ރައްޔިތުންގެ މަޖިލީހުން ހުސްވެފައިވާ ކަމަށް އިލެކްޝަން ކޮމިޝަނުން ނިންމާފައިވާ ހަތް ދާއިރާގެ ބައި އިލެކްޝަން ބޭއްވުމަށްޓަކައި ޖުމްލަ ބާރަ މިލިޔަން ރުފިޔާގެ ބަޖެޓެއް ބޭނުންވާތީ ފިނޭންސް މިނިސްޓްރީއަށް ފޮނުވައިފިއެވެ.
އެނގިފައިވާ ގޮތުގައި އިލެކްޝަންތައް ބާއްވަން ބާރަ މިލިޔަން ރުފިޔާގެ ބަޖެޓެއް ދިނުމަށް އެދި އިލެކްޝަން ކޮމިޝަނުން ފިނޭންސް މިނިސްޓަރީއަށް ފޮނުވި ނަމަވެސް އަދި ވަނީ ބަޖެޓް ނުލިބިއެވެ. ބަޖެޓް އަދި ހަމަނުޖެހި އޮތްއިރު ހުސްވި ކަމަށް ކޮމިޝަނުން ނިންމާފައިވާ ދާއިރާ ތަކުގެ ބައި އިލެކްޝަންތައް ބާއްވަން ޤާނޫނުގައި އޮތް މުއްދަތުވެސް މިހާރު ވަނީ ފަހަނައަޅައި ގޮސްފައެވެ. ނަމަވެސް ބައި އިލެކްޝަންތައް ބޭއްވޭނެ ދުވަހެއް އަދި ކޮމިޝަނުން ޔަގީންކަމާއެކު ނުބުނެއެވެ. އިލެކްޝަނާބެހޭ ޤާނޫނުގައިވާ ގޮތުން ގޮނޑިއެއް ހުސްވާތާ ގިނަވެގެން 60 ދުވަސް ތެރޭގައި އެ ދާއިރާއެއްގެ ބައި އިލެކްޝަން ބާއްވަން ޖެހޭނެއެވެ.
މެމްބަރުން ތިއްބެވި ޕާޓީ ނޫން އެހެން ޕާޓީއަކަށް ބަދަލުވެއްޖެނަމަ މަޖިލީހުގެ ގޮނޑި ގެއްލޭނެ ކަމަށް ނިންމި ނިންމުމާއި ގުޅިގެން ގޮނޑި ގެއްލިފައިވާ ކަމަށް އިލެކްޝަން ކޮމިޝަނުން މިހާތަނަށް އިއުލާން ކުރައްވާފައިވާ ހަތް މެމްބަރުންނަކީ ދިއްދޫ ދާއިރާގެ މެމްބަރު އަބްދުއްލަތީފް އާއި ތުލުސްދޫ ދާއިރާގެ މެމްބަރު މުޙަންމަދު ވަޙީދު އާއި ދަނގެތީ ދާއިރާގެ މެމްބަރު އިލްހާމް އަޙްމަދާއި އާއި މައްޗަންގޮޅީ ދެކުނު ދާއިރާގެ މެމްބަރު އަބްދުﷲ ޝިނާން އާއި މަޑުއްވަރީ ދާއިރާގެ މެމްބަރު މުޙަންމަދު އަމީތު އާއި ތިނަދޫ ދެކުނު ދާއިރާގެ މެމްބަރު އަބްދުﷲ އަޙްމަދުގެ އިތުރުން ވިލިނގިލީ ދާއިރާގެ މެމްބަރު ސައުދު ޙުސައިންނެވެ.
މި ހަތް މެމްބަރުންގެވެސް ގޮނޑި ގެއްލުނު ކަމަށް ނިންމާފައި ވަނީ އެ މެމްބަރުން ކުރިން ތިއްބެވި ޕީޕީއެމް ދޫކުރެއްވުމުންނެވެ. މީގެތެރެއިން ބަޔެއް މެމްބަރުންނަކީ ޖުމްހޫރީ ޕާޓީގެ ޓިކެޓާއި އަމިއްލަ ޓިކެޓުގައި ނުކުމެވަޑައިގެން އިންތިޚާބުވި މެމްބަރުންނެވެ. ނަމަވެސް އެ މެމްބަރުން ފަހުން ވަނީ ޕީޕީއެމްއަށް ސޮއި ކުރައްވާފައެވެ.
