން ޖެހެއެވެ. އަދި އެޕާޓްމެންޓެއްގައި 400 އަކަފޫޓް ހުންނަންވެސް ޖެހެއެވެ.
ނަމަވެސް އެޗްޑީސީން ބުނެފައި ވަނީ ތިންގޮތުން ކުރެ ކޮންމެ ގޮތަކަށް އިމާރާތް ކުރިކަމަށް ވިޔަސް އެއިން އެޕާޓްމަންޓެއްގެ ޖުމްލަ އަގު 38،000 ޑޮލަރު (585،960ރ) އަށް ބޮޑުވެގެން ނުވާނެ ކަމަށެވެ. 14 ބުރީގެ އިމާރާތުގެ ތިރީ ބުރިން ފްލެޓް ނުދޭނެއެވެ. އެބައިގައި ހުންނާނީ ވިޔަފާރިކުރާ ފިހާރަތާއި އެ ފްލެޓްތަކުގައި ދިރިއުޅޭ މީހުންގެ ވެހިކަލްތައް ޕާކު ކުރާނެ ޒޯންތަކެވެ.
