ނޮވެލް ކޮރޯނާ ވައިރަސް (ކޮވިޑް- 19) ޖެހިވަޑައިގެން އެބައްޔަށް ފަރުވާ ހޯއްދަވަމުން ގެެންދަވާ، އިނގިރޭސިވިލާތުގެ ބޮޑުވަޒީރު ބޮރިސް ޖޮންސަން ހޮސްޕިޓަލުގައި އެޑްމިޓް ކޮށްފިއެވެ. ބޮޑުވަޒީރުގެ އޮފީސް، 10 ޑައުނިންގް ސްޓްރީޓުން ބުނި ގޮތުގައި އޭނާ އެޑްމިޓްކުރީ ބައްޔަށް ފަރުވާ ހޯއްދަވަން ގެންދަވާތާ 10 ދުވަސްވީ އިރުވެސް ބަލީގެ އަލާމާތްތައް ހުރީމައެވެ.
ބޮޑުވަޒީރުގެ އޮފީހުން ބުނިގޮތުގައި އެއީ "ރައްކާތެރިކަމުގެ ގޮތުން" އެޅި ފިޔަވަޅެކެވެ. ކުއްލި ހާލަތެއް ދިމާވެގެން ކުރި ކަމެއް ނޫނެވެ.
"އޭނާގެ ޑޮކްޓަރުންގެ ލަފާގެ މަތިން، ބޮޑުވަޒީރު ވަނީ ޓެސްޓްތަކެއް ހެދުމަށް މިރޭ ހޮސްޕިޓަލުގައި އެޑްމިޓްކުރެވުނީ. މިއީ ރައްކާތެރިކަމުގެ ގޮތުން އެޅިފިޔަވަޅެއް. އެއީ، ބޮޑުވަޒީރު ކޮރޯނާވައިރަސްއަށް ޕްޒިޓިވްވިތާ 10 ދުވަސް ވީއިރުވެސް ބަލީގެ އަލާމާތްތައް ފެންނަމުންދާތީ." 10 ޑައުނިންގް ސްޓްރީޓުން ބުންޏެވެ.
މާރިޗު މަހުގެ 27 ވަނަ ދުވަހު އޭނާ ހެެއްދެވި ކޮރޯނާ ވައިރަސްގެ ޓެސްޓް ޕޮޒިޓިވް ވެފައިވާކަން އިއުލާންކުރެއްވުމާއެކު، އުމުރުފުޅުން 55 އަހަރުގެ ބޮޑުވަޒީރު ބޮރިސް ޖޮންސަން ވެވަޑައިގެންފައި ވަނީ ދުނިިޔޭގެ ބޮޑެތި ބާރުތަކުގެ ވެރިންގެ ތެރެއިން އެ ބަލި ޖެހިވަޑައިގަތް ފުރަތަަމަ ބޭފުޅާއަށެވެ. އެ ދުވަހުއްސުރެ އޭނާ ހުންނެވީ 10 ޑައުނިންގް ސްޓްރީޓުގައި އެކަހެރިވެވަޑައިގެންނެވެ.
އިނގިރޭސި ބޮޑުވަޒީރު ހޮސްޕިޓަލުގައި އެޑްމިޓްކުރެވުނު އިރު، އިއްޔެ ވަނީ ލީބިޔާގެ ކުރީގެ ބޮޑުވަޒީރު މަޙްމޫދު ޖިބްރީލު ކޮވިޑް- 19 ބަލީގައި އަވަހާރަވެފައެވެ. ކާނަލް ޤައްޒާފީގެ ވެރިކަން ނިމުމަކަށް އައުމަށްފަހު އުފެދުނު ފުރަތަމަ ސަރުކާރުގެ ބޮޑުވަޒީރު އަވަހާރަވީ އެބައްޔަށް މިސްރުގެ ޤާހިރާގެ ހޮސްޕިޓަލެއްގައި ފަރުވާ ހޯއްދަަަވަމުން ގެންދަވަނިކޮށެވެ.
މުޅި ދުނިޔޭގައި ހަލުވިކަމާއެކު ފެތުރެމުންދާ ކޮވިޑް- 19 މިހާތަނަށް 1.27 މިލިއަން މީހުންނަށް ޖެހިފައި ވާއިރު، މިބަލީގައި މަރުވި މީހުންގެ އަދަދު 70 ހާހާ ގާތްކުރެއެވެ. އިނގިރޭސިވިލާތުގައި ވެެސް މިބަލި 47 ހާހަށްވުރެ ގިނަ މީހުންނަށް ޖެހިފައި ވާއިރު، އެ ގައުމުގެ 5 ހާހާ ގާތްކުރާ އަދަދެއްގެ މީހުން ވަނީ މި ބަލީގައި މަރުވެފައެވެ.
