މާދަމާއިން ފެށިގެން އާސަންދަ ކުންފުނީގެ ރަސްމީގަޑިއަށް ބަދަލު ގެންނަން އެކުންފުނީން މިއަދު ނިންމަވައިފިއެވެ.
އާސަންދަ ކުންފުނީން ވިދާޅުވީ މާދަމާއިން ފެށިގެން އެޕްރީލް 23 ގެ ނިޔަލަށް އެކުންފުނީގެ ރަސްމީގަޑިއެއްގެ ގޮތުގައި ހަމަޖައްސަވާފައިވާނީ ހެނދުނު 8:00 އިން ފެށިގެން މެންދުރު ފަހު 2:00 އަށް ކަމަށެވެ. އެކުންފުނީގެ މިހާރުގެ ރަސްމީގަޑިއަކީ ހެނދުނު 8:00 އިން ހަވީރު 4:00 އެވެ.
މާދަމާއިން ފެށިގެން ރަސްމީގަޑިއަށް ބަދަލު ގެންނަވަން އެކުންފުނީން ނިންމެވީ ރާއްޖޭގައި ކޮވިޑް-19 އަށް ޕޮޒިޓިވްވާ މީހުން އިތުރުވަމުންދާތީ އެކުންފުނީގެ މުވައްޒަފުންގެ ރައްކާތެރި ކަމަށް ވިސްނަވާފައެވެ.
މި ބަދަލާއެކު އިންވޮއިސްތައް ބަލައިގަންނަ ގަޑިއަށްވެސް ވަނީ ބަދަލު ގެނެސްފައެވެ. ކުރިން ހެނދުނު 8:30 އިން މެންދުރު ފަހު 3:30 އަށް ބަލައިގަންނަމުންއައި އިންވޮއިސްތައް މާދަމާއިން ފެށިގެން ބަލައިގަންނާނީ ހެނދުނު 8:30 މެންދުރު 1:30 އަށް ކަމަށް ވެސް އާސަންދަ ކުންފުނިން ވަނީ ވިދާޅުވެފައެވެ.
ރަސްމީގަޑި ނިންމުމަށްފަހު ހުރިހާ މުވައްޒަފުން ގެއަށްދިއުމަށާއި، އެޗުޕީއޭގެ އިރުޝާދާ އެއްގޮތަށް އަމަލުކުރުމަށް އާސަންދަ ކުންފުނީން ވަނީ އެތަނުގެ މުވައްޒަފުންނަށް އިލްތިމާސް ކުރައްވައިފައެވެ.
