މޯލްޑިވްސް މީޑިޔާ ކައުންސިލުން ދެމުން އަންނަ ނޫސްވެރިކަމުގެ އެވޯޑް ހަފްލާ މިރޭ އޮންނާނެއެވެ.
މީޑިޔާ ކައުންސިލުން ބުނި ގޮތުގައި މިރޭހެ ހަފްލާގައި ޖުމްލަ 8 ދާއިރާއަކުން އިނާމް ދޭނެއެވެ. އެއީ އިޖުތިމާއީ ދާއިރާ، ސިޔާސީ ދާއިރާ، ޝަރުއީ ދާއިރާ، ގާނޫނީ ދާއިރާ، ވިޔަފާރި އާއި އިގްތިސާދީ ދާއިރާ، ކުޅިވަރުގެ ދާއިރާގެ އިތުރުން ފޮޓޯ ޖާނަލިޒަމްގެ ދާއިރާ އަދި ވީޑިއޯ ޖާނަލިޒަމްގެ ދާއިރާ، ފީޗާ ލިއުމުގެ ދާއިރާއެވެ.
މި ދާއިރާ ތަކުން އިނާމަށް ކުރިމަތިލި ނޫސްވެރިންގެ ތެރެއިން އެންމެމޮޅު ނޫސްވެރިޔާ ހޮވުމުގެ އިތުރުން އެންމެ އުންމީދީ ނޫސްވެރިޔާ އާއި ލައިފްޓައިމް އެޗީވްމަންޓް އެވޯޑްވެސް ދޭނެއެވެ. އިނާމަށް އެދި ކުރިމަތިލާން މީޑިޔާ ކައުންސިލުން ހުޅުވާލުމުން ޖުމްލަ 45 ނޫސްވެރިޔަކު ވަނީ ކުރިމަތިލާފައެވެ.
މީޑިޔާ ކައުންސިލްގެ ދެވަނަ ދައުރުން ފެށިގެން ދެމުން އަންނަ ނޫސްވެރިކަމުގެ އިނާމް ދިނުމުގެ މަގްސޮދަކީ މީޑިއާގައި ހަރަކާތްތެރިވާ މީހުން ތަބާވާން ޖެހޭ ހަމަތަކާއި އަހުލާގީ މިންގަނޑުތަކަށް ތަބާވެ، ރަނގަޅު ފެންވަރުގައި މަސައްކަތް ކުރާ ނޫސްވެރިންގެ މަސައްކަތް ފާހަގަކޮށް ނޫސްވެރިންނަށް ހިތްވަރު ދިނުމެވެ.
ކައުންސިލުން ބުނީ މިރޭ އޮންނަ އެވޯޑް ހަފްލާގައިވެސް މުނިފޫހިފިލުވުމުގެ ހަރަކާތްތަކެއް ރާއްޖޭގެ މަޝްހޫރު ބަޔެއް ފަންނާނުން ހުށަހަޅައިދޭނެ ކަމަށެވެ.
