މީގެ ދެ އަހަރުކުރިން މަތިންދާބޯޓެއް ގޮއްވާލަން ރޭވިކަމުގެ ކުށުގައި ސިޑްނީގެ ދެބެއިން ކަމަށްވާ ޚާލިދު ޚައްޔާޠު (52 އ.) އާއި މަޙްމޫދު ޚައްޔާތު (34 އ.) ދިގުމުއްތަކަށް ޖަލަށްލުމަށް އޮސްޓްރޭލިޔާގެ ކޯޓަކުން ހުކުމްކޮށްފިއެވެ. ދެބެއިންގެ މައްޗަށް ސާބިތުވެފައި ވަނީ 2017 ވަނަ އަހަރުގެ ޖަނަވަރީ މަހާއި ޖުލައި މަހާއި ދެމެދު މަތިންދާބޯޓެއް ގޮއްވާލަން ރާވައި، އެކަން އަމަލީ ގޮތުން ކުރަން އުޅުނު ކަމުގެ ކުށެވެ.
ނިއު ސައުތުވޭލް ސްޓޭޓުގެ ސުޕްރީމް ކޯޓުގެ ފަނޑިޔާރު ކްރިސްޓީން އެޑަމްސަން ހުކުމްކުރެއްވީ ޚާލިދު ޚައްޔާޠު 40 އަހަރަށް، އަދި އޭނާގެ ކޮއްކޮ އާމިރު ހަޔާތު 36 އަހަރަށް ޖަލަށްލުމަށެވެ. ކަފާލާތުގެ ދަށުންވެސް ޚާލިދު ހަޔާތު ދޫކުރެވޭނީ 30 އަހަރު ފަހުންނެވެ. އަދި އާމިރު ހަޔާތު ދޫކުރެވޭނީ 27 އަހަރު ފަހުންނެވެ.
ޚައްޔާޠު ދެބެއިން ވަނީ 2017 ވަނަ އަހަރުގެ ޖުލައި މަހު 15 ވަނަ ދުވަހު އޮސްޓްރޭލިޔާގެ ސިޑްނީން ޔުނައިޓެޑް އަރަބް އެމިރޭޓްސް (ޔޫއޭއީ) ގެ އަބޫދާބީއަށް ފުރަން އޮތް އިއްތިހާދް އެއަވޭޒްގެ މަތިންދާބޯޓެއްގައި ބޮން ގޮއްވާލަން މަސައްކަތްކޮށްފައެވެ. އެ ދުވަހުގެ އިއްތިހާދު އެއާވެޒްގެ ފްލައިޓުން ފުރަން ދިޔަ އެ ދެމީހުންގެ ކޮއްކޮ އާމިރު ޚައްޔާޠު ގެންދަން އުޅުން ލަގޭޖް ބަރުވުމުން، ބައެއް ސާމާނު ނަގަން ކައުންޓަރުން އެންގިއެވެ. އޭރު އެ ލަގެޖްގެ ތެރޭގައި ހުރި މަސް މުގުރާ މެޝިނެއްގެ ތެރޭގައި ބޮމެއް ފޮރުވާފައި އޮތެވެ. އެހެންނަމަވެސް، ބަރުވެގެން ބައެއް ތަކެތި ނަގަން އެންގުމުން ޚާލިދު ވަނީ އެ ބޮން ނަގާފައެވެ. ބޭޒާރުވެދާނެ ކަމުގެ ބިރަށެވެ. ދެބެއިން އެމީހުންގެ ކޮއްކޮގެ ލަގެޖަށް ބޮން ލީ އޭނާއަށް ނާންގައެވެ.
"(ދެމީހުން ކުރި) ކުށުގެ ނަތީޖާއެއްގެ ގޮތުން އެއްވެސް މީހަކަށް ޖިސްމާނީ އަނިޔާއެއްވެ، މީހަކު މަރުވެފައި ނުވި ނަމަވެސް، އެ ކުށަށް އަރައިގަތް މީހުން ވަނީ އާއްމުންގެ ހިތްތަކުގައި ބިރުވެރިކަން އުފެއްދުމުގައި ކާމިޔާބުވެފައި." ފަނޑިޔާރު އެޑަމްސަން އިއްވެވި ހުކުމުގައި ވެއެވެ.
މިއަދު ޖަލަށްލާން ހުކުމްކުރި ދެބެއިންނަކީވެސް ލެބްނާން (ލުބްނާން) އިން އޮސްޓްރޭލިޔާއަށް ހިޖުރަކޮށް އެގައުމުގެ ރައްޔިތުންނަށް ވެފައި ތިބި މީހުންނެވެ. ގަވާއިދުން ދީނީ ވާޖިބުތައް އަދާނުކުރި ނަމަވެސް ދެ މީހުންވެސް އިސްލާމިކް ސްޓޭޓް ޖަމާއަތަށް ތާއީދުކުރާ ކަމަށް ފަނޑިޔާރު ވިދާޅުވެފައި ވެއެވެ.
ދެބެއިންނަށް ބޮން ފޮނުވައި، މަތިންދާބޯޓު ގޮއްވާލުމުގެ ޕްލޭން ތައްޔާރުކުރީ ޚާލިދު ޚައްޔާޠުގެ ކޮއްކޮ ޠާރިޤު ޚައްޔާޠު އެވެ. އޭރު އޭނާ ދިޔައީ އިސްލާމިކް ސްޓޭޓާއި ގުޅިގެން ސީރިޔާގެ ރައްޤާގައި ހަނގުރާމަކުރަމުންނެވެ. ފަހުން އެމެރިކާ ސިފައިން ވަނީ ޠާރިޤު ހައްޔަރު އިރާގު ސަރުކާރާ ހަވާލުކޮށްފައެވެ. އަދި 2018 ވަނަ އަހަރުގެ ސެޕްޓެންބަރު މަހު އިރާގުގެ ކޯޓަކުން ވަނީ އޭނާގެ މައްޗަށް މަރުގެ ހުކުމް އިއްވާފައެވެ.
"މީހަކަށް އަނިޔާ ނުވުން އަދި މަރުނުވުން އެއީ، ކުރަން އުޅުނު ކުށް ނުރައްކާތެރި ނޫން ކުށަކަށް ހަދާނެ ކަމެއް ނޫން. ދެ މީހުންކުރެ ކޮންމެ މީހެއްގެ ވެސް މަގުސަދުގެ ނުރައްކާތެރިކަން އޮތީ ވަރަށް މަތިކޮށް." ފަނޑިޔާރު އެޑަމްސަން ވިދާޅުވިއެވެ.
