ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރުގެ ފުރަތަމަ ޖަލްސާ މިއަދު ބޭއްވިއިރު މަޖިލީހުގެ ރިޔާސަތު ހިމެނޭ ސަރަހައްދަށް މެމްބަރުންނަށް ކައިރިނުވެވޭ ގޮތަށް އުސްކޮށް ހަދާފައިވާއިރު އާ ރިޔާސަތު އެގޮތަށް ފަރުމާ ކުރުމުގެ މޭސްތިރިއަކީ މަޖިލީހުގެ ނައިބު ރައީސް ރީކޯ މޫސާ މަނިކު ކަމަށް ޕީޕީއެމްގެ ޕާލިމެންޓްރީ ގްރޫޕްގެ ލީޑަރ އަޙްމަދު ނިހާން ޙުސައިން މަނިކު ވިދާޅުވެއްޖެއެވެ.
ޕީޕީއެމްއަށް މިހާރު ސޮއި ކުރައްވާފައިވާ ހުޅުހެންވޭރު ދާއިރާގެ މެމްބަރު އަދި މަޖިލީހުގެ ނައިބު ރައީސް މަޖިލީހުގެ ރިޔާސަތު ހިމެނޭ ތަނުގެ ބޭރުގައި ހުއްޓިވަޑައިގެން ހުންނެވި ފޮޓޯއަކާއެކު ނިހާން ޓްވީޓް ކުރައްވަމުން ވަނީ "ދިވެހި މޭސްތިރި ހިންގި މީހާ ކޮބައިތޯ" ސުވާލު ކުރައްވާފައެވެ.
މަޖިލީހުގެ އާ ރިޔާސަތު މިހާރު ވަނީ އިދާރީ މޭޒާ ހަމައިން ފަސް ފޫޓަށް އުސްކޮށް މެމްބަރުން ރިޔާސަތާ ހަމައަށް ނުދެވޭނެ ގޮތަށް ލަކުޑިން އުސްފާރެއް ލާފައެވެ. މިއަދު އޮތް ޖަލްސާގައި އިދިކޮޅު މެމްބަރުން ރިޔާސަތާ ހަމައަށް ވަޑައިގަތުމަށް މަސައްކަތް ނުކުރެއްވި ނަމަވެސް ބަޔެއް މެމްބަރުން ވަނީ އިހުތިޖާޖު ކުރައްވާފައެވެ. މަޖިލީހުގެ ރައީސް އިންނަވާ ގޮނޑިކޮޅު އިދާރީ މޭޒުގެވެސް މަތިން ފެންނައިރު އިދިކޮޅު މަޖިލީހުގެ ރިޔާސަތާ ހަމައަށް އެއްވެސް ވަރަކަށް ނުދެވޭނެހެން އޮތީ ބައްދާފައެވެ.
ރިޔާސަތު އުސްކޮށް ހެދި ނަމަވެސް އިދިކޮޅު ބަޔެއް މެމްބަރުން ވިދާޅުވެފައި ވަނީ ކިތަންމެ އުސްކުރިޔަސް އަދި ރިޔާސަތާ ހަމައަށް ވަޑައިގަންނަވާނެ ކަމަށެވެ.
މަޖިލީހުގެ ދެވަނަ ދައުރުގެ ފަހުކޮޅު މަޖިލީހުގެ ޖަލްސާތައް ވަނީ ވަރަށް ބޮޑަށް ހޫނުވެ ކޮންޓްރޯލް ގެއްލިފައެވެ. އެގޮތުން މަޖިލީހުގެ ރިޔާސަތުގައި އިންނަ ގޮނޑިކޮޅުވެސް މަޖިލީހުގެ ގޯތި ތެރެއިން ފެނިފައިވެއެވެ. އަދި މެމްބަރުން ގަޔަށް އަތްލާ ހިސާބަށް ގޮސް މަޖިލިސް ގޭތެރޭގައި މެމްބަރުން ވަނީ ކުކުޅު ބިސް ޖެހުމުގެ ކުޅިވަރުވެސް ކުޅެފައެވެ.
