މާލޭގެ މަގެއްގެ މައްޗަށް ހޭނެތިގެން ވެއްޓިފައި އޮތް އަންހެނަކު ހޮސްޕިޓަލަށް ގެންގޮސް ފަރުވާ ދީފިއެވެ.
ޗަމްޕާ މަގަށް އަންހެނަކު ވެއްޓިފައި އޮތް ކަމުގެ މަޢުލޫމާތު ފުލުހުންނަށް ލިބުނީ ރޭ މެންދަމުން އަލިވެ 3:30 ހާއިރުކަމަށް ފުލުހުން ވިދާޅުވިއެވެ. އެވަގުތު އެމްބިއުލާސް ބިޒީވުމުން ފުލުހުން އެސަރަޙައްދަށް ގޮސް ވެއްޓިފައިވާ އަންހެން މީހާ އައިޖީއެމްއެޗަށް ގެންދިޔައީ ފުލުހުންގެ ވެހިކަލްގައެވެ. އެމީހާ ހޭ އެރީ ފަތިހު 4:30 އެހާކަންހާއިރު ކަމަށް ފުލުހުން ވަނީ ހާމަކޮށްފައެވެ. އެ އަންހެން މީހާ އަކީ ޢުމުރުން 18 އަހަރުގެ ދިވެއްސެކެވެ. އެ ހާދިސާ އާ ގުޅޭ ގޮތުން ބަލަންޖެހޭ ކަންކަން ބަލަމުން ގެންދާ ކަމަށް ވެސް ފުލުހުން ވަނީ ބުނެފައެވެ.
ޚަބަރު: މޯލްޑިވްސް ޕޮލިސް
