ކޯވިޑް-19 އަށް އަލަށް ޕޮޒިޓިވްވި މީހުންގެ ޢަދަދު އިތުރުވެ 150 އަރައިފިއެވެ.
މިއަދު އިރުއޮއްސި ހަޔަކާހަމައަށް ވޭތުވެދިޔަ 24 ގަޑިއިރުތެރޭގައި ކޯވިޑް 19 އަށް 150 މީހުން ޕޮޒިޓިވް ވެފައިވަނީ ޓެސްޓްކުރި 1717 ސާމްޕަލްގެ ތެރެއިންނެވެ.
މި ޢަދަދާއެކު މިހާރު ބަލި ތަޙައްމަލުކުރަމުންދާ މީހުންގެ ޢަދަދު ވަނީ 1090 އަރާފައެވެ. އޭގެތެރެއިން ހޮސްޕިޓަލުގައި ފަރުވާ ދެމުން ދަނީ 92 މީހުންނަށެވެ. އައިސޮލޭޝަން ފެސިލިޓީތަކުގައި ތިބީ 342 މީހުންނެވެ. ކޯވިޑް ކޭސްތައް އިތުރުވާ ވަރަކަށް ހޮސްޕިޓަލުގައި ފަރުވާދޭންޖެހޭ މީހުންގެ ޢަދަދު ވެސް ދަނީ އިތުރު ވަމުންނެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ތަފާސްހިސާބުން ދައްކާގޮތުން އަލަށް ކޯވިޑަށް ޕޮޒިޓިވް 150 މީހުންގެ ތެރޭގައި ހިމެނެނީ 58 ދިވެހިންނާއި 92 ބިދޭސީންނެވެ. މިޢަދަދާއެކު ކޯވިޑް ޖެހުނު މީހުންގެ ޖުމުލަ ޢަދަދަކީ 12758 އެވެ. މިއަދުގެ ޢަދަދުގެ ތެރެއިން މާލެ ސަރަޙައްދުން ޕޮޒިޓިވްވި ޢަދަދަކީ 62އެވެ. އަދި އަތޮޅުތަކުން އަލަށް ޕޮޒިޓިވްވީ 88 މީހުންނެވެ. ބަލިޖެހި ޝިފާ ލިބުނު މީހުންގެ ޢަދަދު މިހާރު ވަނި 11615 އަށް އަރައިފައެވެ.
މިހާރު އަތޮޅުތަކުގެ 14 ރަށެއްގައި ބަލި ތަޙައްމަލު ކުރަމުންދާ ޢަދަދަކީ 14 އެވެ. މިވަގުތު 32 ރިސޯޓެއްގައި 58 ފަތުރުވެރިންނާއި 233 މުވައްޒަފުން ބަލި ޖެހިފައި އެބަތިއްބެވެ.
