ކަޝްމީރުގެ އިންޑިޔާ ފަޅީގެ އާބާދީގެ ނިސްބަތް ބަދަލުކުރުމުގެ މަސައްކަތް އިންޑިޔާ ސަރުކާރުން ފަށާފައި ވާތީ ކަޝްމީރު މީހުންގެ ކަންބޮޑުވުން ދަނީ އިތުރުވަމުންނެވެ. ކަޝްމީރަަށް އިންޑިޔާ ގާނޫނު އަސާސީގައި ދީފައި އޮތް ޚާއްސަ ހާލަތު ފާއިތުވި އަހަރު އުވާލުމަށް ފަހު، ހިންދޫ ވަޠަނިއްޔަަތަށް ގޮވާލާ ބާރަތިޔާ ޖަނަތާ ޕާޓީ (ބީޖޭޕީ) ގެ ސަރުކާރުން މިހާރު ދަނީ އެ ސަރަހައްދުގެ އާބާދީގައި ކަޝްމީރު މީހުންގެ ނިސްބަތް ދަށްކޮށް އެހެން ސަރަހައްދުތަކުގެ މީހުންގެ ނިސްބަތް އިތުރުކުުރުމަށް މަސައްކަތްކުރަމުންނެވެ.
ފާއިތުވި އެޕްރީލް މަހު ބޮޑުވަޒީރު ނަރެންދްރަ މޯދީގެ ސަރުކާރުން ވަނީ ކަޝްމީރުގައި އިންޑިޔާގެ އެހެން ސަރަހައްދުތަކުގެ މީހުން ވަޒަންވެރިވުމަށް މަގުފަހިކުރާ ގާނޫނުތައް ތައާރަފުކޮށްފައެވެ. ޚަަބަރު ލިބޭ ގޮތުގައި މި ގާނޫނުތައް ވުޖޫދަށް އައުމާއެކު ކަޝްމީރުގައި ވަޒަންވެރިވުުމުގެ ހުއްދަައަށް އެދި 33 ހާސް މީހުން ހުށަހެޅިކަމަށް ވެއެވެ.
މި ހުށަހެޅުން ތައް ބެލުމަށް ފަހު ސަރުކާރުން ވަނީ ފާއިތުވި މޭ މަހުގެ 18 ވަނަ ދުވަހުން ފެށިގެން އެެހެން ސަރަހައްދުތަކުގެ 25 ހާސް މީހުންނަށް ކަޝްމީރުގައި ވަޒަންވަރިވުމުގެ ހުއްދަދީފައެވެ. މިއީ، އާބާދީގައި ގާތްގަނޑަކަށް %70 މުސްލިމުން ހިމެނޭ ކަޝްމީރުގައި އެމީހުންގެ ނިސްބަތް ދަށްކޮށްލަން ކުރެވޭ މަސައްކަތުގެ ފެށުން ކަމަށް ބެލެެވެއެވެ.
އަލަށް ތައާރަފުކޮށްފައިވާ ގާނޫނުތަކުގެ ދަށުން ކަޝްމީރުގައި 15 އަހަރުު ދިިރިއުޅެފައިވާ މީހުންނަށާއި، އެ ސަރަހައްދުގައި އަށް އަހަރު ދުވަހު ކިޔަވަން އުޅެފައިވާ މީހުންނަށް ކަޝްމީރުގެ ރަށްވެއްސަކަށް ވުމުގެ ފުރުސަތު ލިބޭނެއެވެ. އަދި ކަޝްމީރަށް ހިޖުރަކޮށްފައިވާ މީހުންގެ ގޮތުގައި ކުރިން ރަޖިސްޓަރީކޮށްފައިވާ މީހުންނަށާއި، ކަޝްމީރުުގެ ސަރުކާރުގެ ވަޒީފާއެެއްގައި އުޅޭތާ 10 އަަހަރުވެފައިވާ މީހުންގެ ދަރިންނަށް ވެސް ވަޒަންވެރިވުުމުގެ ފުރުސަތު ދެވޭނެއެވެ.
"ސާފުކޮށް އެެނގޭ ފަދައިން، މިކަމުގެ މަގުސަދަކީ އާބާދީގެ ނިސްބަތް ބަދަލުކޮށްލުން. ބަދަލުކޮށްލުމެއް ވެސް ނޫން، އާބާދީ ގެ ތެރެއަށް (ބޭރު މީހުންެގެ) ސައިލެއް ދޫކޮށްލުން." ކަޝްމީރުގެ ސިޔާސީ މުހައްލިލެއް ކަމުގަައިވާ ސިއްދީޤު ވާޙިދު ވިދާޅުވިއެވެ.
"(ގާނޫނު އަސާސީގެ) 370 ވަނަ މައްދާ (ކަޝްމީރަށް ޚާއްސަ އިމްތިޔާޒުތަކެއް ދީފައި އޮތް މާއްދާ) އުވާލުމުގެ މުޅި މަގުސަަދަކީ މި ސްޓޭޓުގެ އާބާދީގެ ނިސްބަތް ބަދަލުކޮށްލުން. މިހާރު މިވަނީ އިންޑިޔާގެ އާބާދީއެއްގެ އެެތައް ގިންތިއެެއްގެ މީހުންނަށް މިތަނުގައި ވަޒަންވެރިވުމުގެ ހައްގުދީ އެކަމަށް ގާނޫނީ ސިފަ ދީފައި." ކަޝްމީރުގައި ގާނޫނީ ދާއިރާއިން ކިޔަައިދެއްވާ ޕްރޮފެސަރެއް ކަމުގައިވާ ޝޭޚް ޝައުކަތު ޙުސައިން ވިދާޅުވިއެވެ.
5 އޮގަސްޓ 2019 ގައި ގާނޫނު އަސާސީގެ 370 ވަނަ މާއްދާ އުވާލުމާއެކު ކަޝްމީރު މީހުންގެ ތެރެއިން ގިނަ އަދަދެއްގެ ބަޔަކު ވަނީ ކަޝްމީރުގެ އާބާދީގެ ނިސްބަތް ބަދަލުކުރަން ކުރާ މަސައްކަތް ހުއްޓުވަން ހަތިޔާރު އުފުލަން ނިންމައިފައެވެ. މި މީހުން ގުޅިގެން ރެސިސްޓެންސް ފްރަންޓްގެ ނަމުގައި ފާއިތުވި އަަހަރުގެ އޮކްޓޯބަރު މަހުގެ ތެރޭގައި ހަތިޔާރުއެޅި ޖަމާއަތެއް އުފައްދާފައި ވާއިރު، އެ ޖަމާއަތުން ދިން ހަމަލާތަކުގައި މިހާތަނަށް އިންޑިޔާ ސިފައިންގެ 9 މީހުން މަރާލާފައި ވެއެވެ. މީގެ ތެރޭގައި ކާނަލް ރޭންކުގެ އޮފިސަރަކުވެސް ހިމެނެއެވެ.
