އިރާގު ސަރުކާރާ ދެކޮޅަށް އެގައުމުގައި މުޒާހަރާކުރާ މީހުން ނަޖަފުގައި ހުންނަ އީރާނުގެ ކޮންސިއުލޭޓު އަންދާލައިފިއެވެ. އަދި އިއްޔެގެ މުޒާހަރާތަކުގައި ބައިވެރިވި މީހުންގެ ގަޔަށް ސަލާމަތީ ބާރުތަކުން ބަޑިޖެހުމުގެ ސަބަބުން 6 މީހުން މަރުވެފައި ވެއެވެ.
ފުލުހުންނާއި ސިވިލް ޑިފެންސްގެ ފަރާތުން މައުލޫމާތުު ދިިން ގޮތުގައި މުޒާހަރާކުރާ މީހުންވަނީ ރޭ އިރާކޮޅުގެ ވަގުތެއްގައި ނަޖަފުގައި ހުންނަ އީރާނުގެ ކޮންސިއުލޭޓަށް ވަދެގެންފައެވެ. އަދި މުޅި އިމާރާތުގައި ރޯކޮށްލާފައެވެ. މުޒާހަރާކުރާ މީހުން އެތަނުން ބޭރުކުރެވުނީ ކަރުނާ ގޭސް ބޭނުންކޮށްގެންނެވެ. މި ކަމުގެ ތެރޭގައި ފަންސާހަަކަށް މީހުންނަށް ވަނީ އެކިވަރުގެ އަނިޔާ ލިބިފައެވެ.
އިމާރާތުގައި ރޯކޮށްލުމުގެ ކުރިން އެތަނުގައި މަސައްކަތްކުރާ މީހުން ވަނީ ރައްކާތެރިކަމާއެކު އެތަނުން ނެރެފައެވެ.
ހުޅަނގުގެ ނިއުސް އެޖެންސީއަކުން ޚަބަރު ދިން ގޮތުގައި ކޮންސިއުލޭޓު ތެރެއަށް ވަދެގަތް މީހުން ދިޔައީ "އީރާނު ބޭރުކުރޭ" ގޮވަމުންނެވެ.
އިރާގުގެ އެއްގަމު ސިފައިން މިހާރު ވަނީ ނަޖަފު މުޅިން ބަންދުކޮށް ގައުމުގެ އެހެން ސަރަހައްދުތަކާ އެރަށް ވަކިކޮށްފައެވެ. އުޅަނދު ފަހަރު އެރަށަށް ވަދެ ނުކުތުން މަނާކޮށްފައެވެ. އަދި މުޅި ރަށުގައި ވަނީ ބޭރަށް ނުކުމެ އުޅުން މަނާކޮށް، ކާފިއު ހިންގާފައެވެ.
ކަރުބަލާގައި ހުންނަ އީރާނުގެ ކޮންސިއުލޭޓަށްްވެސް މުޒާހަރާކުރާ މީހުން މި މަހުގެ ކުރީކޮޅު ހަމަލާ ދީފައި ވެއެވެ. އެ ދުވަހު އެ ތަނަށް ވަދެގަތް މީހުންގެ ގަޔަށް ސަލާމަތީ ބާރުތަކުން ބަޑިޖެހުމުގެ ސަބަބުން 4 މީހުން މަރުވިއެވެ.
އިރާގުގެ ސަރުކާރު އިސްތިއުފާ ދިނުމަށް ގޮވާލައި މުޒާހަރާކުރާ މީހުންގެ ރުޅި ވަނީ އީރާނަށްވެސް އަމާޒުވެފައެވެ. ޚާއްސަކޮށް ޝީޢާ މީހުން ގިނަ ދެކުނުގެ ސަރަހައްދުގައި މި ރުޅިވެރިކަން ބޮޑުކަން ފާހަގަކުރެވެއެވެ.
އިރާގުގެ ތާރީޚުގައި ހިނގާ އެންމެ ބޮޑު އާއްމު ހަމަނުހެޖެހުން ކަމުގައި ބެލެވޭ މި މުޒާހަރާތަަކުގައި މިހާތަނަށް 350 އަށްވުރެ ގިނަ މީހުން މަރުވެ އެތައް ހާސް ބަޔަކު ޒަޚަމްވެފައި ވެއެވެ.
