މިޔަންމާގެ ރަކީން ސްޓޭޓުގައި ދިރިއުޅެމުން އަންނަ ރޮހިންޖާ މުސްލިމުންނާ ދެކޮޅަށް އެގައުމުގެ އަސްކަރިއްޔާގެ ހަތިޔާރު އެޅި ސިފައިންނާއި ހަތިޔާރު އެޅި ބުޑިސްޓުން ވަރުގަދަ ޖަރީމާތަކެއް ހިންގަން ފަށައި އެ ނުލަފާ އަމަލުތައް ދައްކުވައިދޭ ފޮޓޯ ތަކާއި ވީޑިޔޯ ތަކުން މުޅި ސޯޝަލް މީޑިޔާ ބަންޑުން ކޮށްލުމާއެކު މުސްލިމުންގެ ރުޅިވެރިކަން މިޔަންމާގެ ސަރުކާރަށް އިންތިހާއަށް އަމާޒުވިއެވެ.
ސޯޝަލް މީޑިޔާއަށް ބޯކޮއްޕާލާ ކޮންމެ ފަހަރަކު މިޔަންމާގެ ރޮހިންޖާ މުސްލިމުން ކަތިލާ މަންޒަރާއި ދަންޖައްސާ މަންޒަރާއި އަލިފާނަށްލައި އަންދައި ފިހާ މަންޒަރާއި އެނޫންވެސް އަނިޔާވެރިކަން އިންތިހާއަށް ގޮސްފައިވާ މަންޒަރުތައް ފެނި ހިތްފަޅައިގެން ގޮސް ހިފެހެއްޓުމެއްނެތި ލޮލުން ހޯސްލާފައި ކަރުތައް ބަންޑުން ވެގެންދިޔަ އެންމެ ފާހަގަކޮށްލެވޭ ފަރާތަކަށް ފެނުނީ ތުރުކީ ވިލާތުގެ ރައީސް ތޮއްޔިބު އުރުދުޣާންއެވެ.
މިޔަންމާގެ މުސްލިމުންގެ ދިފާއުގައި ވަރަށް ކެރިވަޑައިގެން އުރުދުޣާން ތެދުވެވަޑައިގަތުން ވެގެން ދިޔައީ މުސްލިމުންނަށް ލިބިގެންދިޔަ އެންމެ ބޮޑު ހިތްވަރުކަން ސޯޝަލް މީޑިޔާއިން ރީތިކޮށް އެނގިގެން ދިޔައެވެ. އުރުދުޣާންގެ އަސަރުން ފުރިފައިވާ ވަރުގަދަ ބަސްފުޅުތަކުން އިސްލާމީ އުންމަތް ހެއްވާލިއެވެ. އުރުދުޣާންގެ ހިތްވަރުގަދަ ބަސްތަކުން ދުނިޔޭގެ ކަންކޮޅުތަކުގައިވާ ހުރިހާ މުސްލިމުންގެ ލޯބި ހޯއްދެވިއެވެ.
ހާލުގައި ޖެހި ރަކީން ސްޓޭޓްގައި ތާށިވެފައިވާ މުސްލިމުންނާއި، ބަންގްލަދޭޝްގެ ބޯޑަރަށް ޖަމާވަމުންދިޔަ ރޮހިންޖާ މުސްލިމުންނާއި ބަންގާޅާއި އެނޫންވެސް ގައުމުތަކަށް އެތެރެވެ ޙާލުގައި ޖެހިފައިވާ ރޮހިންޖާ މުސްލިމުންގެ ހައްގުގައި އުރުދުޣާން ދެއްކެވި ވާހަކަފުޅުތަކަށް މުސްލިމުން ތައުރީފް އޮއްސަމުން ދިޔައީ "ތިޔައީ އިސްލާމީ އުންމަތުގެ ބައްޕަ" އޭ ކިޔަމުންނެވެ. ބަންގްލަދޭޝްގެ ބޯޑަރު ހުޅުވާލައިފިނަމަ މިޔަންމާއިން ރެފިއުޖީންގެ ގޮތުގައި ނުކުންނަމުންދާ ހުރިހާ ރޮހިންޖާ މުސްލިމުންނަށް ތުރުކީ ހުޅުވާލައި އެ ހުރިހާ މީހުންގެ އެންމެހާ ޚަރަދެއްގައި ތުރުކީ ސަރުކާރުން ހިފާނެކަމަށް އުރުދުޣާން ވިދާޅުވުމުން ސޯޝަލް މީޑިޔާގައި ހުރިހާ މުސްލިމުން ދިޔައީ އުރުދުޣާންއަށް "ސެލިއުޓް" ކުރަމުންނެވެ. އަދި މިޔަންމާގައި މުސްލިމުންނާ ދެކޮޅަށް ހިންގަމުންދާ ޖަރީމާތައް އދ. އަށް ވެސް ނުހުއްޓުވިއްޖެނަމަ ތުރުކީގެ އަސްކަރީ ފައުޖުތައް އޮތީ މިޔަންމާއާ ހަމައަށް ވާސިލްވެ އެކަން ހަމައަކަށް އަޅުވާލަން ތައްޔާރަށް ކަމަށް އުރުދުޣާން ވިދާޅުވި ބަސްފުޅު ވެގެން ދިޔައީ ދުނިޔޭގެ ކަންކޮޅު ތަކުގައި އުޅޭ ހުރިހާ މުސްލިމުންގެ ހިތް އެކަތިފަހަރުން އުރުދުޣާން ފަތަހަ ކުރުންފަދަ ކަމަކަށެވެ.
މިޔަންމާގެ ސިފައިންގެ އަނިޔާވެރިކަން އިންތިހާއަށް ގޮސް ސިފައިންނާއި ބުޑިސްޓުން ރަކީން އަވަށަށް އަރައި "އެޔެއްމިޔެއް ނުބަލައި" އަންހެނުންނާއި ކުޑަކުދިންނާއި މުސްކުޅިންނާ ދެކޮޅަށް ހިންގާ ލާއިންސާނީ ޖަރީމާތަކާހުރެ މުސްލިމުންނާއި އެހެން ދީންތަކުގެ މީހުންގެ ފާޑުކިޔުންވެސް އެންމެ ބޮޑަށް އަމާޒުވި މިޔަންމާގެ އެންމެ ނުފޫޒުގަދަ ލީޑަރ ސޫކީ ބަހެއް ވިދާޅުނުވެ ހިމޭނުން ހުންނެވި ހުންނެވުމަށް ނިމުން ގެނައީވެސް އުރުދުޣާންގެ ފޯން ކޯލަކުންނެވެ. އެކަމަނާ ހަމަ އެންމެ ބަހެއްވެސް ވިދާޅުނުވެ ހުންނަވަނިކޮށް އުދުޣާން އެކަމަނާއަށް ފޯނު ކުރެއްވުމާއެކު ދެބޭފުޅުންގެ މެދުގައި ދެކެވުނު ބަޔެއް ވާހަކަތައް ސޫކީގެ ރަސްމީ އޮފީހުން އާންމު ކުރަން މަޖުބޫރުވުމާއެކު ސޯޝަލް މީޑިޔާގައި އެއްބަޔަކު ބުނަމުން ދިޔައީ "އުރުދުޣާންގެ ފޯނު ކޯލަކުން ސޫކީ ސައިޒް ކޮށްލައިފި" ކަމަށެވެ.
އުދުޣާންއަށް މުޅި އިސްލާމީ އުންމަތުގެ ތައުރީފް އޮއްސަމުން ދަނިކޮށް ދެން ފެނުނީ އުރުދުޣާންގެ ފަހަތްޕުޅުން އަނބިކަނބަލުން އެމިނެ އުރުދުޣާންވެސް ރޮހިންޖާ މުސްލިމުންގެ ހައްގުގައި ފޫގަޅާފައި ނުކުންނެވި ތަނެވެ. މިޔަންމާއިން ބިރުން ނުކުމެގެން ގޮސް ބަންގާޅަށް އެތެރެވި ރޮހިންޖާ މުސްލިމުންގެ ކައިރިއަށް ދަތުރު ހައްދަވާފައި އެކަމަނާ އެއޮތް ވަޑައިގަތީ ހާދަހާވާ އަވަހަކަށެވެ. ތުރުކީ ސަރުކާރުން ރޮހިންޖާ މުސްލިމުންނަށް ފޯރުކޮށްދޭ ބަޔެއް ހަދިޔާ ފޮށިގަނޑުތައް އެމީހުންގެ އަތަށް ސީދާ އެ ދިއްކޮށްލައްވަނީ ތުރުކީގެ ރައީސްގެ އަނބިކަނބަލުން އެމިނާ އުރުދުޣާންއެވެ. އެއާއެކު އެކަމަނާ މިހާރު ވެގެން ގޮސްފައި ވަނީ މިވަގުތު އިސްލާމީ އުންމަތުގެ "މަންމަ" ކަމަށެވެ. ބަންގާޅަށް ވަޑައިގެން އަމިނެ ވިދާޅުވެފައި ވަނީ މިޔަންމާގައި ރަހުމާއި ހަމްދަރުދީގެ ކަންފުޅެއްވެސް ނެތި އަނިޔާ ކުރަމުންދަނީ އެކަމަނާގެ ދަރިންނަށް ނޫންނަމަވެސް އެމަންޒަރުތައް ފެނުމުން ހާދަހާވާ ހިތަށް ތަދުވާ ކަމަށެވެ. އުރުދުޣާންއެކޭ އެއްފަދައިން މުސްލިމުންގެ ލޯބި އެކަމަނާއަށްވެސް ދީ ތައުރީފުގެ ބަސްތައް ސޯޝަލް މީޑިޔާގައި އެހެރަގެން ދަނީ ބަނޑުން ކުރަމުންނެވެ.
އުރުދުޣާން އާއި އުރުދުޣާންގެ އަނބިކަނބަލުން ރޮހިންޖާ މުސްލިމުންނަށް އެހީތެރިވެ އެމީހުންގެ މައްސަލަތަކަށް ޙައްލެއް ހޯދައިދިނުމަށް ފެށި މަސައްކަތަށް މުޅި އެއާއިލާ މިހާރު ވަނީ ވަދެފައެވެ. އެހެންކަމުން ތުރުކީގެ ރައްޔިތުންގެ ލޯތްބާއި، ދުނިޔޭގެ ހުރިހާ ކަންކޮޅު ތަކުގައި ދިރިއުޅޭ މުސްލިމުންގެ ލޯބި މިދެބޭފުޅުން މިފަހަރު ހޯއްދަވައިފިއެވެ. ޝުކުރާއި ތައުރީފުގެ ބަސްތައް އެދެބޭފުޅުންނަށް އޮހެމުން ދިޔަސް ދެބޭފުޅުންގެ މަސައްކަތުގެ ބޮޑުބައި އަދި އޮތީއެވެ.
ތުރުކީގެ ރައީސްގެ ދެކަނބަލުންނަށް ހަމަ އައްސަރިބަހުން ސާބަހެވެ. ރޮހިންޖާ މުސްލިމުންގެ ޙައްގުގައި ތިޔަ ދެކަނބަލުން ތިޔަކުރައްވާ މަސައްކަތުގައި ﷲ ބަރަކާތް ލައްވާށީއެވެ. އާމީން
