ފަނޑިޔާރުން ބަދަލުވެގެން އެކަނި ޝަރުޢީ ނިޒާމު އިޞްލާޙުވެދާނެކަމަށް ދެކެން އުނދަގޫ ކަމަށް ރައްޔިތުންގެ މަޖިލީހުގެ ރައީސް، ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ. ރައީސް ނަޝީދު މިހެން ވިދާޅުވީ ރައްޔިތުންގެ މަޖިލީހުގެ އިއްޔެގެ ޖަލްސާގައި، ފަނޑިޔާރު ޢަބްދުލް ޣަނީ މުޙައްމަދު މަޤާމުން ވަކިކުރުމުގެ މައްސަލަ މިއަދުގެ ޖަލްސާއަށް އެޖެންޑާ ކުރައްވާނެކަން އިޢްލާންކުރައްވަމުންނެވެ.
"ފަނޑިޔާރުން ބަދަލުވެގެން އެކަނި ޝަރުޢީ ނިޒާމު އިޞްލާޙުވެދާނެ ކަމަށް ދެކެން އަޅުގަނޑަށް ހަމަ ކަށަވަރުން ވެސް އުނދަގޫ. ފަނޑިޔާރުންގެ އިތުރުން، އިންތިޒާމު އަދި ނިޒާމުތައް ހަރުދަނާކުރުމާއި، މީހުން ތަމްރީނުކުރުމާއި، ފަނޑިޔާރުންނަށް ދިމާވާ މައްސަލަތަކާ ގުޅޭގޮތުން އަޅާލުމާއި، އަދި ވަރަށްގާތުން ފަނޑިޔާރުންގެ ހުރި ހުރިހާ ކަމެއް ވެސް ބަލަމުން ގެންދިއުން އެއީ ފަނޑިޔާރުގެ އިޞްލާޙުކުރުމަށްޓަކައި އަދިކުރާން ހުރި މަސައްކަތް." ރައީސް ނަޝީދު ވިދާޅުވިއެވެ.
ފަނޑިޔާރުންގެ ޤާނޫނަށް އިޞްލާޙުގެނައުމުގެ ބިލަކާއި ކޯޓުތަކާ ގުޅޭ ބިލެއް ރައްޔިތުންގެ މަޖިލީހުގެ ޖުޑިޝަރީން ކޮމިޓީގައި އޮތްނަމަވެސް އަދި އެދެބިލްގެ މަސައްކަތް ނުނިމޭކަމަށް މަޖިލީހުގެ ރައީސް ވިދާޅުވިއެވެ. މި ދެބިލަކީ ވެސް ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީގެ) ލެޖިސްލޭޓިވް އެޖެންޑާގައި މިދައުރުގައި ހުށަހަޅާނެ ކަމަށް ވިދާޅުވި ދެބިލްކަން ވެސް ރައީސް ނަޝީދު ފާހަގަކުރެއްވިއެވެ. އެ ކޮމިޓީން އެ ބިލުގެ މަސައްކަތް ކޮށްދެވެން ނެތްނަމަ އެހެން ކޮމިޓީއަކާ އެ މަސައްކަތް ހަވާލުކުރައްވައިގެން ނަމަވެސް އެ މަސައްކަތް ކުރިއަށް ގެންދަން ޖެހޭކަމަށް ރައްޔިތުންގެ މަޖިލީހުގެ ރައީސް ވިދާޅުވިއެވެ.
