އިސްލާމްދީނަށް ފާޑުކައި، ދިވެހިރައްޔިތުންގެ ދީނީ އެއްބައިވަންތަކަމާއި، މުޖުތަމައުގެ އެއްބައިވަންތަކަން ނަގާލަން މަސައްކަތްކުރަމުން ދިޔަ މީހަކު ބަންދުކޮށްފި ކަމަށް ފުލުހުން ވިދާޅުވެއްޖެއެވެ.
އެމީހާ ބަންދުކޮށްފައިވަނީ މާލެއިންނެވެ. ޢުމުރުން 37 އަހަރުގެ އެމީހާ ބަންދުކޮށްފައިވަނީ ކޯޓު އަމުރެއްގެ ދަށުން މިއަދު ހެނދުނު ކަމަށް ފުލުހުން ވިދާޅުވިއެވެ. އޭނާއަކީ މީގެ ކުރިން ވެސް މިފަދަ މައްސަލައެއްގައި ގދ. ތިނަދޫއިން ބަންދު ކުރި މީހެކެވެ. އެފަހަރު އޭނާ ބަންދުކުރީ މިދިޔަ އަހަރު ސެޕްޓެމްބަރު މަހުގައެވެ.
އޭނާ އެފަހަރު ބަންދު ކުރުމަށްފަހު މައްސަލަ ތަހުގީގުކޮށް އޭނާގެ މައްޗަށް ދައުވާ ކޮށްދިނުމަށް ޕީޖީއަށް ވެސް ވަނީ ފޮނުވައިފައެވެ. ޕީޖީން އޭނާގެ މައްޗަށް ދައުވާކުރަން ކޯޓަށް ފޮނުވާފައިވަނިކޮށް ކޯޓުން އޭނާ ދޫކޮށްލީ މިމަހުގެ 9 ވަނަ ދުވަހުއެވެ. އޭނާ ދޫކޮށްލިއިރު ހުރީ މޯލްޑިވްސް ކަރެކްޝަންސްގެ ބަންދުގައެވެ. އޭނާ ދޫކޮށްލުމާއެކު އަނެއްކާވެސް ވަނީ އިސްލާމްދީނާ ދެކޮޅު ވާހަކަތައް ސޯޝަލް މީޑިއާގައި ލިޔަން ފަށައިފައެވެ. އޭނާ ބަންދު ކުރުމަށްފަހު އަނެއްކާ ވެސް އެމައްސަލަ ބަލަމުންދާ ކަމަށް ފުލުހުން ވިދާޅުވިއެވެ.
