ރާއްޖެއިން މިއަހަރު އަމީރުލް ޙައްޖުގެ ގޮތުގައި މައްކާއަށް ވަޑައިގެންވި މިނިސްޓަރ އޮފް ޕްލޭނިންގ އެންޑް އިންފްރާސްޓްރަކްޗަރ މުޙަންމަދު އަސްލަމް މިއަދު ރާއްޖެ ވަޑައިގެންފިއެވެ.
އަމީރުލް ޙައްޖު މިއަދު ރާއްޖެ ވަޑައިގެންވިއިރު ރާއްޖެއިން މިއަހަރު ޙައްޖަށްދިޔަ ބަޔެއް ޙައްޖާޖީންވެސް މިހާރު ވަނީ ރާއްޖެ އަންނަން ފަށާފައެވެ. އެގޮތުން ތަޒްމިއާ ހައްޖު ގްރޫޕުން ހައްޖަށްދިޔަ 44 މީހަކު މިއަދު އައިސްފައި ވެއެވެ.
ރާއްޖެއިން މިއަހަރު ޙައްޖަށްދިޔަ 2000 މީހުންގެ ތެރެއިން އެކި ގްރޫޕު ތަކުން ހައްޖަށްދިޔަ މީހުން މިއަދު އަންނަ ފެށިއިރު ހުރިހާ ހައްޖު ވެރިން ރާއްޖެއައިސް ނިމޭނީ މިމަހުގެ 31 ވަނަ ދުވަހުއެވެ. އެންމެ ފަހުން ރާއްޖެ އަންނާނީ ޙައްޖު ކޯޕަރޭޝަނުގެ ހަވާލުގައި ދިޔަ ހައްޖާޖީންނެވެ.
މިއަހަރު ރާއްޖެއިން ހައްޖަށްދިޔަ މީހުންގެ ތެރެއިން އެކަކު ވަނީ ނިޔާފައެވެ. އޭނާ ނިޔާ ވެފައި ވަނީ ހައްޖު ދުވަހު އަރަފާތު ބިމުގެ އަޅުކަން ނިންމުމަށް ފަހު މިނާއަށް އައިސް އެތަނުގައި ހުއްޓައި ސްޓްރޯކެއް ޖެހި، ކޯމާއެއްގައި ދެތިން ދުވަހު މިނާގެ ހޮސްޕިޓަލެއްގައި އޮތް ފަހުންނެވެ. ނިޔާވި ދިވެހި ހައްޖުވެރިޔާގެ ކަށުނަމާދު މައްކާގެ ޙަރަމްފުޅުގައި ކުރުމަށް ފަހު ވަޅުލާފައި ވަނީ މައްކާގެ ގަބުރުސްތާނެއްގައެވެ.
