ޑިމޮކްރެޓިކް ރިޕަބްލިކް އޮފް ކޮންގޯ (ޑީއާރް ކޮންގޯ) ގެ އިރުއުތުރުގައި ހިންގި ގަތުލުއާއްމެއްގައި މަދުވެގެން 40 މީހުން މަރާލައިފިއެވެ. ޔޫގެންޑާގެ ސަރަހައްދީ ރޮނގާ ކައިރި ޖަންގަލީ ސަަރަހައްދުގައި ހިންގި މި ޖަރީމާގައި މަރާލާފައި ވަނީ އާއްމުންނެވެ.
އިރު އުތުގައި އޮންނަ އިޓޫރީ ޕްރޮވިންސުގެ ވެރިރަށް ބުނިޔާގެ ހުޅަނގު ދެކުނުން 100 ކިލޯމީޓަރު ދުރުގައި އޮންނަ ސަންބޯކޯ އަވަށުގައި ގަތުލުއާއްމު ހިންގާފައި ވަނީ ހަރުކަށި ޖަމާއަތެެއް ކަމުގައިވާ އެލައިޑް ޑިމޮކްރެޓިކް ފޯސަސް (އޭޑީއެފް) ގެ ހަނގުރާމަވެރިންނެވެ. ހާހަކަށް ވުރެ މަދު ހަނގުރާމަވެރިންގެ މިޖަމާއަތް 1996 ގައި އުފެދި ފުރަތަމަ އަރަކާތްތެރިވަމުން އައިސްފައި ވަނީ ޑީއާރް ކޮންގޯއާއި ޔޫގެންޑާގައެވެ. އެހެންނަަމެވެސް، 90 ގެ އަހަރުތަކުގެ ފަހުކޮޅު މި ޖަމާއަތް ވަނީ ޔޫގެންޑާއިން ބޭރުކޮށްލައިފައެވެ.
ޑީއާރް ކޮންގޯގައި ހަރަކާތްެރިވާ ޖަމާއަތެއް ކަމުގައިވާ ސްޓަޑީ ސެންޓަ ފޯ ދަ ޕްރޮމޯޝަން އޮފް ފީސް، ޑިމޮކްރެސީ އެންޑް ހިއުމަން ރައިޓްސް (ސީއީޕީއޭޑީއެޗްއޯ) ގެ ތަރުޖަަމާނު އުމަރު ކަވޯތާ ވިދާޅުވިގޮތުގައި އަންގާރަ ދުވަހު ހަނގުރާމަވެރިން ޖަންބިޔާ ހިފައިގެން އެ އަވަށަށް އަރައި މަދުވެގެން 40 މީހުން މަރައި، މުދަލާއި، ކާބޯތަކެތި ލޫޓުވައިގެން ގެންގޮސްފައި ވަނީ، އޭގެ އެއް ދުވަސްކުރިން މަކުޓާނޯ އަވަށަށް އަރައި 17 މީހުން މަރާލުމަށް ފަހުއެވެ.
ޑީއާރް ކޮންގޯގެ ސަލާމަތީ ބާރުތަކުން ފާއިތުވިއަރު އޭޑީއެފް މަރުކަޒުތަކަށް ހަމަލާދޭން ފެށިފަހުން އެ ޖަމާއަތުގެ ހަނގުރާމަވެރިން ވަނީ މިގޮތަށް އަވަށްތަކަށް އަރައި 400 އެއްހާ މީހުން މަރާފައެވެ.
އޭޑީއެފްއިން ދައުވާކުރާ ގޮތުގައި އެޖަމާއަތަކީ އިސްލާމިކް ސްޓޭޓް (އައިސިސް)އާ ގުޅިގެން މަސައްކަތްކުރާ ބައެކެވެ. އެހެންނަަމަވެސް، އެެ ޖަމާއަތާ އައިސިސްއާ ގާތް ގުޅުމެއް އޮންނަަ ކަމުގެ އެއްވެސް ހެއްކެއް ފެނިފައި ނުވެއެވެ.
ހަނގުރާމަވެރި ޖަމާއަތްތަކުން އަވަށްތަކަށް އަރައި ހިންގާ ޖަރީމާތަކުގެ ސަބަބުން އިޓޫރީ ޕްރޮވިންސުގެ އަވަށްތަކުގައި ދިރިއުޅޭ 2 ލައްކައެއްހާ މީހުން ވަނީ އެމީހުންގެ ގެދޮރު ދޫކޮށް ފިލާފައެވެ.
