ޕްރޮސެކިއުޓަރ ޖެނެރަލް (ޕީޖީ) އައިޝަތު ބިޝާމްގެ ރަސްމީ ކާރުގައި އަލިފާން ޖަހައި ރޯކޮށްލުމުން ބޭނުން ނުކުރެވޭ ވަރަށް އަނދައިފިއެވެ.
ޕީޖީގެ ކާރުގައި ބަޔަކު އަލިފާން ރޯކޮށްލީ ރޭގެވަގުތެއްގައި ޖަނަވަރީ މަގުގައި ޕާކު ކޮށްފައި އޮއްވައެވެ. ފުލުހުން ބުނީ އެ ކާރުގައި ރޯކޮށްލި ކަމަށް ބެލެވެނީ ރޭ ދަންވަރު ތިނެއްޖެހި ފަހުން ކަމަށެވެ. ކާރު ޕާކު ކޮށްފައި އޮތީ ޖަނަވަރީ މަގުގައި ހުންނަ އިވްނިންގ މާޓު ކައިރީގައިވާ ޕާކިންގ ޒޯނުގައެވެ. މިއީ ބިޝާމްއަށް ދައުލަތުން ދެއްވާފައިވާ ކާރެވެ.
މައުލޫމާތު ލިބިފައިވާ ގޮތުގައި ޕީޖީގެ ރަސްމީ ކާރު އަންދާލާފައި ވަނީ ޕެޓްރޯލް އަޅައި ރޯކޮށްލައިގެންނެވެ. ނަމަވެސް މިމައްސަލައިގައި އަދި މިހާތަނަށް އެއްވެސް މީހަކު ހައްޔަރު ކޮށްފައިނުވާ ކަމަށް ފުލުހުން ބުންޏެވެ. މިމައްސަލަ ފުލުހުން ދަނީ ތަހުގީގު ކުރަމުންނެވެ.
