ކުޑަކުދިންގެ ހިޔާގައި ދިރިއުޅޭ ނުކުޅެދުންތެރިކަން ހުންނަ 13 އަހަރުގެ ކުޑަކުއްޖަކު ބަލިވެ އިންކަމަށް ބުނެ މީޑިއާގައި ފަތުރަނީ ދޮގު ޚަބަރެއް ކަމަށް މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އިން ވިދާޅުވެއްޖެއެވެ.
މިނިސްޓްރީން ވިދާޅުވެފައިވަނީ ދައުލަތުގެ ބެލުމުގެ ދަށުގައި ދިރިއުޅޭ ކުދިން ބަދުނާމުކޮށް އެފަދަ ދޮގުމަޢުލޫމާތު ފަތުރާތީ އެކަން ހަރުކަށި ޢިބާރާތުން ކުށްވެރި ކުރައްވާ ކަމަށެވެ. އަދި އެބާވަތުގެ އެއްވެސް އަސްލެއްނެތް ދޮގު މަޢުލޫމާތު ނުފެތުރުމަށް ވެސް މިނިސްޓްރީން ވަނީ އިލްތިމާސް ކޮށްފައެވެ.
"ކުޑަކުދިންގެ ހިޔާގައި ދިރިއުޅޭ ނުކުޅެދުންތެރިކަން ހުންނަ 13 އަހަރުގެ ކުޑަކުއްޖަކު ބަލިވެއިންކަމަށް ބުނެ ފަތުރަނީ ޙަޤީޤަތާ ޚިލާފު ޚަބަރެއް ކަމަށް ދަންނަވަމެވެ. އަދި ދައުލަތުގެ ބެލުމުގެ ދަށުގައި ދިރިއުޅޭ ކުދިން ބަދުނާމުކޮށް، އެ ފަދަ ޚަބަރުތައް ފަތުރާ ފަރާތްތައް ހަރުކަށި އިބާރާތުން ކުށްވެރިކޮށް، އެ ބާވަތުގެ ކަންކަން ނުކުރުމަށް އިލްތިމާސްކުރަމެވެ." ޖެންޑަރ އިން ވިދާޅުވެފައިވެއެވެ.
އެ ޢުމުރުން 13 އަހަރުގެ ކުއްޖަކު ކޯޓުން ބޭރުން "ކައިވެނި" ކޮށްގެން ބަނޑު ބޮޑުވެފައިވާ ކަމަށްބުނެ ފުހަށް ވެސް ވަނީ މައްސަލައެއް ހުށަހެޅި ފައެވެ. ފުލުހުން ގެންދަނީ އެމައްސަލަ ބަލަމުންނެވެ. އެކުއްޖާއާ "އިނދެގެން" އުޅެނީ ހައްމާދު ނަމަކަށް ކިޔާ މީހެއް ކަމަށް މަޢުލޫމާތު ލިބިފައިވެއެވެ.
ޢުމުރުން 26 އަހަރުގެ ހައްމާދު މިހާރުވަނީ އެމައްސަލާގައި ފުލުހުންގެ ބެލުމުގެ ދަށަށް ގެންގޮސްފައެވެ. އަދި އެ އަންހެން ކުއްޖާގެ މައިން ބަފައިން ވެސް ވަނީ ބަންދު ކޮށްފައެވެ. އޭގެ އިތުރަށް އެ ޢާއިލާގައި ހިމެނޭ 6 ކުއްޖަކަށް ވަނީ ރައްކާތެރިކަން ފޯރުކޮށްދިފައެވެ.
