އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އިއްޔެގެ ވަގުތެއްގައި ސިއްރުން ސައޫދީއަރަބިއްޔާއަށް ގޮސް އެގައުމުގެ ވަލީއަހުދު މުޙައްމަދުބިން ސަލްމާންއާ ބައްދަލުކޮށްފިކަމަށް އިސްރާއީލުގެ ކާން ޕަބްލިކް ރޭޑިޔޯއިންނާއި، އާމީ ރޭޑިޔޯއިން ބުނެފިއެވެ.
އިސްރާއީލުގެ ޚަބަރުފަތުރާ ވަސީލަތްތަކުން ބުނާ ގޮތުގައި، ރަތްކަނޑުގެ އައްސޭރީގައި އޮންނަ ނިޔޯމްގައި ފަސް ގަޑިއިރަށް ކުރިއަށް ދިޔަ މި ބައްދަލުވުމުގައި އިސްރާއީލުގެ ޖާސޫސީ އިދާރާ މޯސާދުގެ ވެރިޔާ ޔޯސީ ކޯހެން ބައިވެރިވިއެވެ. އަދި އެމެރިކާގެ ސެކްރެޓަރީ އޮފް ސްޓޭޓް މައިކް ޕޮމްޕެއޯ ވެސް ބައިވެރިވެވަޑައިގަތެވެ.
މި ޚަބަރާ ބެހޭ ގޮތުން ސައޫދީ އަރަބިއްޔާއިން އެއްޗެއް ބުނެފައި ނުވާއިރު، ބޮޑުވަޒީރު ނަތަންޔާހޫގެ އޮފީހުން އެއްވެސް އެއްޗެއް ބުނެފައި ނުވެއެވެ. އެހެންނަމަވެސް ނަތަންޔާގެ އެޑިއުކޭޝަ މިނިސްޓަރު ޔޮއަވް ގަލަންޓް ވަނީ މިކަން ކަށަވަރުކޮށްދީފައެވެ.
"މި ބައްދަލުވުން ކުރިއަށް ދިއުމާއި ނުރަސްމީކޮށް ނަމަވެސް އެ ވާހަކަ އައްމު ވީ ކަމީ ވަރަށް ބޮޑަށް ފާހަގަކޮށްލަން ޖެހޭ ކަމެއް....... "މިއީ ވަރަށް ބޮޑު ކާމިޔާބީއެއް." އާމީ ރޭޑިޔޯގައި ވާހަކަދައްކަމުން އޭނާ ބުންޏެވެ.
ފްލައިޓް ޓްރެކްކުރާ ސައިޓުތުގެ ރިކޯޑުތަކުން ދައްކާ ގޮތުގައި އިއްޔެގެ ވަތުގެއްގައި ބިޒިނަސް ޖެޓެއް އިސްރާއީލުގެ ތެލްއަވީވުން ފުރައިގެން ސައޫދީ އަރަބިއްޔާގެ ނިއޯމްއަށް ދަތުރުކޮށްފައި ވެއެވެ. އެއީ ބައްދަލުވުން އޮތް ރަށެވެ.
އިސްރާއީލުގެ ނޫހެއް ކަމުގައިވާ ޔެދިއޯތު އަހްނަނޫތު އިން ބެނެފައި ވަނީ އިއްޔެ އިރާކޮޅުގެ ވަގުތެގައި ޓެލްއަވީވުން ފުރައިގެން ނިޔޯމްއަށް ދަތުރުކުރީ ނަތަންޔާހޫގެ ދަތުރުތަކުގައި ބޭނުންކުރާ ބިޒިނެސް ޖެން ޓީ7-ސީޕީއެކް ކަމުގައެވެ. އަދި އެ ޖެޓް ޓެލްއަވީވަށް ފުރީ 5 ގަޑިއިރު ނިއޯމް އެއާޕޯޓުގައި އޮތުމަށް ފަހު ރޭ މެންދަމުގެ ވަގުތެއްގައެވެ.
އިސްރާއީލުގެ އަސްކަރިއްޔާއިން ހިންގާ އާމީ ރޭޑިޔޯއިން މިޚަބަރު އާއްމުކުރުމީ މިއީ ހަގީގަތެކަން ޔަގީންކޮށްދޭ ކަމެއް ކަމުގައި ގިނަ ބަޔަކު ގަބޫލުކުރެއެވެ.
ރަސްމީކޮށް ސައޫދީ އަރަބިއްޔާއިން އަދިވެސް ބުނަނީ އިސްރާއީލާއެކު ގުޅުން ގާއިމު ނުކުރާނެ ކަމަށެވެ. އެހެން ނަމަވެސް ދެ ގައުމުގެ އެކި ފެންވަރުގެ އޮފިޝަލުންގެ މެދުގައި ގުޅުންތައް އަންނަނީ ބާއްވަމުންނެވެ. ޚާއްސަކޮށް މޯސާދުގެ ވެރިޔާ ޔޯސީ ކޯހެންއާ ސައޫދީ އިސް މަސްއޫލުވެރިންނާ ގާތް ގުޅުމެއް އޮންނަ ކަމަށް ވެއެވެ.
