ރާއްޖޭގެ ކޮވިޑް ޙާލަތު ދެނެގަތުމުން ހޯދައިފައިވާ އަންދާޒާތަކުން ދައްކާ ގޮތުން މާބަނޑު މީހުންގެ ތެރެއިން 15 އިންސައްތަ މީހުންނަށް މި ބަލި ޖެހުމުގެ ފުރުޞަތު އެބަ އޮތްކަމަށް އަންދާޒާތަކުން ދައްކައެވެ.
ނެޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ޕްރެސް ކޮންފަރެންސްގައި މިއަންދާޒާތައް ހާމަކުރެއްވީ އައިޖީއެމްއެޗްގެ، އަންހެނުންގެ ބަލިތަކާ ބެހޭ ޚާއްޞަ ޑޮކްޓަރ އަސީލް ޖަލީލެވެ. ޑރ. އަސީލް ވިދާޅުވީ އަންދާޒާކުރާ ނިސްބަތަށް، ބަލާއިރު 5878 މާބަނޑު މީހުންނަށް މިބަލި ޖެހުމުގެ ފުރުޞަތު އޮންނާނެކަމަށެވެ. ނަމަވެސް ހަތަރު މަސް ދުވަހުގެ ތެރޭގައި 50 އިންސައްތަ ބަލިޖެހޭ ނިސްބަތްދަށް ކުރެވިއްޖެނަމަ ބަލިޖެހުމުގެ ފުރުޞަތު އޮންނާނީ 2351 މާބަނޑު މީހުންނަށް ކަމަށެވެ. އޭގެތެރެއިން 355 މީހުން ހޮސްޕިޓަލުގައި އެޑް މިޓްކުރަން ޖެހިދާނެ ކަމަށެވެ. 118 މީހުން އައިސީޔޫގައި ފަރުވާ ދޭންޖެހިދާނެކަމަށެވެ. މިފަދަ ޢަދަދުތަކެއް އަންދާޒާގައި ހުރި ނަމަވެސް އެޗްޕީއޭގެ އިރުޝާދުތަކާ އެއްގޮތަށް ޢަމަލު ކުރެވޭކަމަށް ވަންޏާ ޢަދަދުތަކަކީ ވަރަށް ބޮޑަތަން ދަށްކުރެވޭނެ ޢަދަދުތަކެއް ކަމަށް ޑރ. އަސީލް ވިދާޅުވިއެވެ.
"މިކަންކަން ކުރުމުގައި ސަމާލުވެލަންވީ ހަމައެކަނި އާއްމުން ނޫން. މާބަނޑުގެ މީހުންހެ ޚިދުމަތުގައި މަސައްކަތްކުރާ ހުރިހާ އެންމެންވެސް މިޒިންމާ ނަގައިގެން މަސައްކަތް ކުރުމަކީ މާބަނޑުގެ މީހުންގެ ޙައްޤުގައި އަޅުގަނޑު ވަރަށްބޮޑަށް އެދޭކަމެއް." ޑރ. އަސީލް ވިދާޅުވިއެވެ.
ކޮވިޑާ ގުޅިގެން އައިޖީއެމްއެޗްގައި ވަނީ މާބަނޑު މީހުންނަށް ޚިދުމަތް ދިނުމަށް ޚާއްސަ އިންތިޒާމްތަކެއް ހަމަޖައްސައިފައެވެ. ޑރ. އަސީލް ވިދާޅުވީ އަންނަ ޖުލައި މަހާ ހަމައަށް ވިހާ ހުރިހާ މާބަނޑު މީހުންގެ މައުލޫމާތު އެއްކޮށް، އެ މީހުން ވިހާއިރު ދިރިއުޅޭނެ ތަންތަނުގެ މައުލޫމާތު ވެސް އެއްކޮށްފައިވާ ކަމަށެވެ. އަދި އިމަޖެންސީގައި މާބަނޑު މީހަކު ގެނަޔަސް، އެ މީހާއާ ބެހޭ މައުލޫމާތު ލިބޭނެ ގޮތަށް ރެކޯޑްތައް ބަލަހައްޓަމުންދާކަމަށެވެ. މީގެ އިތުރުން މާބަޑު މީހުން ހޮސްޕިޓަލަށް ނުގޮސް އޮންލައިންކޮށް ޑޮކްޓަރަށް ދެއްކޭނެ އިންތިޒާމްތައް ވަނީ ހަމަޖައްސަވައިފައެވެ. ނަމަވެސް ބައެއް ހާލަތްތަކުގައި މާބަނޑު މީހުން ޑޮކްޓަރަށް ދައްކަން ހޮސްޕިޓަލަށް ގެންދަން ޖެހޭތީ އެކަމަށް ޚާއްސަ އިންތިޒާމްތަކެއް މިހާރު ހަމަޖައްސާފައިވާ ކަމަށް ވެސް ޑޮކްޓަރ އަސީލް ވިދާޅުވިއެވެ. އެގޮތުން ކޮންމެ ހަފްތާއެއްގެ ބުދަ ދުވަހު ހެނދުނު 9 އާއި 12 އާ ދޭ ތެރޭގައި އެކަމަށް ޤާއިމްކޮށްފައިވާ ކްލިނިކުން މާބާނޑު މީހުން ބަލަމުން ދިއުމަށް ވަނީ ހަމަޖައްސައިފައެވެ. މާބަނޑު މީހުން ބަލަމުންދާނީ ސިއްހީ މިންގަނޑުގެ ތެރެއިން ޕީޕީއީ ބޭނުން ކުރެވިގެންކަމަށް ވެސް ޑރ. އަސީލް ފާހަގަ ކުރެއްވިއެވެ.
މިހާރު ކޮވިޑަށް ޕޮޒިޓިވް ވެފައިވާ މީހުންގެ ތެރޭގައި މާބނޑު މީހަކު ހިމެނެއެވެ. އަދި އަލާމާތްތައް ހުރި މީހުން ތެރޭގައި ކޮންމެވެސް ވަރަށް މާބަނޑު މީހުން ހިމެނޭކަމަށް ޑޮކްޓަރ އަސީލް ވިދާޅުވިއެވެ. އެމީހުންގެ ޙާލު ވަރަށް ގާތުން ބައްލަވަމުން ދާކަމަށް ވެސް ޑޮކްޓަރ އަސީލް ވިދާޅުވިއެވެ. ނަމަވެސް މާބނޑު މީހުންނަށް ބަލި ޖެހިފައި އަދި އަލާމަތް ފެނިވާ މިންވަރަށް ބަލާއިރު، މާބަނޑު މީހުނާއި އެމީހުންގެ ޢާއިލާތަކުން ޑޮކްޓަރުން ދެއްވާ އިރުޝާދާއި ލަފާ ވަރަށް ބޮޑަށް ޤަބޫލުކޮށް އެގޮތަށް ޢަމަލު ކުރާކަމަށް ޤަބޫލު ކުރެއްވޭ ކަމަށް ޑރ. އަސީލް ފާހަގަކުރެއްވިއެވެ.
ވޭތުވެ ދިޔަ ދެ އަހަރަށް ބަލާއިރު ރާއްޖޭގައި އަހަރަކު 6915 މީހުން މާބަނޑުވެ ވިހާފައި ވާކަމަށް އަންހެނުންގެ ބަލިތަކާ ބެހޭ ޚާއްޞަ ޑޮކްޓަރ އަސީލް ޖަލީލް ވިދާޅުވިއެވެ.
ކޮވިޑަށް ޕޮޒިޓިވްވިކަމަށް މިރޭ އިޢުލާން ކުރި 11 މީހުނާއެކު މިހާތަކަށް ރާއްޖެއިން ޕޮޒިޓިވް މީހުންގެ ޢަދަދު ވަނީ 128 އަރާފައެވެ. ތިން މީހަކު ބަލިން ރަނގަޅު ވެފައި ވާއިރު ޑަބަލް ނެގެޓިވް ދެމީހުން ވަނީ ދޫކޮށްލައި ފައެވެ. އަދި ތިން ވަނަ މީހާވެސް ޑަބަލް ނެގެޓިވް ވުމުން ދޫކޮށްލާނެކަމަށް އެންއީއޯސީ އިން ވަނީ ވިދާޅުވެފައެވެ.
