މޯލްޑިވްސް މީޑިޔާ ކައުންސިލުން މިއަހަރު ހޮވި "ލައިފްޓައިމް އެޗީވްމަންޓް އެވޯޑް" ނޫސްވެރިކަމަށް ދިގު ޚިދުމަތެއް ކުރައްވާފައިވާ އާފަތިސް ނޫހުގެ މަސްއޫލުވެރިޔާ އައްބާސް އިބްރާހިމްއަށް ލިބިވަޑައިގަތުމާއި ގުޅިގެން ހޫނު މަރުހަބާއެއް ދަންނަވަމެވެ.
ރޭ ދަރުބާރުގޭގައި އޮތް މީޑިޔާ ކައުންސިލްގެ ނޫސްވެރިކަމުގެ އިނާމް ދިނުމުގެ ރަސްމިއްޔާތުގައި މި ޝަރަފްވެރި އެވޯޑް ހަވާލުކޮށް ދެއްވީ ދިވެހިރާއްޖޭގެ އިސްލާމިކް ޔުނިވާސިޓީގެ ޗާންސެލާރ ޑރ މުޙަންމަދު ޝަހީމް އަލީ ސައީދެވެ. ނިޝާން އިއްޒުއްދީންގެ އިއްޒަތުގެ ވެރިޔާ އައްބާސް އިބްރާހިމްއަކީ ރާއްޖޭގައި ނޫސްވެރިކަން ކުރަން ފެށިފަހުން ނޫސްވެރިކަމުގެ ހުރިހާ ދައުރެއްގައިވެސް އުޅުއްވާފައިވާ ގިނަ ތަހުރިބާތަކެއް ލިބިވަޑައިގެން ހުންނެވި ދިވެހި ނޫސްވެރިކަމުގެ ޚިދުމަތްތެރިޔެކެވެ. އާފަތިސް ނޫހުގެ މަސްއޫލުވެރިޔާ ކަމުގެ އިތުރުންވެސް ވަރަށްގިނަ ނޫސް މަޖައްލާ ތަކުގެ އެޑިޓަރުކަންވެސް އައްބާސް ވަނީ ކުރައްވާފައެވެ. އައްބާސްގެ މޭސްތިރި ކަމުގައި ރާއްޖޭގައި ތަފާތު ނޫސްތަކާއި މަޖައްލާ ނުކުތް ނަމަވެސް އެންމެ ކާމިޔާބު އަދި އެންމެ ގިނަ ދުވަހު ނެރެފައިވާ ނޫހަކީ އާފަތިސް ނޫހެވެ.
އާފަތިސް ނޫސް ވެގެން ގޮސްފައި ވަނީ ގިނަބަޔެއްގެ މަގުބޫލުކަން ހޯދި އަދި ގިނަ އަދަދެއްގެ ނޫސްވެރިން މި ދާއިރާއަށް ނެރެދިން ނޫހަކަށެވެ. ނޫސްވެރިކަމަށް އައްބާސް އިބްރާހިމް ކުރައްވާފައިވާ ޒަމާންވީ ޚިދުމަތް ފާހަގަކޮށް މީޑިޔާ ކައުންސިލުން ލައިފްޓައިމް އެޗީވްމަންޓް އެވޯޑް ދިންއިރު މީގެކުރިން ސަރުކާރުންވެސް ވަނީ ނޫސްވެރިކަމުގެ ދާއިރާއިން ހިތްވަރު ދިނުމުގެ އިނާމް އައްބާސް އިބްރާހިމްއަށް ދެއްވާފައެވެ.
