ރިޟަވާނަށް ވީ ގޮތެއް ހޯދައި އޭނާއަށް ހެދި ގޮތެއް ހެދި ބަޔަކު ޝަރީޢަތުގެ ކުރިމައްޗަށް ގެންނާން ކުރާ މަސައްކަތުގައި ބައެއް ގާނޫނުތަކަށް ބަދަލު ގެންނާން ޖެހޭ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞަލިޙް ވިދާޅު ވެއްޖެއެވެ. ރައީސް އޮފީހުގައި ދެންމެ ނޫސްވެރިންނާ ބައްދަލު ކުރައްވަމުން އެމަނިކުފާނު ވިދާޅުވި ގޮތުގައި ޓެރަރިޒަމާ ބެހޭ ގާނޫނާއި ޖިނާޢީ އިޖުރާތުގެ ގާނޫނަށް ވަނީ ބަދަލުތަކެއް ގެންނާން ވެފައެވެ. ޓެރަރިޒަމްގެ ގާނޫނު މިހާރު އޮތީ ވަކި ބަޔަކަށް އަމާޒުކޮށް ވަކި ކަހަލަ ކަންތައްތަކެއް ކުރާ ގޮތަށް ކަމަށާއި، ޓެރަރިޒަމް ރަނގަޅަށް ޑިފައިން ކުރުމަކީ ކުރަން ޖެހޭ ކަމެއް ކަމަށް ރައީސް ވިދާޅުވިއެވެ. އަދި ކުށުގެ ތުހުމަތުގައި ހައްޔަރު ކުރާ މީސްމީހުން ބަންދުގައި ބައިތިއްބަން މިހާރު އޮތް މުއްދަތަށް ބަދަލު ގެނައުމުގެ މައްޗަށްވެސް އެމަނިކުފާނު ވަނީ އަލި އަޅުއްވައި ލައްވައިފައެވެ.
ރައީސް ވިދާޅުވި ގޮތުގައި ގާނޫނުތަކަށް ގެންނާން ޖެހޭ ބަދަލުތަކުގެ މަސައްކަތް މިހގާރު ވަނީ ފަށްޓަވައިފައެވެ.
މި ބައްދަލުވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވި ގޮތުގައި މަރު ކޮމިޝަންގެ ރިޕޯޓު ރައްޔިތުންގެ މަޖިލީހާ ހިއްސާ ކުރައްވާކަށް އެމަނިކުފާނު ނާންގަވައެވެ. އެކަމަކު ވެގެން ދިޔަ ގޮތެއް ވެގެން ހިނގައްޖެ ކަމަށާއި، އެކަން ބަދަލު ނުކުރެވޭނެ ކަމަށާއި އެކަމަކު އެ ރިޕޯޓުގައި ހުރި ސިއްރުތައް ހިފަހައްޓަން ހުރިހައި މުއައްސަސާއަކުންވެސް މަސައްކަތް ކުރައްވާނޭ ކަމަށް އުއްމީދު ކުރައްވާ ކަމަށް ރައީސް ވިދާޅުވިއެވެ.
ރައީސް ހާމަ ކުރެއްވި ގޮތުގައި އެމަނިުކުފާނު ވަނީ މަރުކޮމިޝަނާއި ޕީޖީއާއި އޭޖީއާއި ފުލުހުންނާއި އެމްއެންޑީއެއްފެ އެއް މޫޒުދޮށަށް ގެންނަވައި ހުރިހައި މުއައްސަސާއެއް އެއްބާރުލުން ދީގެން އެއް މިސްރާބަކަށް ދަތުރު ކުރުމާ މެދު މަޝްވަރާ ކުރައްވައިފައެވެ. މީގެ ކުރިން އެކި މުއައްސަސާތަކުން އެކި ގޮތަށް ވާހަކަ ދެކެވެމުން ދިޔަ ނަމަވެސް ދެން އެހެން ނުވާނޭ ކަމުގެ ޔަގީންކަން ލިބިވަޑައިގެންފައިވާ ކަމަށްވެސް ރައީސް ވިދާޅުވިއެވެ.
ފުލުހުން ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް ފާރަލަމުންދާ ކަމަށް ދެކެވޭ ވާހަކަ ދޮގު ކުރައްވައި އެންއެންޑީއެފާއި ފުލުހުންގެ ފަރާތުން މިއަދު ބަޔާން ނެރުއްވާނޭ ކަމަށް ރައީސުލްޖުމްހޫރިއްޔާ ވަނީ މިއަދުގެ ވާހަކަފުޅުގައި ވިދާޅުވެފައެވެ.
