ދިރާގުން މުޅިދިވެހިރާއްޖެއަށް 4ޖީ އެލް.ޓީ.އީގެ ހިދުމަތް ފޯރުކޮށްދިނުމުގެ ބޮޑު މަޝްރޫއު ފަށައިފިއެވެ. މުޅި ދިވެހިރާއްޖެއަށް މި ޒަމާނީ ހިދުމަތް ފޯރުކޮށްދިނުމަށް ބޭނުންވާ ސިސްޓަމްތަކާއި އެހެނިހެން އާލާތްތައް ހޯދުމަށް ދިރާގުން ވަނީ އެންމެ ފުންނާބު އުސް ދެކުންފުންޏަކާއި އެކު އެއްބަސްވުމަކަށް އައިސްފައެވެ. މިހާރުވެސް ރާއްޖޭގެ އެންމެ ފުޅައު 4ޖީ ވިއުގަ ޤާއިމުކޮށްފައިވަނީ ދިރާގުންނެވެ. ސަބަބަކީ މިހާރުވެސް ރާއްޖޭގެ އާބާދީގެ 60 އިންސައްތައަށް 4ޖީ އެލް.ޓީ.އީގެ ހިދުމަތް މިހާރުވެސް ވަނީ ފޯރުކޮށްދީފައެވެ. އަދި ދިރާގުން ވަނީ ދިވެހިރާއްޖޭގައި މީހުންދިރިއުޅޭ ހުރިހާ ރަށަކަށް ބްރޯޑްބޭންޑުގެ ހިދުމަތް ފޯރުކޮށްދީ ފުރިހަމަ 3ޖީ ވިއުގައެއް މުޅި ދިވެހިރާއްޖޭގައި ޤާއިމްކޮށްފައެވެ. ރާއްޖޭގައި މުއާސަލާތީ ހިދުމަތްދޭ ކުންފުނިތަކުގެ ތެރެއިން މި މުހިއްމު ލަނޑުދަނޑި ހާސިލުކޮށްފައިވާ ހަމައެކަނި ކުންފުންޏަކީވެސް ދިރާގެވެ.
ދިރާގުން ލަފާ ކުރާ ގޮތުގައި 2017 ވަނަ އަހަރު ނިމުމުގެ ކުރިން މި މަޝްރޫޢު ނިންމައިލެވޭނެއެވެ.
ދިރާގުން ހާމަ ކުރާ ގޮތުގައި މުޅި ދިވެހިރާއްޖޭގައި ދިރާގުގެ ފުރިހަމަ 4ޖީ އެލް.ޓީ.އީގެ ހިދުމަތް ޤާއިމުކުރެވުމާއި އެކު އަތޮޅުތެރޭ ރައްރަށުގައިވެސް ހޯމް ބްރޯޑްބޭންޑުގެ ހިދުމަތް އެތައްގުނައެއް ހަލުއިވެ ފުރިހަމަ ވެގެންދާނެއެވެ. އިންޓަނެޓު މެދުވެރިކޮށް އެންމެފުރިހަމަޔަށް ބޭނުންހިފޭ ޒަމާނީ ސްމާޓް ޑިވައިސްތައް މިހާރު މިވަނީ ދިވެހިނެގެ ދިރިއުޅުމުގެ ވަރަށް މުހިއްމު ހިއްސާއަކަށް ވެގެންގޮސަފައެވެ.
މުޅި ދިވެހިރާއްޖެއަށް ބްރޯޑްބޭންޑުގެ ހިދުމަތް ފޯރުކޮށްދިނުމުގެ މުހިއްމު މަޤުސަދުގައި ދިރާގުން ވަނީ ރާއްޖޭގެ އުތުރުން ދެކުނަށް އެންމެ ޒަމާނީ ފައިބަރ އޮޕްޓިކް ސަބްމެރީން ކޭބަލައެއް ސިސްޓަމެއް ޤާއިމުކޮށްފައެވެ.
ދިރާގުގެ ސީ.އީ.އޯ ވިދާޅުވިއެވެ. "އަޅުގަނޑުމެނގެ އަމާޒަކީ އެންމެ ފުރިހަމަ ބްރޯޑްބޭންޑު ހިދުމަތް މުޅި ދިވެހިރާއްޖެއަށް ފޯރުކޮށްދިނުމެވެ. މިހާރުމިވަނީ ދިރިއުޅުމުގެ ހުރިހާ ކަމަކަށްވެސް ވަރަށް މުހިއްމު ހިދުމަތަކަށް ވެގެން ގޮސްސައެވެ. އެހެންކަމުން އާބާދީގެ ގޮތުން ކިތަންމެ މީސްކޮޅު ކުޑަރަށެއް ނަމަވެސް މާލެއެކޭ އެއްފަދައިން އެންމެ ފުރިހަމަ ހިދުމަތެއް ފޯރުކޮށްދިނުމަކީ އަޅުގަނޑުމެންގެ އަމާޒެވެ. ދިވެހިރާއްޖެއަކީ ޖަޒީރާ ޤައުމެއް ނަމަވެސް މީހުން ދިރިއުޅޭ ހުރިހާ ރައްތަކާއި، ސިނާއި މަސައްކަތްކުރާ ރައްރަށާއި، ރިސޯޓުތަކާއި އަދިވެސް އިންޓަނެޓުގެ ހިދުމަތް ބޭނުންވާ ސަރަހައްދުތަކަށް ދިރާގުގެ އެންމެ ފުރހަމަ ހިދުމަތް ފޯރުކޮށްދިނުމަކީ އަޅުގަނޑުމެނެގެ ވަރަށް ބޮޑުމަޤުސަދެކެވެ."
ރާއްޖެއަށް 4ޖީގެ ޚިދުމަތް ތައާރަފުކުރުމަށްފަހު އަތޮޅުތަކަށް މި ޚިދުމަތް ފުޅާކުރުމުގެ މަޝްރޫއު ގެދަށުން މިހާރު ވަނީ ހއ. ދިއްދޫ، އައްޑޫ ސިޓީ، ޏ، ފުވައްމުލައް، ގއ. ވިލިނގިލި، ގދ ތިނަދޫ، ޅ. ނައިފަރު، ޅ.ހިއްނަވަރު، ރ.ދުވާފަރު، ލ.މަތިމަރަދޫ، ލ.ތުންޑި، ނ.ވެލިދޫ، ދ.ކުޑަހުވަދޫ އަދި ހދ. ކުޅުދުއްފުށީގައިވެސް މިޚިދުމަތް ރަސްމީކޮށް އިފްތިތާޙްކޮށްފައެވެ.
