ރަސޫލުﷲ صلى الله عليه وسلم ގެ ކާފަދަރިކަލުން ޙުސައިނުގެފާނު ޝަހީދުވެވަޑައިގަތް ހާދިސާގެ ހަނދާން އާ ކުރުމަށް އެކަލޭގެފާނު ޝަހީދުވެވަޑައިގަތް ރަށް ކަމުގައިވާ ކަރްބަލާގައި އޮތް އެތައް ލައްކަ ޝީޢާ މީހުން ބައިވެރިވި ހިނގާލުމުއްގެ ތެރޭގައި އުފެދުނު ހާސްކަމެއްގައި ތިރީހަށް ވުރެ ގިނަ މީހުން މަރުވެ، ސަތޭއަށްވުރެ ގިނަ މީހުން ޒަޚަމްވެއްޖެއެވެ.
ހިޖުރައިން 61 ވަނަ އަހަރުގެ ޢާޝޫރާ ދުވަހު (މުޙައްރަމް މަހުގެ 10 ވަނަ ދުވަހު) ޙުސައިނުގެފާނު ޝަހީދުވެވަޑައިގަތް ހާދިސާއަކީ ޝީޢާއިން ހިތާމައިގެ ދުވަހެއްގެ ގޮތުގައި ފާހަގަކުރާ ހާދިސާއެކެވެ. އެކަލޭގެފާނު ޝަހީދުވެވަޑައިގަތް ރަށުގެ އެހާދިސާގެ ހިތާމައިގައި ބާއްވާ ހިނގާލުމަށް އިރާގުންނާއި އީރާނުން އަދި ބައެއް އެހެން ގައުމުތަކުން އެތައް ލައްކަ ބަޔަކު އެއްވެއެއެވެ.
އިރާގުގެ ހެލްތު މިނިސްޓްރީން މަރުވި މީހުންނާއި، ޒަޚަމްވީ މީހުންގެ އަދަދު ކަށަވަރުކޮށްދީފައި ވާއިރު، ބައެއް ޚަބަރުތައް ބުނާގޮތުގައި ހިނގާލުމުގައި ބައިވެރިވި މީހުންގެ މެދުގައި ހާސްކަން އުފެދި ކޮޅުކޮޅަށް ދުއްވައިގަތީ، ހުސައިނުގެފާނުގެ ޒިޔާރަތްފުޅަށް ވަންނަން ހަދާފައި އޮތް މަގެއް ވެއްޓުމުގެ ސަބަބުނެވެ. އެހެން ނަމަވެސް އިރާގުގެ ސިވިލް ޑިފެންސުގެ އެސިސްޓެންޓް ޑިރެކްޓަރު މުހްސިން ކާޒިމް ވަނީ އެވާހަކަ ދޮގުކުރައްވާފައެވެ.
"އައްރަޖާ ދޮރާށްޓާ ދިމާއަށް އެއްވެސް މަގެއް ވެއްޓިފައި ނުވޭ. މީހުން ގިނަ ވުމުގެ ސަބަބުން އެއްބަޔަކު އަނެއް ބަޔަކަށް ކޮއްޕައި ހެދީ." އޭނާ ވިދާޅުވިއެވެ.
މިއަދު މީހުން މަރުވުމުގެ ހާދިސާ ހިނގާފައި ވަނީ އިރާގެގެ ވެރިރަށް ބަޣުދާދުގެ ދެކުނުން 100 ކިލޯމީޓަރު ދުރުގައި އޮންނަ ކަރްބަލާގައި އޮންނަ ޢާޝޫރާ ދުވަހުގެ ހިނގާލުން ނިމެން ކައިރިވެފައި ވަނިކޮށެވެ. ޙުސައިނުގެފާނުގެ ޒިޔާރަތްފުޅަށް ނިންމާލާ އެ ހިނގާލުމުގެ ބައިވެރިން ހިނގާލުން ނިންމާލަން ޒިޔާރަތްފުޅާ ދިމާއަށް ދުވެފައިދިއުން އޮވެއެވެ. މީހުން މަރުވުގެ ހާދިސާ ހިނގީ އެވަގުތު ކަމަށް ވެއެވެ.
ކަރްބަލާގައި ކުރީ އަހަރުތަކުގައި ވެސް ތަފާތު ހާދިސާ ހިނގައި މީހުން މަރުވެފައި ވެއެވެ. އެހެނަމަވަސް މިއަދަކީ ފަހުގެ ތާރީޚެއްގައި މި ހިނގާލުމުގައި އެންމެ ގިނަ މީހުން މަރުވި ދުވަހެވެ. 2004 ވަނަ އަހަރު ޢާޝޫރާ ދުވަހު ބަޣްދާދާއި ކަރްބަލާގައި އޮތް ޝީޢާއިންގެ ހިނގާލުންތަކަށް ދިން ޖާނުން ފިދާވުމުގެ ހަމަލާގައި 143 މީހުން މަރުވިއެވެ. 2005 ވަނަ އަހަރު ދިޖްލާ ކޯރު ހުރަސްކޮށް އަޅާފައި އޮތް އަލްއައިއްމާ ބުރިޖުމަތީގައި ޢާޝޫރާ ހިނގާލުމުގެ ބައިވެރިން ތިއްބާ، ޖާނުންފިދާވެ ބޮމެއް ގޮއްވާލަން އުޅޭ މީހަކު އެތަނުގައި ހުރިކަމަށް ފެތުރުނު އަޑަކާ ގުޅިގެން މީހުން ހާސްވެގެން ދުއްވައި ގަތުމުން، މީހުންގެ ފައިދަށުވެގެންނާ ކޯރަށް ވެއްޓިގެން 953 މީހުން މަރުވެފައި ވެއެވެ.
މިއަހުރުވެސް ޢާޝޫރާ ދުވަހާ ދިމާކޮށް ޝީޢާއިންގެ އެތައް މިލިއަން ބަޔަކު ވަނީ ކަރްބަލާއަށް ޖަމާވެފައެވެ.
ޝީޢާއިންގެ މުޤައްދަސް ރަށެއްކަމުގައިވާ ކަރްބަލާގެ ދީނީ ތަންތަން ބަލަހައްޓާ އިދާރާއިން ޚަބަރުދޭ ގޮތުގައި މިއަހަރު 3 މިލިއަނަށްވުރެ ގިނަ މީހުން ވަނީ އެރަށަށް ޖަމާވެފައެވެ.
ޟޝީޢީން އަދި ސުންނީންނަކީ ކޮބާ