ރާއްޖޭގައި ހިންގަމުން އަންނަ އަމިއްލަ ޓީވީ ސްޓޭޝަނެއް ކަމަށްވާ ރާއްޖެ ޓީވީ އަނެއްކާވެސް ޖޫރިމަނާ ކޮށްފިއެވެ.
ބްރޯޑްކާސްޓިންގ ކޮމިޝަނުން މިފަހަރު ރާއްޖެ ޓީވީ ޖޫރިމަނާ ކޮށްފައި ވަނީ 500،000 ރުފިޔާއިންނެވެ. ކޮމިޝަނުން ޖޫރިމަނާ ކުރަމުން ބުނެފައި ވަނީ މިފަހަރު ޖޫރިމަނާ ކުރީ ރައްޔިތުންގެ މަޖިލީހުގެ ތިމަރަފުށީ ދާއިރާގެ މެމްބަރު މުޙަންމަދު މުސްތޮފާ ރާއްޖެ ޓީވީގެ ޕްރޮގްރާމެއްގައި ދެއްކެވި ވާހަކައެއްގައި ރައީސް ޔާމީންގެ ވެރިކަން ވައްޓާލަން ހިތްވަރު ލިބޭގޮތަށް ދެއްކެވި ވާހަކައެއް ދެއްކުމާއި ގުޅިގެން ކަމަށެވެ.
500،000 ރުފިޔާއިން ރާއްޖެ ޓީވީ ޖޫރިމަނާ ކުރިއިރު މީގެކުރިންވެސް ދެފަހަރު ބްރޯޑްކާސްޓިންގ ކޮމިޝަނުން ވަނީ އެ ސްޓޭޝަން ޖޫރިމަނާ ކޮށްފައެވެ. ފުރަތަމަ ޖޫރިމަނާ ކޮށްފައި ވަނީ 250،000 ރުފިޔާއިންނެވެ. އެފަހަރު ރާއްޖެ ޓީވީ ޖޫރިމަނާ ކުރިއިރު އެ މައްސަލައާ ގުޅުން ހުރި ރިޕޯޓް ލިޔުނު ނޫސްވެރިޔާވެސް ބައިލައްކަ ރުފިޔާއިން ޖޫރިމަނާ ކުރިއެވެ.
އެފައިސާ ރާއްޖެ ޓީވީން ދެއްކި ދުވަހު އަނެއްކާވެސް ކޮމިޝަނުން ރާއްޖެ ޓީވީ ޖޫރިމަނާ ކުރިއެވެ. އެފަހަރު ކުރީ 1 މިލިއަން ރުފިޔާއިންނެވެ. މީގެކުރިންވެސް ރާއްޖެ ޓީވީ ޖޫރިމަނާ ކޮށްފައި ވަނީ ރައީސް އަބްދުﷲ ޔާމީންގެ އަބުރަށް އަރައިގަންނަ ވާހަކަ އެ ޓީވީން ދެއްކި ކަމަށް ބުނެއެވެ.
ބްރޯޑްކާސްޓިން ކޮމިޝަނުން މީގެކުރިން ވަނީ މީޑިޔާ ނެޓްވެސް 5 ލައްކަ ރުފިޔާއިން ޖޫރިމަނާ ކޮށްފައެވެ. އެއީ އެމްއެމްޕީއާރުސީގެ ޚިޔާނާތާބެހޭ ޑޮކިއުމެންޓްރީއެއް އަލްޖަޒީރާ ޓީވީ ސްޓޭޝަނުން ދެއްކުމުން އޭތި މީޑިޔާ ނެޓުން ރީބްރޯޑްކާސްޓް ކުރުމުންނެވެ.
